އެޖެންޑާކުރާނެ މަސައްކަތެއް ނެތުމުން ރައްޔިތުންގެ މަޖިލީހުގެ މިއަދުގެ ޖަލްސާ ކެންސަލްކޮށްފިއެވެ.
މަޖިލީހުގެ ޖަލްސާތައް އާންމުކޮށް ބާއްވަނީ ހޯމަ، އަންގާރަ އަދި ބުދަ ދުވަހެވެ.
އާންމު ގޮތެއްގައި މަޖިލީހުގެ ޖަލްސާ ބާއްވަނީ ހެނދުނު 9:00 ގައެވެ. އެކަމަކު، މިއަދު ހެނދުނު ވެސް ޖަލްސާގެ އެޖެންޑާ އާންމުނުކުރާތީ ނޫސްވެރިން ކުރި ސުވާލަކަށް ޖަވާބުދެއްވަމުން މަޖިލީހުގެ އިދާރާގެ އޮފިޝަލަކު ވިދާޅުވީ، ދެން މަޖިލީހުގެ ޖަލްސާއެއް އޮންނާނީ ޑިސެމްބަރު 9، ވާ ހޯމަ ދުވަހު ކަމަށެވެ.
ޖަލްސާ ކެންސަލްކުރި ސަބަބާ ގުޅޭ ގޮތުން އެއްވެސް އެއްޗެއް ވިދާޅެއްނުވެއެވެ.
އެކަމަކު، 'ސަން'އާ ވާހަކަދެއްކި މަޖިލީސް މެންބަރަކު ވިދާޅުވީ، ޖަލްސާ ކެންސަލްކުރީ އެޖެންޑާކުރާނެ މަސައްކަތެއް ނެތުމުން ކަމަށެވެ.
"މިއަދު ކުރިއަށްގެންދަން ބިލެއްގެ މަސައްކަތެއް ވެސް ނެތް. އެކަމަކު، ކޮމިޓީ މަސައްކަތް އޮންނާނެ،" އޭނާ ވިދާޅުވިއެވެ.
އެ ކަމާ ގުޅިގެން މަޖިލީހުގެ އިދާރާގައި ސުވާލުކުރުމުން އެއްވެސް ޖަވާބެއް ދެއްވާފައެއް ނުވެއެވެ.
އިއްޔެގެ ޖަލްސާ ނިންމަވައިލައްވަމުން އޭރު ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވެސް މިއަދު ޖަލްސާއެއް އޮންނާނެކަން އިއުލާނުކުރިއެވެ.
ބައެއް މަސައްކަތްތައް ނިންމާލަން މަޖިލީހުގެ ދައުރު މި މަހު 15ގެ ނިޔަލަށް ދަންމާލީ މަޖިލީހުގެ ރައީސް އަބްދުއްރަޙީމް އަބްދުﷲ ހުށަހަޅުއްވައިގެންނެވެ.