ކީރިތި ގުރުއާނުގެ އާޔަތްތަކަށް ބަދަލު ގެނެސްގެން ދައުލަތުގެ މީޑިއާއިން ދައްކަމުން ދާތީއާއި ތަކުރާރުކޮށް ގާނޫނާ ޚިލާފުވަމުންދާތީ އެކަން ސަރުކާރުގެ ސަމާލުކަމަށް ގެނައުމަށް މިއަދުގެ ރައްޔިތުންގެ މަޖިލީހުގެ ޖަލްސާއަށް ހުށަހެޅި ކުއްލި މައްސަލަ ބަލައިގެންފިއެވެ.
މި މައްސަލަ ހުށަހެޅުއްވީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރެވެ. މި މައްސަލަ މަޖިލީހުން ބަލައިގެންފައިވަނީ ވޯޓުގައި ބައިވެރިވި 71 މެންބަރުންގެ އިއްތިފާގުންނެވެ. އެއާއެކު އެ މައްސަލައަށް ބަހުސްކުރުން ކުރިއަށް ގެންގޮސްފައިވެއެވެ.
އެ މައްސަލާގައި ބުނެފައިވަނީ ޕަބްލިކް ސާވިސް މީޑިއާ (ޕީއެސްއެމް)ގެ ސިޔާސަތުތަކުގެ ތެރޭގައި ދީނީ، އިގުތިސާދީ، އިޖުތިމާއީ، ސިޔާސީ އަދި އެ ނޫން ވެސް ގައުމަށް ބޭނުންތެރި ހުރިހާ ދާއިރާއެއްގައި މައުލޫމާތު މުއްސަނދި ހޭލުންތެރި ރައްޔިތެއް ބިނާކުރަން މަސައްކަތްކުރުން ހިމެނޭ ކަމަށެވެ. ދިވެހި ރައްޔިތުންނަށް މުހިންމުވާނެ ބައިނަލްއަގުވާމީ އެކި ކަންކަމާއި ގައުމީ އެކި ކަންކަމުގެ ޚަބަރާއި، މައުލޫމާތާއި، ކަން ހިނގަމުންދާ ގޮތް ރައްޔިތުންނަށް އަންގައިދިނުމަކީ ޕީއެސްއެމްގެ މައްޗަށް ލާޒިމުކޮށްފައިވާ ކަންކަން ކަމަށް މައްސަލައިގައި ބުނެފައިވެއެވެ.
ނަމަވެސް، ކީރިތި ޤުރުއާނުގެ އާޔަތްތަކަށް ބަދަލު ގެނެސްގެން ޕީއެސްއެމުން ދައްކަމުންދާކަން ފާހަގަކުރެވިފައިވާ ކަމަށް އެ މައްސަލާގައި ވަނީ ފާހަގަކޮށްފައެވެ. އެ ކަމަކީ ގަސްތުގައި ބަދަލު ގެނެސް، އާޔަތްތަކުން މާނަ އޮޅުވާލުމަށް ކުރަމުންދާ ނުރައްކާތެރި ކަމެއް ކަމަށް އެ މައްސަލައިގައި ވަނީ ތުހުމަތުކޮށްފައެވެ.
އެ ކުއްލި މައްސަލައިގައި، ޕީއެސްއެމުން ފުރުސަތު ދެނީ ހަމައެކަނި ސަރުކާރުގެ ވެރިންނަށާއި ސަރުކާރުގެ މުވައްޒަފުންނަށާއި ސަރުކާރަށް ތާއީދުކުރާ ފަރާތްތަކަށް އެކަނި ކަމަށް ފާހަގަކޮށް، އެ ފުރުސަތު އިދިކޮޅު ފަރާތްތަކަށް ދޭން ޖެހޭނެ ކަމަށް ވެސް ވަނީ ބުނެފައެވެ.
ޕީއެސްއެމުން ގަސްތުގައި ދޮގު ޚަބަރު ފަތުރައި، ސިޔާސީ އިދިކޮޅު ފަރާތްތަކާއި ސަރުކާރާ ޚިޔާލު ތަފާތުވާ އެންމެންނާ ގުޅޭ ގޮތުން ހަގީގަތާ ޚިލާފު ވާހަކަތައް ފަތުރަމުންދާކަމަށް ވެސް ވަނީ ތުހުމަތުކޮށްފައެވެ.
އެ މައްސަލަ މަޖިލީހުން ބަލައިގަތުމުން މެންބަރު މައުރޫފް ވަނީ ހުރިހާ މެންބަރުންނަށް ޝުކުރުދަންނަވާފައެވެ.
މި މައްސަލައަކީ މިދިޔަ ހަފުތާގައި ރައީސް ޑރ. މުހައްމަދު މުއިއްޒު އއ. އަތޮޅާއި ކ. އަތޮޅުގެ ބައެއް ރަށްތަކަށް ކުރެއްވި ދަތުރުފުޅުގެ ތެރެއިން ބޭއްވި ޖަލްސާއެއް ފެށުމަށް ޤުރުއާން ކިޔެވިއިރު ޖަލްސާގެ ލައިވުން ބައެއް އުނިކުރި ކަމަށް ބުނެ، ސޯޝަލް މީޑިއާގައި ވެސް އެކަމުގެ ނުރުހުން ފާޅުކޮށްފައިވާ މައްސަލައެކެވެ.
ފަހުން ޕީއެސްއެމުން ވަނީ އެ ލައިވް ޑިލީޓުކޮށްފައެވެ.