ވޭޕް އެތެރެކޮށް އޭގެ ވިޔަފާރި ކުރުމާއި ބޭނުން ކުރުން މަނާކޮށްފައިވުމުން، އެ ގާނޫނާ ޚިލާފުވާ މީހުން ޖޫރިމަނާކުރާއިރު އެ މީހެއްގެ ފޯނަށް ފޮނުވާ މެސެޖެއްގެ ޒަރިއްޔާއިން އެ މައުލޫމާތު ހިއްސާކުރާނެ ކަމަށް ފުލުހުން މިރޭ ބުނެފިއެވެ.
ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހެއްގެ ދަށުން ވޭޕް އެތެރެކުރުން މިދިޔަ މަހުގެ 15ގައި މަނާކޮށް، އޭގެ ވިޔަފާރި ކުރުމާއި ހިލޭ ބެހުމާއި ބޭނުންކުރުން އިއްޔެއިން ފަށައިގެން ވަނީ މަނާކޮށްފައެވެ.
ފުލުހުން ނެރުނު ބަޔާނެއްގައި ވަނީ، އެ ގާނޫނާ ޚިލާފުވާ މީހުންނަށް ފިޔަވަޅު އަޅައި، ޖޫރިމަނާ ކުރަމުން ގެންދާނެ ކަމަށެވެ.
"އަދި ޖޫރިމަނާ ކުރެވޭ ފަރާތްތަކަށް އެކަމުގެ މައުލޫމާތު މޯބައިލް ފޯނުގެ ޒަރިއްޔާއިން ކުރު މެސެޖެއް މެދުވެރިކޮށް ފޮނުވޭނެއެވެ. މި މެސެޖުގައި، ޖޫރިމަނާ ދެއްކުމަށް ވާރު ޕޭގެ ޕޭމަންޓް ލިންކެއް ހިމެނިފައި ވާނެއެވެ." ބަޔާނުގައިވެއެވެ.
ވޭޕުކުރުމާއި، އެ ވިއްކުމާއި، އޭގެ އެއްވެސް މުއާމަލާތެއް ކުރުމުން ޖޫރިމަނާ ކުރާނެ އަަދަދުތަކުގެ ތެރޭގައި:
- ވޭޕް ބޭނުންކޮށްފިނަމަ: 5000 ރ. ޖޫރިމަނާ
- ވޭޕް ވިއްކާ ކޮންމެ މީހަކު: 20،000 ރ. ޖޫރިމަނާ
- ވިއްކާ ކޮންމެ ވޭޕަކަށް: 10،000 ރ. ޖޫރިމަނާ
- ހިލޭ ވެސް ވޭޕެއް ދީފިނަމަ: 10،000 ރ. ޖޫރިމަނާ
ދުންފަތުގެ އިސްތިއުމާލުކުރުން މަދުކުރުމަށް ޓަކައި ސަރުކާރުން އެކުލަވާލާފައިވާ މާސްޓާ ޕްލޭންގެ ދަށުން، މި ސަރުކާރުން ވަނީ ފިޔަވަޅުތަކެއް އަޅައިފައެވެ. އެގޮތުން ސިނގިރޭޓްގެ އިމްޕޯޓް ޑިއުޓީ ބޮޑުކުރުމާއެކު، ސިނގިރޭޓު ފޮއްޓެއްގެ އަގު ވަނީ ވަރަށް ބޮޑަށް އުފުލިފައެވެ. އެއާއެކު ސިނގިރޭޓު ވިކޭ މިންވަރު ވެސް މަދުވެފައިވާ ކަމަށް ބައެއް ވިޔަފާރިތަކުން ބުނެއެވެ.
މީގެ އިތުރުން ދުންފަތުގެ އިސްތިއުމާލުކުރުން ހުއްޓާލުމަށް ކުރާ މަސައްކަތުގައި އެހީތެރިވުމަށް ތަޖުރިބާކާރުންގެ އިރުޝާދާއި އެހީތެރިކަން ކޮންމެ ވަގުތަކު ވެސް ފޯރުކޮށްދޭނެ ހޮޓްލައިނެއް ތައާރަފުކޮށްފައިވެއެވެ.
އެ ޚިދުމަތް ހޯދުމަށް ގުޅާނެ ނަމްބަރަކީ 1676 އެވެ.
ރައީސް އޮފީހުން ވަނީ، މި ސިޔާސަތުތަކަކީ ކުރިއަށް އޮތް ހަތަރު އަހަރުގެ ތެރޭގައި ދުންފަތުގެ އިސްތިއުމާލުކުރުމުގެ މައްސަލައަށް ދާއިމީ ހައްލެއް ހޯދުމަށް އަމާޒުކޮށްގެން ސަރުކާރުން ތަންފީޒު ކުރާ ސިޔާސަތުތަކެއް ކަމަށް ބުނެފައެވެ.