ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ވެސް މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލުކުރަން ސުޕްރީމް ކޯޓަށް ހުށަހަޅާފައިވާ މައްސަލައަށް ތަދައްޚުލުވާން ދަ ޑިމޮކްރެޓްސްއިން ވެސް ނިންމައިފިއެވެ.
ގާނޫނުއަސާސީއަށް އިސްލާހުތަކެއް ސަރުކާރުގެ ފަރާތުން ހުށަހެޅީ މިދިޔަ ބުދަ ދުވަހެވެ. ހަމަ އެ ދުވަހު އެ ބިލު މުޅި މަޖިލީހުގެ ކޮމިޓީން ފާސްކޮށް، ހަވީރު ވަނީ ތަޅުމުން ފާސްކޮށްފައެވެ. އިރުއްސުނު ވަގުތު ރައީސް ޑރ. މުހައްމަދު މުއިއްޒު ވަނީ އެ ބިލު ތަސްދީގުކުރައްވައިފައެވެ.
މި އިސްލާހު ބާތިލުކުރަން ސުޕްރީމް ކޯޓަށް މިއަދު ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިނެވެ.
މިކަމާ ގުޅުވާ އެ ޕާޓީން ނެރެފައިވާ ނޫސް ބަޔާނެއްްގައި ވަނީ އެ ގާނޫނަކީ މަޖިލީހުގެ ބާރާއި ބޭނުން ކަނޑުވައިލާ، ގާނޫނު އަސާސީގެ ތަސައްވުރުތަކާ ދެކޮޅަށް އޮތް އިސްލާހެއް ކަމަށެވެ. އަދި ވަކިން ޚާއްސަކޮށް މިއީ ގާނޫނު އަސާސީގެ އަސާސީ ސިފަތަކާއި ޚިލާފު ގާނޫނެއް ކަން އެ ޕާޓީން ފާހަގަކޮށްފައި ވެއެވެ.
އެހެންކަމުން، އެގާނޫނު ބާތިލުކުރުމަށް އެދި ފަންނުގެ މާހިރު، ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސައިން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލަ ދަ ޑިމޮކްރެޓްސްއިން ތަދައްޚުލު ވުމަށް ނިންމާފައި ވާކަން އެ ބަޔާނުގައި ފާހަގަކޮށްފައި ވެއެވެ.
އެ ޕާޓީއިން ވަނީ އެ އިސްލާހަކީ ގާނޫނު އަސާސީއާ ޚިލާފަށް ގެނައި އިސްލާހެއް ކަމަށް އެ ޕާޓީން ގަބޫލުރާ މައިގަނޑު ސަބަބުތައް ވެސް ހާމަކޮށްފައެވެ.
އެގޮތުން ހިމެނޭ ބައެއް ކަންތައްތަކުގެ ތެރޭގައި:
* ދައުލަތުގެ ތިން ބާރު ވަކިވެފައި އޮތް އޮތުން މި އިސްލާހުގެ ސަބަބުން ނިމުމަކަކަށް އަންނަ ކަމަށާއި ސީދާ ރައީސްގެ މުށުތެރެއަށް މަޖިލީސް ގެނައުމާއެކު ވެރިކަމުގެ ނިޒާމު އުވި ދައުލަތުގެ ބާރުތައް ރައްޔިތުންގެ ކިބައިން ފެށިގެން އަންނަ އައުމާއި ރައްޔިތުންގެ ކިބައިގައި އެ ބާރުތައް ދެމިއޮންނަން ވާނެކަމަށް ބަޔާންކޮށްފައިވާ ބަޔާންކުރުމާއި ޚިިލާފުވުން.
* ގާނޫނުގައި ސާފުކޮށް ބަޔާންކޮށްފައިވާ ގާނޫނު ހެދުމުގެ ބާރުތަކާއި ސަރުކާރުގެ މައްޗަށް ފާރަވެރިވުމާއި ޖަވާބުދާރީކުރުވުމާއި މަޖިލީހުގެ މެމްބަރުން މިނިވަންކަމާއިއެކު ރައްޔިތުންގެ ފަރާތުން ވަކާލާތުކުރުމާއި އެ މެމްބަރުން ވޯޓުދޭ ގޮތާއި މިފަދަ އެއްވެސް ކަމަކުން އެއްވެސް މެމްބަރެއްގެ މައްޗަށް ތަހުގީގެއް ދައުވާއެއް އަދި ޝަރީއަތެއް ވެސް ނުހިންގޭނެހެން ގާނޫނޫން ކަށަވަރުކޮށްދީފައިވާ އިމްތިޔާޒުތައް ނިގުޅައިގަނެ އިންތިހާބީ މި މަގާމުތަކުގެ ދެމިއޮތުމާއި ނެތުން ސިޔާސީ ޕާޓީއަކުން އެކުލަވައިލާ ފިޔަވަޅު އަޅާ ކޮމެޓީއެއްގެ ބާރުގެ ދަށަށް ގެނައުން.
