މޯލްޑިވްސް ބްރޯޑްކާސްޓިން ކޮމިޝަނުގެ މެންބަރު ކަމަށް ކުރިމަތިލުމަށް ފުރުސަތު ހުޅުވާލައިފިއެވެ.
ރައީސް އޮފީހުން މިއަދު ގެޒެޓުކުރި އިއުލާނެއްގައިވަނީ އެ ފުރުސަތު ހުޅުވާލަނީ ބްރޯޑްކޮމްގެ ދެ މެންބަރެއްގެ މުއްދަތު ހަމާވާތީ ކަމަށެވެ.
އެ ކޮމިޝަންގެ މެންބަރުކަމުގެ ކުރިމަތިލެވޭނީ މިއަދުން ފެށިގެން މިމަހުގެ 26ވާ އަންގާރަ ދުވަހުގެ 12:00ގެ ނިޔަލަށެވެ.
ބްރޯޑްކޮމްއަށް ކުރިމަތިލާ މީހުންގެ ހުންނަން ޖެހޭ ބައެއް ޝަރުތުތަކުގެ ތެރޭގައި:
- ގާނޫނުއަސާސީގެ ދަށުން ނުވަތަ ގާނޫނެއްގެ ދަށުން އިންތިޚާބުކުރެވޭ ނުވަތަ އައްޔަންކުރެވޭ މަގާމެއްގައި ހުރި މީހަކު ކަމުގައި ނުވުން
- ސިވިލް ސާވިސްގެ ނުވަތަ ސަރުކާރާއި ސަރުކާރު ހިއްސާވާ ކުންފުންޏެއްގެ އެހެންވެސް ވަޒީފާއެއް އަދާކުރާ މީހަކު ކަމުގައި ނުވުން
- ކޮމިއުނިކޭޝަނާއި ބްރޯޑްކާސްޓްކުރުމުގެ ދާއިރާގައި މާލީ މަސްލަހަތެއް އޮތް މީހަކު ކަމުގައި ނުވުން.
އެ ކޮމިޝަނުގެ މެންބަރުކަމަށް ކުރިމަތިލުމަށް އެދޭ ފޯމާއި، އިގުރާރާއި، ކުށާއި ދަރަނީގެ ރެކޯޑު ފޯމު ބަލައިގަތުމަށް ހަމަޖެހިފައިވަނީ، އެކަމަށް ކުރިމަތިލުމަށް ދީފައިވާ މުއްދަތުގައި، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން މެންދުރު 12:00 އަށް ރައީސުލްޖުމްހޫރިއްޔާގެ އޮފީހުންނެވެ.
އެ ފޯމުތަކާއި އިގުރާރު، ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެވޭނެއެވެ.
ބްރޯޑްކޮމްގައި ހަތް މެންބަރުން ތިއްބަވާއިރު ކޮންމެ މެންބަރެއްގެ ދައުރަކީ ފަސް އަހަރެވެ. އެ ކޮމިޝަނުން މި އަހަރު ދައުރު ހަމަވާނީ ކޮމިޝަންގެ ރައީސް މަރިޔަމް ވަހީދާއާއި ކޮމިޝަނަރު އަލީ ޔޫސުފްގެއެވެ.
ބްރޯޑްކޮމްއަށް ކުރިމަތިލާން ހުޅުވާލައިފައި ވަނީ، ބްރޯޑްކޮމްއާއި މޯލްޑިވްސް މީޑިއާ ކައުންސިލް (އެމްއެމްސީ) އުވާލައި، މީޑިއާތައް ރެގިއުލޭޓް ކުރުމަށް އެހެން ކޮމިޝަނެއް އުފެއްދުމަށް ހިމަނައިފައިވާ ބިލެއް ރައްޔިތުންގެ މަޖިލީހަށް ހުށަހަޅައިފައިވާ ދަނޑިވަޅެއްގައެވެ.
'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި އެ ބިލު ހުށަހަޅައިފައިވަނީ ތުޅާދޫ ދާއިރާގެ އަމިއްލަ މެންބަރު އަބްދުލް ހަންނާން އަބޫބަކުރެވެ.
އެ ބިލުގައި އުފައްދަން ހުށަހަޅައިފައިވާ ކޮމިޝަންގެ އަޣުލަބިއްޔަތު ލިބޭނީ ސަރުކާރަށް ކަމަށް ބުނެ، ނޫސްވެރިންނާއި އިދިކޮޅުން އަންނަނީ ކަންބޮޑުވުން ފާޅުކުރަމުންނެވެ. އެހެންވެ އެ ބިލާ ދެކޮޅަށް ޖާނަލިސްޓްސް އެސޯސިއޭޝަން (އެމްޖޭއޭ)އިން އިސް ނަގައިގެން 'ހަތަރެއްގެ ހައްގުގައި' ނަމުގައި ކެންޕޭނެއް ވަނީ ފަށައިފައެވެ.
ރައީސް ޑރ. މުޙައްމަދު މުއިއްޒު ރޭ ވަނީ އެ ބިލުގައި އޮތީ އެ މަނިކުފާނު ގަބޫލުކުރައްވާ ސިޔާސަތުތަކެއް ނޫން ކަމަށާއި ވެރިކަން ކުރާ ޕާޓީގެ އަޣުލަބިއްޔަތު އޮންނަ މަޖިލީހުން ބިލު ބޭރުކުރާނެ ކަމަށް ވިދާޅުވެފައެވެ.