ބިންވެރިޔާ ސްކީމާ ގުޅޭގޮތުން ފުލުހުން ތަހުގީގުކުރަމުން އަންނަ މައްސަލައާ ގުޅިގެން އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދުގެ ފޯނު ހިފަހައްޓައިފިއެވެ.
މި ވަގުތު ފަޒީލް ހުންނެވީ ސަސްޕެންޝަނުގައެވެ. ފަޒީލް ސަސްޕެންޑުކުރީ، ކުރީ ސަރުކާރުގެ ބިންވެރިޔާ ސްކީމްގެ ދަށުން ގޯތި ލިބުމަށް ޝަރުތު ހަމަނުވި ނަމަވެސް އޭނާއަށް ގޯތި ދީފައިވާ ކަމަށް ދައްކާ ލިޔެކިޔުންތަކެއް އާންމުވި ފަހުންނެވެ.
އެއާއެކު ފުލުހުން މިއަދު ބުނީ ބިންވެރިޔާ ސްކީމާ ގުޅޭގޮތުން ތަހުގީގުކުރަމުން އަންނަ މައްސަލައަކާ ގުޅިގެން ފަޒީލްގެ ފޯނު ކޯޓު އަމުރެއްގެ ދަށުން މިއަދު ހިފަހައްޓައިފައިވާ ކަމަށެވެ.
އެމްޑަބްލިޔުއެސްސީން މީގެ ކުރިން ބުނީ ފަޒީލް ސަސްޕެންޑުކުރީ އެޗްޑީސީއާ ގުޅޭ ގޮތުން ފުލުހުން ކުރިއަށްގެންދާ ތަހުގީގަށް ޖާގަދީ، އެހީތެރިކަން ދިނުމުގެ ގޮތުން ކަމަށެވެ.
މިދިޔަ އަހަރުގެ އޮގަސްޓު މަހު ނެރެފައިވާ ބިންވެރިޔާ ސްކީމްގެ ފައިނަލް ލިސްޓުގައި ފަޒީލްގެ ނަން އޮތެވެ. ނަމަވެސް އޭނާއަށް އޮތީ ޝަރުތު ހަމަނުވާ ކަމަށެވެ. އޭގެ ސަބަބެއްގެ ގޮތުގައި ބަޔާންކޮށްފައިވަނީ ސަރުކާރުން ހިންގައިފައިވާ އަސާސީ ބޯހިޔާވަހިކަމުގެ ސްކީމަކުން އޭނާއަށް ކުރިން ގޯއްޗެއް ލިބިފައި އޮތުމެވެ.
ފަޒީލްއަށް ލިބިފައިވާ ގޯއްޗާ ގުޅޭ ލިޔެކިޔުންތަކެއް އިތުބާރު ހުރި މަސްދަރަކުން "ސަން"އަށް ވެސް ލިބިފައިވެއެވެ. އޭގެ ތެރޭގައި، ފަޒީލަށް ދީފައިވާ ގޯތި އެހެން މީހަކަށް ވެސް ލިބިފައިވާ ކަމަށް އެޗްޑީސީއަށް ފާހަގަވުމުން، އެ ކުންފުނިން މިދިޔަ ޖުލައި މަހު ހައުސިން މިނިސްޓްރީ މެދުވެރިކޮށް މައުލޫމާތު ސާފުކުރަން ފޮނުވައިފައިވާ ސިޓީއެއް ހިމެނެއެވެ.
އެ ސިޓީގެ ޖަވާބުގައި ހައުސިން މިނިސްޓްރީން ފޮނުވައިފައިވާ ސިޓީއެއްގައި ވަނީ ފަޒީލަށް ދޫކުރި ކަމަށް ބަޔާންކޮށްފައިވާ ގޯއްޗަކީ މިނިސްޓްރީން އެހާތަނަށް އެއްވެސް ފަރާތަކާ ހަވާލުކޮށްފައިނުވާ ގޯއްޗެއް ކަމަށް ބުނެފައެވެ.
މި މައްސަލައިގައި ފުލުހުން އަންނަނީ ޖިނާއީ ތަހުގީގެއް ހިންގަމުންނެވެ.