މި ސަރުކާރުން ރައްޔިތުންނަށް ޑޮލަރު ހޯދައިދޭން ނޫޅޭ ކަމަށާއި އޭގެ ބަދަލުގައި ގަސްދުގައި، ރައްޔިތުން ނިކަމެތި ކުރަމުން އަންނަ ކަމަށް އެމްޑީޕީގެ ކުރީގެ ޗެއާޕާސަން، މާރިޔާ އަހުމަދު ދީދީ މިރޭ ވިދާޅުވެއްޖެއެވެ.
އެމްޑީޕީން މިރޭ ބޭއްވި ހަރުގެ ޖަލްސާގައި ވާހަކަ ދައްކަވަމުން, މައްޗަންގޮޅި އުތުރު ދާއިރާގެ ކުރީގެ މެންބަރު މާރިޔާވަނީ ސަރުކާރުން ރައްޔިތުންނާ މެދު އަމަލުކުރަމުންދާ ގޮތާމެދު ކަންބޮޑުވާ ކަމަށް ވިދާޅުވެ، ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
އޭނާ ވިދާޅުވި ގޮތުގައި މި ސަރުކާރުގައި ރައްޔިތުން ބިކަވެފައި ތިބެންޖެހުން ނޫން ކަމެއް ނުވާނެއެވެ. އެ ގޮތުން ރާއްޖޭގެ އިގުތިސާދު ހިފަހައްޓާ ދެ ސިނާއަތް ކަމަށްވާ ފަތުރުވެރިކަމާއި މަސްވެރިކަން ވެސް މި ސަރުކާރުން ފުނޑާލައިފި ކަމަށް މާރިޔާ ވިދާޅުވިއެވެ.
"...އަޅުގަނޑުމެންގެ ރިޒޯޓުތައް އެ ފުނޑާލަން ދަނީ ހަމަ ކަނޑައެޅިގެން އެނގިގެން، ތި ބޭފުޅުންނަށް ޑޮލަރު ހޯދައިދޭކަށް ނޫން އެ އުޅެނީއެއް. މި ރާއްޖެއަށް ޓޫރިސްޓުން އަންނާތީ އެ ކަމާ ކަންބޮޑުވެގެން އެ އުޅެނީ. ކަނޑައެޅިގެން އެނގިގެން ފުނޑާލަމުން އެ ދަނީ،" މާރިޔާ ވިދާޅުވިއެވެ.
އެމްޑީޕީން މިރޭ ބޭއްވި ހަރުގެ ޖަލްސާގައި ކުރީގެ ރައީސް އިބްރާހީމް މުހައްމަދު ސާލިހު ވެސް ބައިވެރިވެ ވަޑައިގަތް -- ފޮޓޯ/ އެމްޑީޕީ
އެމްއެމްއޭއިން މިދިޔަ މަހުގެ އެކެއްގައި އަމަލު ކުރަން ފެށި ބޭރު ފައިސާއާ ބެހޭ ގަވައިދަށާއި މިހާރު އެކުލަވައިލައިފައިވާ ބޭރު ފައިސާއާ ބެހޭ ބިލަށް އިޝާރާތްކުރައްވައި ވެސް މާރިޔާ ވާހަކަދެއްކެވިއެވެ.
އެ ގަވައިދާއި ބިލުގައި ވަނީ، ރާއްޖޭގެ ޓޫރިސްޓު ރިޒޯޓުތަކުން ކޮންމެ ޓޫރިސްޓަކަށް 500 ޑޮލަރުގެ ރޭޓުން ރާއްޖޭގެ ބޭންކުތަކަށް މާރުކުރަން ޖެހޭނެ ކަމަށެވެ. އަދި ގެސްޓްހައުސްތަކުން ކޮންމެ ޓޫރިސްޓަކަށް 25 ޑޮލަރު މާރުކުރަން ޖެހެއެވެ.
މި ކަމާ ގުޅިގެން ޓޫރިޒަމް ދާއިރާގެ އިސް ބޭފުޅުން ކަންބޮޑުވުން ފާޅުކުރަމުންދަނިކޮށް، ރައީސް ޑރ. މުޙައްމަދު މުއިއްޒު ވަނީ އެ ގަވާއިދު ބަދަލު ނުކުރައްވާނެ ކަމަށް ތަކުރާރުކޮށް ވިދާޅުވެފައެވެ.
އެ ގަވައިދަށް އިޝާރާތް ކުރައްވައި މާރިޔާ ވިދާޅުވީ ރާއްޖޭގައި ނުހެދި ހުރި 60އަށްވުރެ ގިނަ ރިޒޯޓުތައް އޮތްއިރު، މި ބަދަލާއެކު ފަތުރުވެރިކަމުގެ ސިނާއަތް ފުނޑި މުޅި ރާއްޖެއަށް ގެއްލުން ވާނެ ކަމަށެވެ.
މި ކަންކަމާ ގުޅިގެން މާރިޔާ ވިދާޅުވީ ސަރުކާރުން މަސައްކަތް ކުރަނީ ގަސްދުގައި ރައްޔިތުން ނިކަމެތި ކުރަން ކަމަށެވެ. އެއީ އޭގެ ސަބަބުން ވެރިކަން ކުރަން ފަސޭހަވާނެ ކަމަށް ބެލެވިގެން ކަމަށް ވެސް އޭނާ ވިދާޅުވިއެވެ.
ޓޫރިޒަމް ދާއިރާއިން ޑޮލަރު މާރުކުރަންޖެހޭ ގޮތަށް ހަދަނީ ރައްޔިތުންނަށް އޭގެ މަންފާ ހޯދައިދިނުމަށް ޓަކައި ކަމަށް ސަރުކާރުން ބުނެއެވެ. އޭގެ ތެރޭގައި:
- ސަރުކާރުން ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓުގައި ޑޮލަރު ލިބޭނެ އިންތިޒާމެއް އަންނަ އަހަރުގެ ޖުލައި މަހުން ފެށިގެން ގާއިމުކުރުން
- ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް ލިބޭ 500 ޑޮލަރު ދެގުނަކޮށް އެއަދަދު 1000 ޑޮލަރަށް 2026ވަނަ އަހަރުގެ ފުރަތަމަ ކުއާޓާގައި ހެދުން
- ކްރެޑިޓް ކާޑު ލިމިޓްތައް 2026ވަނަ އަހަރުގެ ފުރަތަމަ ކުއާޓާގައި ބޮޑުކޮށްދިނުން
- ދިވެހި ވިޔަފާރިވެރިންނަށް ތަކެތި އިމްޕޯޓްކުރުމުގެ ގޮތުން ބޭންކުތަކަށް ޓީޓީ ހެދުމަށް ދޫކުރާ ޑޮލަރުގެ ނިސްބަތް އަންނަ އަހަރުގެ ޖުލައި މަހުން ފެށިގެން އިތުރުކުރުން
ބޭރު ފައިސާއާ ބެހޭ ބިލަށް ޚިޔާލު ހުށަހެޅުމުގެ ފުރުސަތު އެމްއެމްއޭއިން އަންނަ އާދިއްތަ ދުވަހުގެ ނިޔަލަށް ހުޅުވައިލައިފައިވާއިރު، އެ ބިލް އެކުލަވާލާފައިވާ ގޮތުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވާނެ ކަމަށް, ރައީސް އިއްޔެ ވިދާޅުވިއެވެ.