ވޭޕަކީ ދުނިޔޭގެ އެކި ކަންކޮޅުތަކުގައި އެކި އުމުރުފުރާތަކުގެ މެދުގައި މަގުބޫލު އެެއްޗެކެވެ. އެ އުސޫލުން ރާއްޖޭގައި ވެސް ވޭޕް ބޭނުންކުރުމަށް 'ދެވިހިފާފައި' ތިބި އެތައް ބަޔަކު އެބަ އުޅެއެވެ. ޚާއްސަކޮށް ޒުވާނުންގެ ތެރޭގައި ވޭޕްގެ މަގުބޫލުލުކަން ބޮޑެވެ.
ނަމަވެސް، ސިނގިރޭޓަށް ވުރެ ރަނގަޅު ކަމަށް އިޝްތިހާރުވެގެން ތިޔަ ބޭނުންކުރާ ވޭޕްގަ އެކުލެވެނީ ކިހާ ވަރެއްގެ މާއްދާތަކެއް ކަން އިނގޭ ހެއްޔެވެ؟ މި ވަބާ ރާއްޖޭގައި އިންތިހާއަށް ބޮޑުއިރު، މި ސުވާލަކީ ކޮންމެހެން އުފައްދަން ޖެހޭ ސުވާލެކެވެ.
ސިއްހީ މާހިރުން ބުނާ ގޮތުގައި، ވޭޕުގައި އެކުލެވެނީ ހަމައެކަނި ފްލޭވާއެއް ނޫނެވެ. އޭގެތެރޭގައި، އެއަށް ވަރަށް ބޮޑަށް ދެވިހިފާ މާއްދާއެއް ކަމަށްވާ ނިކޮޓިން އެކުލެވޭއިރު، އެތައް ވިހަ މާއްދާތަކެއް އެކުލެވޭ ކަމަށް ބުނެއެވެ. މިސާލަކަށް، އެންމެ ސިނގިރޭޓެއްގައި ނިކޮޓިން ހުންނަ މިންވަރަށް ވޭޕު ޕަފެއްގައި ނިކޮޓިން އެކުލެވެއެވެ.
މިކަމުން އެކަނި ވެސް މިއީ ސިނގިރޭޓަށް ވުރެ ބިރުބޮޑު އެއްޗެއް ކަން ސާބިތުވެއެވެ. ނިކޮޓިންއާ ވިހަ މާއްދާތަކުގެ ސަބަބުން އެއަށް ދެވި ހިފާލެއް ވެސް އަވަހެވެ. އެކަމުން ސިއްހީ ގިނަ މައްސަލަތަކާ ކުރިމަތިވެއެވެ.
ދުންފަތުގެ އިސްތިއުމާލު ކުރުމާއި، ވޭޕު ކުރުމާއި އީ-ސިނގިރޭޓު ބުއިން މާނަކަން އަންގައިދޭން ހަރުކޮށްފައިވާ ނިޝާނެއް --- ފޮޓޯ/ގެޓީ އިމޭޖަސް
އެކަމަކު ވެސް، ސިނގިރޭޓަށް ވުރެ ގެންގުޅެން ފަސޭހަ، އަތަށް ލުއި، މީރު ވަސް ދުވާ، މީރު މި ކުޑަ އާލަތް، ފާޅުގައި އިޝްތިހާރު ކުރަނީއެވެ. ދާއިރާގެ މީހުންގެ އާމަޒަކަށްވީ ވެސް މި "ނުރައްކާ ކުޑަ" ވޭޕުން އަދުގެ ޒުވާން ޖީލު ނެތިކޮށްލުމެވެ.
މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިލެކްޓްރޯނިކް ސިނގިރޭޓާއި ވޭޕް ކުރުމަށް ބޭނުންކުރާ އެފަދަ އާލާތްތައް ރާއްޖެ އެތެރެކުރުން މަނާކޮށްފައެވެ.
މި މަހުގެ 15 އިން ފެށިގެން އެ ތަކެތި ބޭނުންކުރުމާއި ވިއްކުމާއި ހިލޭ ބެހުން ވެސް މުޅިން މަނާވާނެއެވެ. ނަމަވެސް، އަދިވެސް މި ވަބާގަ ދެމިތިބި ޒުވާނުންނާއި ސުކޫލުގެ ދަރިވަރުންގެ މެދުގައި ވެސް ވޭޕުކުރާ ތަން ފެނެއެވެ.
މިއީ އެ ޖީލު ނެތިކޮށްލައި، މުޅި ސިއްހީ ނިޒާމު ބަލިކޮށްލަން ހުޅުވިފައި އޮތް ނުބައި ފުރުސަތެކެވެ. މިކަމުން އަދުގެ ޖީލު ސަލާމަތްވެ، ހޭލުންތެރިވާން ޖެހެއެވެ. މައިންބަފައިންނާ މުޖުތަމައުގެ އެންމެން ގުޅިގެން ވޭޕުގެ ނުބައި އާދައިން ގައުމު ސަލާމަތް ކުރަން މިހާރު ތެދުވަން ވެއްޖެއެވެ.