މިއަދު، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު'ގެ ނަމުގައި ރައްޔިތުންގެ މަޖިލީހަށް ހުށަހެޅި ބިލަކީ ޚިޔާލު ފާޅުކުރުމާއި ނޫސްވެރިކަމުގެ މިނިވަންކަން އޮބަހައްޓައި ތަޅު އެޅުވޭ ގޮތަށް ހުށަހެޅި ބިލެއްކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މި ބިލުގައި ވަނީ މޯލްޑިވްސް ބްރޮޑްކާސްޓިން ކޮމިޝަން (އެމްބީސީ) އާއި މޯލްޑިވްސް މީޑިއާ ކައުންސިލް (އެމްއެމްސީ) އެއްކޮށްލައި އާ ކޮމިޝަނެއް އުފައްދައި، ވަކިވަކި ނޫސްވެރިން 10،000 ރުފިޔާއާ ހަމައަށް ޖޫރިމަނާކުރެވޭ ގޮތަށެވެ.
އެ ބިލު ހުށަހެޅުއްވީ އަމިއްލަ ގޮތުން ވާދަކުރައްވައިގެން އިންތިޚާބުވި ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.
މި ބިލާ ގުޅިގެން ޝާހިދު އެކްސްގައި ކުރި ޕޯސްޓެއްގައި ވަނީ ދަލާއި ލޭ އޮހޮރުވައިގެން ހޯދި ޚިޔާލު ފާޅުކުރުމާއި ނޫސްވެރިކަމުގެ މިނިވަންކަން އޮބަހައްޓައި ތަޅު އެޅުވޭ ގޮތަށް ސަރުކާރުގެ ފަރާތުން މަޖިލީހަށް ބިލެއް ހުށަހެޅުމަކީ އިންތިހާއަށް ކަންބޮޑުވާ ކަމެއް ކަމަށެވެ.
އެފަދަ ބިލެއް ހުށަހެޅުމުގެ ބޭނުމަކީ، ވެރިންގެ ނާގާބިލުކަމާއި ފަސާދައިގެ އަމަލުތައް ފަރުދާކުރުން ކަމަށް ޝާހިދު ލިޔުއްވާފައި ވެއެވެ.
"ކޮންމެ ދުވަހެއްގައި ވެސް ފެނިގެން މިދަނީ ހުދުމުހްތާރުކަމުގެ ސިފަ،" އެ ޕޯސްޓުގައި ވެއެވެ.
ސަރުކާރުން މަޖިލީހަށް ހުށަހަޅާ ގިނަ ބިލުތަކަކާ ގުޅޭގޮތުން އެމްޑީޕީން ދަނީ ކަންބޮޑުވުން ފާޅުކުރަމުންނެވެ.
މިއަދު ހުށަހެޅި ބިލުގައި ވާގޮތުން ނަމަ، މި ގާނޫނަށް އަމަލުކުރަން ފަށާ ހިސާބުން ރައީސުލްޖުމްހޫރިއްޔާ، 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން' އުފައްދަވާނެއެވެ.
މި ކޮމިޝަން ވެގެންދާނީ އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ބާރު ލިބިފައިވާ، އަދި އަމިއްލަ ނަމުގައި މުއާމަލާތް ކުރުމުގެ ހައިސިއްޔަތު ލިބިފައިވާ މިނިވަން ގާނޫނީ ޝަޚުސަކަށެވެ.
ހަމައެއާއެކު މި ގާނޫނަށް އަމަލުކުރަން ފަށާ ހިސާބުން ނޫސް މަޖައްލާ ފަދަ ތަކެތީގެ ގާނޫނާއި މޯލްޑިވްސް މީޑިއާ ކައުންސިލްގެ ގާނޫނު އުވިގެންދާނެއެވެ.