ސަރުކާރަށް ފާޑުކިޔުމަކީ "ކުށަކަށް" ހަދަން އުޅޭތީ، ކަންބޮޑުވެވަޑައިގަންނަވާ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް މިރޭ ވިދާޅުވެއްޖެއެވެ.
ޞާލިޙް މިފަދައިން ތުހުމަތުކުރެއްވީ ބިރުވެރިކަން އުފެދޭ ގޮތަށް އެކްސްގައި ޕޯސްޓު ކުރިކަމުގެ ތުހުމަތުގައި އެމްޑީޕީގެ ސޯޝަލް މީޑިއާ އެކްޓިވިސްޓު ހުސެއިން ޝާފިއު (ތުއްތު) ފުލުސް އޮފީހަށް ހާޒިރުވުމަށް ޗިޓު ފޮނުވާފައިވަނިކޮށެވެ.
ޞާލިޙް އެކްސްގައި ކުރެއްވި ޕޯސްޓެއްގައި ވިދާޅުވީ، ސޯޝަލްމީޑިއާގައި ކުރާ ޕޯސްޓުތަކާ ގުޅިގެން ފުލުހަށް ހާޒިރުކުރުމާއި ކައުންސިލްތަކަށް އިންޒާރުގެ ސިޓީ ފޮނުވުމަކީ ދިވެހި ރައްޔިތުންގެ ބުރަ މަސައްކަތުން ހޯދި ޚިޔާލުފާޅުކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށެވެ.
ސަރުކާރަށް ފާޑުކިޔުން އަމާޒުކުރުމަކީ ކުށެއްގެ ގޮތުގައި ހަދައިގެން އަދަބު ދިނުމުގެ 'ބިރުވެރި މާޒީ' އަލުން އިއާދަކުރަން ސަރުކާރުން މަސައްކަތް ކުރާ ކަމަށް ތުހުމަތުކޮށް ޞާލިޙް ވަނީ އެކަމާ ކަންބޮޑުވުން ފާޅުކުރައްވާފައެވެ.
ޞާލިޙްގެ އިތުރުން އެމްޑީޕީގެ ޗެއާޕާސަން ފައްޔާޒް އިސްމާއިލް ވެސް ވަނީ ހިތްހަމަނުޖެހުން ފާޅުކުރައްވާފައެވެ. މިގޮތުން، ފައްޔާޒް ވަނީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށް ވިދާޅުވެފައެވެ.
މީގެ ކުރިން، ރައީސް ޑރ. މުޙައްމަދު މުއިއްޒުގެ އަބުރުފުޅަށް ހުތުރުވާ ގޮތަށް، ގދ. ގައްދޫ ކައުންސިލްގެ ރައީސް މުޙައްމަދު އަހުމަދު ވާހަކަދެއްކެވި މައްސަލައެއް ބަލައި، ފިޔަވަޅު އަޅަން ލޯކަލް ގަވަމަންޓް އޮތޯރިޓީ (އެލްޖީއޭ)އިން އަންގައިފައިވެއެވެ.
އެ މައްސަލައިގައި ވެސް އެމްޑީޕީން ނުރުހުން ފާޅުކޮށް، ސަރުކާރަށް ފާޑުކިޔައިފައިވެއެވެ.