ވެލާނާ އިންޓަނޭޝަނަލް އެއާޕޯޓުގައި މިއަދު ބަޔަކު މާރާމާރީއެއް ހިންގުމާ ގުޅިގެން ފުލުހުން ހަރަކާތްތެރިވާން ފަށައިފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ވަނީ އެއާޕޯޓުގައި ހިނގި ހަމަނުޖެހުމެއްގެ ރިޕޯޓު 15:15ހާއިރު ލިބިފައިވާ ކަމަށާއި ފުލުހުން އެ ސަރަހައްދުގައި ހަރަކާތްތެރިވަމުން އަންނަ ކަމަށެވެ.
އެ މައްސަލައާ ގުޅޭ އިތުރު ތަފުސީލެއް ފުލުހުން ހާމައެއްނުކުރެއެވެ.
އެއާޕޯޓުގައި ޒުވާން ބަޔެއްގެ މެދުގައި ތަޅާފޮޅުމެއް ހިންގާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވެފައިވެއެވެ. އެ ވީޑިއޯއިން، އެ ހަމަނުޖެހުން ހުއްޓުވަން ބަޔަކު މަސައްކަތް ކުރާ މަންޒަރު ވެސް ފެނެއެވެ. އޭގެ ތެރޭގައި އެއާޕޯޓުގެ މުވައްޒަފުން ވެސް ހިމެނެއެވެ.
އެ ވީޑިއޯ ހިއްސާކުރަމުން ބުނެފައި ވަނީ މާރާމާރީ ހިނގައިފައިވަނީ ބިދޭސީންތަކެއްގެ މެދުގައި ކަމަށެވެ. ނަމަވެސް އެކަން ފުލުހުން މިހާތަނަށް ކަށަވަރުކޮށްދީފައިނުވެއެވެ.
މީގެ ކުރިން ވެސް އެއާޕޯޓުގައި މާރާމާރީ ހިންގި މައްސަލައެއްގައި މީހަކު ހައްޔަރުކޮށްފައިވެއެވެ.