ރާއްޖޭގެ ސަރަހައްދަށް އުނިއިތުރު ގެނައުމުގެ ބާރު ރައްޔިތުންގެ މަޖިލީހަށް އޮވެގެން ނުވާނެ ކަމަށާއި، އެ ބާރު އޮންނަންވާނީ ރައްޔިތުންގެ ކިބައިގައި ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ވިދާޅުވެއްޖެއެވެ.
މިދިޔަ ނޮވެންބަރު 18ގައި ގާނޫނުއަސާސީ އިސްލާހުކުރަން ސަރުކާރުގެ ފަރާތުން ރައްޔިތުންގެ މަޖިލީހަށް ތިން އިސްލާހެއް ހުށަހެޅިއެވެ. ހަމަ އެ ދުވަހު އެ ތިން އިސްލާހު ވެސް މަޖިލީހުން ފާސްކުރިއެވެ. އޭގެ ތެރޭގައި ހިމެނެނީ އެންޓިޑިފެކްޝަން ގާނޫނާއި ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުމާއި، އަދި ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުމެވެ.
ޕީއެންއެފުން ރޭ ބޭއްވި ޖަލްސާގައި ވާހަކަފުޅު ދައްކަވަމުން ޔާމީންވަނީ ރާއްޖޭން ސަރަހައްދުން ބައެއް ދޫކޮށްލުމަކީ ރައްޔިތުންގެ މަޖިލީހުން ގޮތް ނިންމަން ދޫކޮށްލާފައި އޮންނަ ކަމެއް ނޫންކަން ފާހަގަކުރައްވައިފައެވެ. ރައްޔިތުންގެ ބަހެއް ހޯދައިގެން މެނުވީ ރާއްޖޭގެ ސަރަހައްދުން އެންމެ އިންޗިއެއް ވެސް ދޫނުކޮށްލެވޭނެ ކަމަށް ޔާމީންވަނީ ވިދާޅުވެފައެވެ.
"އެއް ކަމަކަށް މި ވިދާޅުވަނީ ދިވެހިރާއްޖޭގެ ސަރަހައްދުން އިންޗިއެއް ވެސް ބަދަލެއް ނުގެނެވޭނެއޭ މަޖިލީހުގެ ރުހުން ނެތި... އެއީ އަޅުގަނޑުމެން މަޖިލީހަށް ދޫކޮށްލާ ކަމެއް ނޫނޭ. އެއީ، މަޖިލިސް މަންދޫބުންގެ ކަމެއް ނޫނޭ،" ޔާމީން ވިދާޅުވިއެވެ.
ރާއްޖޭގެ ސަރަހައްދު ކަނޑައެޅުމުގެ ބާރު ޕީއެންސީގެ މެޖޯރިޓީ އޮތް މަޖިލީހަށް ލިބިގެންދިޔައިރު، އެއީ ކުރިއެރުމެއްގެ ގޮތުގައި ސިފަ ކުރައްވައި، ރައީސް މުއިއްޒު ވާހަކަފުޅު ދެއްކެވީތީ ޔާމީން ވަނީ އެ ކަމާ ވަރަށް ބޮޑަށް ކަންބޮޑުވުން ފާޅު ކުރައްވައިފައެވެ.
އެ މަނިކުފާނު ވިދާޅުވި ގޮތުގައި ގާނޫނުއަސާސީއަށް ސަރުކާރުގެ ފަރާތުން މި ގެނައި އިސްލާހުތަކާ އެކު، ރާއްޖެ މި ވަނީ އެތައް އަހަރެއް ފަހަތަށް ގޮސްފައެވެ.
މަޖިލީހަށް ރާއްޖޭގެ ސަރަހައްދު ކަނޑައެޅުމުގެ ބާރުދޭ ގޮތަށް މި ސަރުކާރުން ގާނޫނު ބަދަލުކުރުމުގެ ކުރިން، ރާއްޖޭގެ ސަރަހައްދަށް އުނިއިތުރެއް ގެނެވޭނީ ރައްޔިތުންގެ ރެފަރެންޑަމަކަށް ގޮސްގެންނެވެ.
މީގެ އިތުރުން، ގާނޫނަށް މި ގެނައި އިސްލާހުތަކުގެ ތެރޭގައި، ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ ވެސް މަޖިލީހުން ފާސްކޮށްގެންނެވެ. އެ މަނިކުފާނު ވިދާޅުވާ ގޮތުގައި ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކު ތިބެގެން ވެސް ނުވާނެއެވެ. ރައްޔިތުންގެ މަޖިލީހުގެ ދައުރަކަށް ވާންވާނީ، އެ ފަދަ އަސްކަރީ ބަޔަކު ރާއްޖޭގައި ތިބިތޯ ފާރަވެރިވުމަށް ކަމަށް ވިޔަސް، ބޭރުގެ އަސްކަރީ ބަޔަކު ރާއްޖޭގައި ތިބެން މަޖިލީހަށް ހުއްދަ ނުދެވޭނެ ކަމަށް ޔާމީން ވިދާޅުވިއެވެ.
ރައްޔިތުންގެ މަޖިލީހުގެ ސުޕަމެޖޯރިޓީ އޮތް ސަރުކާރު ހިންގާ ޕީއެންސީން، ގާނޫނަށް ގެނައި ބަދަލުތަކާ ގުޅިގެން އިދިކޮޅު ފަރާތްތަކުންދަނީ ވަރަށް ބޮޑަށް ނުރުހުން ފާޅު ކުރަމުންނެވެ. އޭގެ ތެރޭގައި ޕާޓީ ބަދަލުކޮށްފިނަމަ، މެންބަރުކަން ގެއްލޭ އިސްލާހު ވެސް ހިމެނެއެވެ.
އިދިކޮޅު ފަރާތްތަކުން ބުނާ ގޮތުގައި މެންބަރުކަމުން ވަކިކުރެވެންޖެހޭނީ ދާއިރާ ރައްޔިތުންގެ މެދުގައި ނަގާ ވޯޓަކުންނެވެ. އެ ބާރު ސިޔާސީ ޕާޓީއަކަށް ދިނުމަކީ ރައްޔިތުންނަށް ދެވޭ ނިކަމެތި ކަމެއް ކަމަށް ބުނެ އެ މައްސަލަ އޮތީ ސުޕްރީމް ކޯޓަށް ވެސް ހުށަހަޅައިފައެވެ.