ރޯގާގެ ގޮތުގައި ފެތުރޭ ބަލިތައް މިދިޔަ އަހަރުގެ ނޮވެމްބަރު މަހާ އަޅައިބަލާއިރު، ޑިސެންބަރު މަހު މަދުވެފައި ވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ހާމަކުރި ތަފާސްހިސާބުތަކުން ދައްކާގޮތުގައި މިދިޔަ މަހު ވަނީ، ޑެންގީ ހުމާއި، އަރިދަފުސް ރޯގާގެ އިތުރުން ބޭރަށް ހިންގުން ވެސް މަދުވެފައެވެ. އަދި އިންފްލުއެންޒާގެ އަލާމާތްތައް ހުރެގެން ޓެސްޓު ކުރި މީހުންގެ އަދަދު ވެސް ވަނީ މަދުވެފައެވެ.
އެގޮތުން މިދިޔަ އަހަރުގެ ނޮވެމްބަރު މަހު ޑެންގީ ހުން ޖެހިގެން 140 މީހުން ރިޕޯޓު ކޮށްފައިވާއިރު، ޑިސެމްބަރު މަހު މި ބަލި ޖެހިގެން ރިޕޯޓު ކޮށްފައި ވަނީ 96 މީހުންނެވެ.
އަރިދަފުސް ރޯގާ ޖެހިގެން ނޮވެމްބަރު މަހު 40573 މީހުން ރިޕޯޓުކޮށްފައި ވާއިރު ޑިސެމްބަރު މަހު ރިޕޯޓުކޮށްފައި ވަނީ، 30590 މީހުންނެވެ. މީގެ އިތުރުން ބޭރަށް ހިންގުން ޖެހިގެން ނޮވެމްބަރު މަހު 3640 މީހުން ރިޕޯޓުކޮށްފަިއ ވާއިރު، މި ބަލި ޖެހިގެން ޑިސެމްބަރު މަހު ރިޕޯޓުކޮށްފައި ވަނީ 2590 މީހުންނެވެ.
ރޯގާގެ ގޮތުގައި ފެތުރޭ ބަލިތައް މަދުވެފައިވީ ނަމަވެސް، އެޗްޕީއޭއިން ވަނީ ބަލިތަކުން ރައްކާތެރިވުމަށް ފިޔަވަޅުތައް އެޅުމަށް އިލްތިމާސްކޮށްފައެވެ. އެގޮތުން ޑެންގީ ފަދަ ބަލިތަކުން ސަލާމަތްވުމަށް އެޅިދާނެ ފިޔަވަޅުތައް އެ އިދާރާއިން ވަނީ ހިއްސާކޮށްފައެވެ.
ބަލިތަކުން ރައްކާތެރިވުމަށް ކުރެވިދާނެ ކަންކަމުގެ ތެރޭގައި:
- ސައިބޯނި ލައިގެން ގިނަގިނައިން ރަނގަޅަށް އަތް ދޮވުން
- ރޯގާޖެހިފައި ވާނަމަ ކުޑަކުދިންނާ ދުރުގައި އުޅުން
- ރޯގާޖެހި ކެއްސާނަމަ މީހުން އެއްވެ އުޅޭ ތަންތަނަށް ނުދިއުން
- ކެއްސާ ކިނބިހި އަޅާއިރު، ޓިޝޫއެއްފަދަ އެއްޗަކުން ނޭފަތައި އަނގަމަތި ނިވާކުރުން