ހުޅުމާލޭ ސެންޓްރަލް ޕާކު ސަރަހައްދުގައި ހިނގި އެކްސިޑެންޓުގައި މީހަކު މަރުވި މައްސަލައިގައި، ކާރު ދުއްވަން އިން ޒުވާނާގެ މައްޗަށް ޕްރޮސެކިއުޓާ ޖެނެރަލް (ޕީޖީ) އޮފީހުން ދައުވާ ކޮށްފިއެވެ.
ސްޕޯޓްސް ކާރަކާއި ސައިކަލެއްޖެހި ހުޅުމާލޭ ސެންޓްރަލް ޕާކު ސަރަހައްދުގައި ހިނގި އެކްސިޑެންޓުގައި މަރުވެފައި ވަނީ ސައިކަލު ދުއްވަންއިން ކަރެކްޝަންސްގެ އޮފިސަރު ހަސަން ސަމާހެވެ. އެއީ ސެޕްޓެމްބަރު ހަވަނަ ދުވަހެވެ.
މި މައްސަލައިގައި ޕީޖީ އޮފީހުން ދައުވާ ކޮށްފައި ވަނީ ސ. ހިތަދޫ، ވައިލެޓްފިހި، އުމުރުން އުމުރުން 26 އަހަރުގެ މުހައްމަދު ވިސާމް ސިދުގީގެ މައްޗަށެވެ.
ޕީޖީ އޮފީހުން ވިސާމްގެ މައްޗަށް ކޮށްފައި ވަނީ ގާނޫނުލް އުގޫބާތުގެ 111 ވަނަ މާއްދާގެ ދަށުން މީހަކު މަރުވެދިއުމުގެ ފަރުވާކުޑަ ޢަމަލެއް ކުރުމުގެ ކުށުގެ ދަޢުވާއެވެ.
އޭގައި އިތުރަށް ބުނެފައި ވަނީ އެ ދައުވާ ކޮށްފައި ވަނީ ކާރު ދުއްވުމުގެ ލައިސަންސް ނެތި، ހުޅުމާލެ ސެންޓްރަލް ޕާކު ކައިރިން އިރުން ހުޅަނގަށް، ކާރުގައި ހުއްދަކުރެވިފައިވާ ސްޕީޑަށްވުރެ ބާރަށް ދުއްވާފައި ދަނިކޮށް، ހުޅުމާލެ ރީތިގަސްމަގުން ދެކުނުން އުތުރަށް ދުއްވާފައި އައިސް ބަގީޗާހިނގުމަށް ނިކުތް ސައިކަލުގައި، ކޮންޓްރޯލު ނުވެގެންގޮސް ޖެހި އެކްސިޑެންޓް ވުމުގެ ސަބަބުން އެ ސައިކަލު ދުއްވަންއިން ލ.އިސްދޫ، ބީޗްހައުސް، ޙަސަން ސަމާޙް ނިޔާވެފައިވާތީއެވެ.
ޕީޖީ އޮފީހުން ވަނީ އޭނާގެ މައްޗަށް މި ދައުވާ ސާބިތުވެއްޖެ ނަމަ ކަނޑައެޅޭނޭ އަދަބެއްގެ ގޮތުގައި ހަމަސް ދުވަހުގެ މުއްދަތަށް ޖަލަށް ލުން ހިމަނާފައެވެ.
ސަމާހުގެ މައްޗަށް ދައުވާކުރުމަށް ޕީޖީ އޮފީހަށް ފުލުހުން ހުށަހަޅާފައި ވަނީ މި ނިމިދިޔަ އޮކްޓޯބަރު މަހުގެ 22ވަނަ ދުވަހުގައެވެ.
މި މައްސަލައާ ގުޅިގެން މިދިޔަ އޮކްޓޯބަރު މަހުގެ ތިންވަނަ ދުވަހު ބޭއްވި އަޑުއެހުމުގައި އޭނާގެ ވަކީލު ނޫރުއްސަލާމް ވަނީ ވިސާމް ކާރު ދުއްވީ ބާރު ސްޕީޑުގައި ނޫން ކަމަށް ވިދާޅުވެފައެވެ.
އަދި އެ އެކްސިޑެންޓު ހިނގަން މެދުވެރިވީ ވަންވޭއާ ދެކޮޅަށް ސައިކަލު ދުއްވުމުން ކަމަށް އޭނާ ވިދާޅުފައިވެއެވެ. އެކަމާ ދެކޮޅަށް ފުލުހުން ހެކި ދިން ނަމަވެސް ފަހުން އާންމުވި މައުލޫމާތުތަކުން އެކަމަށް ބާރު ލިބިފައިވާކަމަށާއި ވިސާމް ބަންދުކުރީ އޭރު ފުލުހުން ދިން މައުލޫމާތަށް ކަމަށް ނޫރުއްސަލާމް އޭރު ވަނީ ވިދާޅުފައިވެއެވެ.