* މަޖިލީހުގެ ޖަލްސާ ބޭއްވުމަށް މަދުވެގެން ބޭނުންވާ އަދަދަށްވުރެ މަޖިލީހުގެ ޖުމްލަ މެމްބަރުންގެ އަދަދުގެ ތެރެއިން އެއް ސިޔާސީ ޕާޓީއަކަށް ނިސްބަތްވާ މެމްބަރުންގެ އަދަދު އިތުރު ވުމާއެކު މިފަދަ ހާލަތެެއްގައި އެއްވެސް ސަބަބަކާ ހުރެ ޕާޓީގެ ލީޑާޝިޕް ނުވަތަ ފިޔަވަޅުއަޅާ ކޮމެޓީއަށްފެނި އެ މެމްބަރުން މަޖިލީހުގެ ޖަލްސާއެއް ބޭއްވުމަށް ބޭނުންވާ އަދަދު ހަމަނުވާނެ މިންވަރަށް މެމްބަރުން ވަކިކޮށްފި ހާލަތެއްގައި މުޅި ނިޒާމު ހުއްޓުމަކަށް އައިސް ގާނޫނީ ހުސްކަމެއްގެ ތެރެއަށް ގައުމު ވެއްޓި ވަކި ސިޔާސީ ޕާޓީއެއްގެ އަތްމައްޗަށް ދައުލަތުގެ އެންމެހައި ބާރުތައް ނެގުމުގެ ފުރުސަތު ހޯދައިފައިވުން.
ޑިމޮކްރެޓްސްއިން ބުނީ، މި ސަބަބުތަކުގެ އިތުރުން، މިހާރު ހިނގަމުންދާ މަޖިލީހުގެ ދައުރަށް މެމްބަރުން އިންތިހާބުކުރިއިރު ސިޔާސީ ޕާޓީއަކަށް ފެނިއްޖެނަމަ މެމްބަރުގެ ގޮނޑި ގެއްލުވާލުމަކީ ހުޅުވިފައި އޮތް ފުރުސަތަކަށް ނުވުމާ އަދި އެ ނޫންވެސް ގާނޫނާއި ގާނޫނުގެ އޮނިގަނޑަށް ފުށުއަރާ ކިތަންމެ ކަމެއް މި އިސްލާހުން ފާހަގަކުރެވޭ ކަމަށެވެ.
އެހެންކަމުން ސުޕްރީމްކޯޓަށް މިކަމާ ގުޅޭގޮތުން މިހާރު ހުށަހަޅާފައިވާ ދުސްތޫރީ މައްސަލައަށް ތަދައްޚުލުވުމަށް ކުރަންޖެހޭ މަސައްކަތްތައް އެ ޕާޓީގެ ގާނޫނީ ވަކީލުން ކުރަމުން އަންނަ ކަމަށް ޑިމޮކްރެޓްސް އިން ވަނީ ބުނެފައެވެ.
މިވަގުތު އޮތް އެންމެ ބޮޑު ސިޔާސީ ޕާޓީ އެމްޑީޕީން ވެސް ވަނީ މި މައްސަލައަށް ތަދައްޚުލުވާން ނިންމައިފައެވެ.
ސުޕްރީމް ކޯޓަށް މައްސަލަ ހުށަހެޅުމަށް ފަހު އަލީ ހުސައިން އެކްސްގައި ކުރެއްވި ޕޯސްޓެއްގައި ވަނީ، ގާނޫނުއަސާސީއަށް ހަވަނަ އިސްލާހު ގެނެސްފައިވަނީ ގާނޫނުއަސާސީގެ ހަތަރުވަނަ މާއްދާއާއި އަށްވަނަ މާއްދާއާއި 26 ވަނަ މާއްދާއާއި 75 ވަނަ މާއްދާ އަދި 90 ވަނަ މާއްދާއާ ހިލާފަށް ކަމަށެވެ.
ގާނޫނުއަސާސީއަށް ގެނައި އިސްލާހުތަކާ ގުޅިގެން ކުރީގެ ބަންޑާރަނައިބު ފާތިމަތު ދިޔާނާ ސައީދު ވެސް މީގެ ކުރިން ވަނީ ސުޕްރީމް ކޯޓަށް މައްސަލަ ހުށަހަޅަން ގޮވާލައްވައިފައެވެ. ކުރީގެ އުއްތަމަފަނޑިޔާރު ޑރ. އަހުމަދު ޢަބްދުﷲ ދީދީ ވެސް ވަނީ މެންބަރުން ވަކިކުރެވޭނީ ރައްޔިތުންގެ ވޯޓަކުން ކަމަށް ގާނޫނުއަސާސީ ބަދަލުކުރަން ޖެހޭ ކަމަށް ވިދާޅުވެފައެވެ.
އެކަމަކު، ސަރުކާރު ހިންގާ ޕީއެންސީން އަންނަނީ އެ އިސްލާހު ދިފާއުކުރަމުންނެވެ.
އެ ގޮތުން، މެންބަރުން ވަކިކުރުމުގެ ބާރު ޕާޓީތަކުގެ ކޮމިޓީތަކަށް ނުދޭނެ ކަމަށާއި ޕާޓީތަކުން މެންބަރުން ވަކިކުރެވޭނެ ގޮތުގެ ގާނޫނެއް އެކުލަވައިލާނެ ކަމަށް މަޖިލީހުގެ ރައީސް އަބްދުއްރަޙީމް އަބްދުﷲ ވަނީ ވިދާޅުވެފައެވެ.