ޕަބްލިކް ސާވިސް މީޑިއާ (ޕީއެސްއެމް)އިން ގެނެސްދިން އިނގިރޭސި ޚަބަރުގެ ސެގްމަންޓެއްގައި ބޭއަދަބީ މަންޒަރެއް ހިމެނިފައިވާތީ އެ ކަމަށް އެ ކުންފުނިން މިރޭ މައާފަށް އެދެފިއެވެ.
މިރޭ އެ ކުންފުނިން ނެރުނު ބަޔާނެއްގައިވަނީ ބޭއަދަބީ މަންޒަރެއް ދެއްކިފައިވަނީ މި މަހުގެ 10ވަނަ ދުވަހުގެ ރޭގަނޑު 19:00ގައި ދެއްކި އިނގިރޭސި ޚަބަރުގައި ކަމަށެވެ.
ސޯޝަލް މީޑިއާގައި އަންނަނީ ޚަބަރުގައި ފެނުނު މަންޒަރު ދައުރުވަމުންނެެވެ. އެ ވީޑިއޯގައި ފެންނަނީ، ނޫސް ރިޕޯޓެއްގެ އޮން ކެމެރާގައި، ޕްރެޒެންޓަރުގެ ފަހަތުން މަސް ދޯންޏެއްގައި ދެ މީހަކު ފެންވަރައި، ގައި ހިއްކާ ތަނެވެ.
މި ކަމާ ގުޅިގެން ޕީއެސްއެމުން ބުނީ އެއީ އެ ކުންފުނީގެ އެޑިޓޯރިއަލް ޕޮލިސީއާ ޚިލާފު ސީރިއަސް މައްސަލައެއްކަމަށާއި، އެ ކަމުގައި ހިމެނޭ ފަރާތްތަކާމެދު ހަރުކަށި ފިޔަވަޅު އަޅާނެކަމަށް ވެސް ވަނީ ބުނެފައެވެ.
އެގޮތުން ކަން ހިނގައިދިޔަ ގޮތް ބެލުމަށްފަހު އިހުމާލުވި ދެ މުވައްޒަފަކު ސަސްޕެންޑުކޮށް، އެ މުވައްޒަފުންގެ މައްސަލަ ކަމާބެހޭ ކޮމިޓީއަށް ފޮނުވައިފައިވާ ކަމަށް ވަނީ ބުނެފައެވެ.
ހަމައެއާއެކު އިތުރަށް ފިޔަވަޅު އަޅަންޖެހޭ ފަރާތްތަކާމެދު ފިޔަވަޅު އަޅަން ވެސް ފޮނުވައިފައިވާ ކަމަށް ވަނީ ބުނެފައެވެ.
މީގެ އިތުރުން މިހާރު އެ ކުންފުނީގެ އެކި ޑިޕާޓްމަންޓުތަކުގައި އަަމަލުކުރާ އެސްއޯޕީތައް އިސްލާހުކޮށް އެ ކަންކަން ތަކުރާރުނުވާނެހެން ކަންކަން ތަަރުތީބުކުރާނެ ކަމަށް ވެސް ވަނީ ބުނެފައެވެ.
މީގެ ދެ ދުވަސް ކުރިން ވެސް ޕީއެސްއެމުން ވަނީ، ވަގުތުން ގެނެސްދިން އިވެންޓެއްގައި ޤުރުއާނުން ބައެއް އުނިވި ޓެކްނިކަލް މައްސަލައިގައި، އިހުމާލުވި މުވައްޒަފުން ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށް ބުނެ، މައާފަށް އެދިފައެވެ.