އައު އަހަރާ ދިމާކޮށް، ބަނގުރާ އަދި މަސްތުވާތަކެތި ބޭނުންކޮށް, ވިއްކާ ވިޔަފާރިކުރުން އިތުރުވެގެން ދާނެކަމަށް ބެލެވޭތީ ފުލުހުންގެ ޚާއްސަ އޮޕަރޭޝަނެއް އިއްޔެ ފަށައިފިއެވެ.
ފުލުހުން ނެރުނު ބަޔާނެއްގައި ބުނީ މި އޮޕަރޭޝަން ކުރިއަށް ގެންދަނީ ޑްރަގް އެންފޯސްމަންޓާއި، ހުޅުމާލެ ޕޮލިސް އަދި ކ. އަތޮޅު ޕޮލިސް ސްޓޭޝަންތައް ގުޅިގެން ކަމަށެވެ.
މި އޮޕަރޭޝަން ކުރިއަށް ގެންދަނީ އައު އަހަރާ ދިމާކޮށް ބަނގުރާ އަދި މަސްތުވާތަކެތި ބޭނުންކޮށް, ވިއްކާ ވިޔަފާރިކުރުން އިތުރުވެގެން ދާނެކަމަށް ބެލެވޭތީ ކަމަށް ފުލުހުން ވަނީ ބުނެފައެވެ.
މި އޮޕަރޭޝަންގައި ހުޅުމާލެ ފަޅުތެރެ ޕެޓްރޯލްކުރުމާއި ރަށުތެރެއަށް ބަނގުރާ އަރުވައި، ބަނގުރާ ވިއްކާކަމަށް ޝައްކުކުރެވޭ ކެފޭ، ރެސްޓޯރެންޓްތައް މޮނިޓާކުރާނެ ކަމަށް ފުލުހުން ބުންޏެވެ. އަދި ގާނޫނާއި ގަވައިދާ ޚިލާފުވާ ފަރާތްތަކާ މެދު ފިޔަވަޅު އެޅުމުގެ މަސައްކަތް ވެސް ކުރާނެ ކަމަށް ފުލުހުން ވަނީ ބުނެފައެވެ.
އައު އަހަރާ ދިމާކޮށް މީގެ ކުރިން ވެސް ފުލުހުން މިފަދަ އޮޕަރޭޝަންތައް ކުރިއަށްގެންދެއެވެ.