ރައްޔިތުންގެ މަޖިލީހުގެ ރުހުމާ ނުލައި ރާއްޖޭގައި ބޭރު ސިފައިންނަށް ނުތިބެވޭ ގޮތަށް ގާނޫނު އަސާސީއަށް އިސްލާހެއް ހުށަހަޅަން ސަރުކާރުން ނިންމައިފިއެވެ.
ނަންނުޖަހަން ޝަރުތުކޮށް، ޕީއެންސީގެ މެންބަރަކު ވަނީ އެކަން 'ސަން'އަށް ކަށަވަރުކޮށްދެއްވާފައެވެ. އެ މެންބަރު މައުލޫމާތު ދެއްވި ގޮތުން، ސަރުކާރުގެ ފަރާތުން ގާނޫނަށް އިސްލާހު ހުށަހަޅަން ނިންމާފައި ވަނީ މާދަމާގެ ޖަލްސާގައެވެ.
ގާނޫނު އަސާސީގައި އޮންނަ ގޮތުން ނަމަ، ރާއްޖޭގައި ބޭރު ސިފައިން ގާއިމުވެ ތިބުމަށް މަޖިލީހުގެ ރުހުމެއް ބޭނުމެއް ނުވެއެވެ. މަޖިލީހުގެ ރުހުން ބޭނުން ވަނީ، ރާއްޖޭގައި ބޭރުގެ އަސްކަރީ މަރުކަޒެއް ގާއިމް ކުރުމަށެވެ.
އިންޑިއާއިން ރާއްޖެއަށް ގެނައި ހެލިކޮޕްޓަރާއި ޑޯނިޔާ މަތިންދާ ބޯޓު ދުއްވުމަށް މީގެ ކުރިން ރާއްޖޭގައި އިންޑިއާ ސިފައިން ގާއިމުވެ ތިއްބެވެ. މިކަމާ ދެކޮޅަށް ކުރީގެ ރައީސް އަބްދުﷲ ޔާމީން އަބްފުލްގައްޔޫމް އިސްވެހުންނަވާ "އިންޑިއާ އައުޓް"ގެ ނަމުގައި ކެމްޕެއިން ހަރަކަތެއް ފެއްޓެވިއެވެ. އެއީ ނިމިދިޔަ އެމްޑީޕީ ސަރުކާރުގައެވެ.
ރައީސް ޑރ. މުޙައްމަދު މުއިއްޒު މިދިޔަ އަހަރު ވެރިކަމަށް ވަޑައިގަތީ ރާއްޖޭގައި ތިބި ހުރިހާ އިންޑިއާ ސިފައިން ފޮނުވާލާނެ ކަމުގެ ވައުދުފުޅާ އެކުގައެވެ. މިގޮތުން ، އިންޑިއާ ސިފައިންގެ ފުރތަމަ ބެޗު ރާއްޖޭން ފޮނުވާލާފައި ވަނީ މިދިޔަ މާޗު މަހުގެ ކުރީކޮޅުގައި ކަމަށްވާއިރު، ދެވަނަ ބެޗު ރާއްޖޭން ގޮސްފައި ވަނީ އޭޕްރީލް މަހުގެ ތެރޭގައެވެ.
މިގޮތުން، ދެވަނަ ބުރުގައި ފުރައިގެން ދިޔައީ 51 ސިފައިން ކަން ސަރުކާރުން ހާމަކޮށްފައިވާއިރު، ބާކީ ތިބި ހުރިހާ ސިފައިން އަނބުރާ ގެންގޮސްފައި ވަނީ މެއި މަހުގެ ތެރޭގައެވެ.
އިންޑިއާ ސިފައިންގެ ވާހަކައަކީ މިދިޔަ އަހަރުގެ ރިޔާސީ އިންތިޚާބުގެ ކެމްޕެއިން ތެރޭގައި އޭރު އިދިކޮޅުގައި އޮތް ޕީއެންސީން އެންމެ ގަދައަށް ދެއްކި އެއް ވާހަކައެވެ. އަދި ވެރިކަމުގެ ފުތަރަމަ ދުވަހުން ފެށިގެން އިންޑިއާ ސިފައިން ރާއްޖެއިން ބާލަން މަސައްކަތް ކުރައްވާނެކަމަށް މިހާރުގެ ރައީސުލްޖުމްހޫރިއްޔާ އަދި އޭރުގެ އިދިކޮޅު ކެންޑިޑޭޓް ޑރ. މުހައްމަދު މުއިއްޒު ވައުދުވެވަޑައިގެންފައިވެއެވެ.
ރާއްޖޭގައި ތިބި އިންޑިއާ ސިފައިން ފޮނުވާލުމާ ގުޅޭ ގޮތުން އެގައުމާއެކު ބޭއްވި މަތީ ފަންތީގެ މަޝްވަރާތަކާ ގުޅޭ ގޮތުން އިންޑިއާގެ އެކްސްޓާނަލް އެފެއާޒް މިނިސްޓްރީން މިދިޔަ ޖެނުއަރީ އަށްވަނަ ދުވަހު ބުނެފައިވަނީ، އެގައުމުން ރާއްޖެއަށް ހަދިޔާކުރި ވައިގެ އުޅަނދުތަކުގެ އޮޕަރޭޝަންތަކުގައި މިހާރު ހަރަކާތްތެރިވާ ސިފައިން އަނބުރާ ގެނައުމަށްފަހު ރާއްޖެއަށް ފޮނުވާނީ ފަންނީ މުވައްޒަފުން ކަމަށެވެ.