ރައްޔިތުންގެ މަޖިލީހުގެ މެންބަރުން ސިޔާސީ ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް އިއްޔެ ގެނައި އިސްލާހުތަކާއެކު ފެންނަނީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުށުތެރެއަށް މަޖިލީހުގެ ރައީސް އަބްދުއްރަހީމް އަބްދުﷲ ލައްވާ މުޅިން ކޮންޓްރޯލް ކުރައްވާތަން ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
އެ އިސްލާހުތަކާ ގުޅިގެން ކަންބޮޑުވުން ފާޅުކުރައްވާ އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝާހިދު ވިދާޅުވީ، އިއްޔެ ފާސްކުރި އިސްލާހުތަކަކީ އެއްވެސް ޑިމޮކްރެޓިކް ހަމައަކުން ކަންކުރެވިގެންވާނެ ގޮތެއް ނޫން ކަމަށެވެ.
"އިއްތިފާގުން އިއްޔެ އެ އިސްލާހުތައް ގެނައި ވަގުތަށްވީ އިއްޔެގެ އިރުއޮއްސި، މަޣުރިބު ނަމާދަށް ގޮވި ވަގުތު. އަޅުގަނޑަށް ސިފަކުރެވުނީ އޮއްސިގެން އެ ދިޔައީ ހަމައެކަނި އިއްޔެގެ އިރެއް ނޫނޭ. ރާއްޖޭގެ ޑިމޮކްރަސީގެ އިރު ވެސް އެ އޮއްސިގެން ދިޔައްޔޭ. އެ ރަމްޒުވެގެން އިއްޔެ އެ ދިޔައީ،" ޝާހިދު ވިދާޅުވިއެވެ.
ޝާހިދު ވިދާޅުވީ ރައީސް މުއިއްޒު، އިއްޔެ ރައްޔިތުންނަށް ދެއްވަން ބޭނުންފުޅުވި މެސެޖަކީ، ރާއްޖޭގައި ކޮންމެ ކަމެއް، ހިތުހުރި ކޮންމެ ވަގުތެއްގައި، ހިތުހުރި ގޮތަކަށް ތިމަން މަނިކުފާނު ކުރައްވާނެ ކަމެވެ. އެގޮތުން މިހާރު ގެނައި ބަދަލާއެކު ރައްޔިތުންގެ މަޖިލީހުން، މަޖިލިސް މެދުވެރިކޮށް ރައީސުލްޖުމްޙޫރިއްޔާ ބޭނުންވެއްޖެނަމަ ރާއްޖޭގެ އަނެއް ދެބާރުގެ ވެރިކަން ބަދަލުކޮށްލުމުގެ ފުރިހަމަ ޔަގީންކަން އިއްޔެ އެ ނެންގެވީ ކަމަށް ޝާހިދު ވިދާޅުވިއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުގައި އެ ޕާޓީގެ ރައީސް އަބްދުﷲ ޝާހިދު ވާހަކަދައްކަވަނީ -- ފޮޓޯ/ އެމްޑީޕީ
"މިއަދުގެ ރައްޔިތުން މަޖިލީހުގެ ރައީސް ކަންކުރައްވަމުން ގެންދަވަނީ ޕާޓީއަށް ގަބޫލުކުރެވޭ ގޮތަކަށް ނޫނޭ ވިދާޅުވެ، ޕާޓީން މަޖިލީހުގެ ރައީސް ވަކިކުރައްވައިފި ހާލަތުގައި، ރައްޔިތުންގެ މަޖިލީހުގެ ރައީސްކަމުން އަދި މަޖިލީހުގެ މެންބަރުކަމުން މަޖިލީހުގެ ރައީސް އޮނަރަބަލް އަބްދުއްރަހީމް ވަކިވެގެންދާނެ،" ޝާހިދު ވިދާޅުވިއެވެ.
"...އިތުރަކަށް އެއްވެސް ސުވާލެއް މަޖިލީހުގެ ރައީސް އަބްދުއްރަހީމް ކުރެއްވުމުގެ ޖާގައެއް މަސައްކަތެއް ކުރެއްވުމުގެ ފުރުސަތެއް ވެސް ނޯންނާނެ. އެހެންވީމަ މިހާރު އެ ފެނިގެންދަނީ ރައްޔިތުންގެ މަޖިލީހުގެ ރައީސް، ރައީސުލްޖުމްޙޫރިއްޔާގެ މުށުގެ ތެރެއަށް ލައްވާ މުޅިން ކޮންޓްރޯލް ކުރެއްވިތަން،" ޝާހިދު އިތުރަށް ވިދާޅުވިއެވެ.
ހަމައެއާއެކު ޝާހިދު ވިދާޅުވީ އުއްތަމަ ފަނޑިޔާރާއި ނުވަތަ އެހެން ފަނޑިޔާރުންގެ މައްސަލައެއް ވިޔަސް މަޖިލީހަށް ހުށަހެޅޭ ހިސާބުން، ޕާޓީގެ ވިޕް ލައިނާ ޚިލާފުވެއްޖެ ނަމަ އެ މެންބަރަކު ޕާޓީން ވަކިކުރުމުގެ އިންޒާރު އިއްޔެގެ ގާނޫނުއަސާސީއަށް ގެނައި ބަދަލުން ދެވޭނެ ކަމަށެވެ.
"އެހެންވީމަ ސުޕްރިމް ކޯޓު މިހާރު އެއޮތީ ރައީސުލްޖުމްޙޫރިއްޔާގެ ފުރިހަމަ ކޮންޓްރޯލްގެ ދަށުގަ. މިއީކީ ޑިމޮކްރަސީއެއް ނޫން،" ޝާހިދު ވިދާޅުވިއެވެ.
އިއްޔެ ސަރުކާރުން ވަނީ މައިގަނޑު ތިން ކަމެއް ގާނޫނުއަސާސީގައި ހިމަނަން ހުށަހަޅާފައެވެ. އެއީ؛
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
- ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
- ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
އަވަސް އަރުވާލައިގެން ގާނޫނުއަސާސީ އިސްލާހުކުރާ ކަމަށް ބުނެ، އެމްޑީޕީން ވަނީ މި ބިލުގެ މަސައްކަތް ކުރިޔަށް ގެންދިޔަނުދިނުމަށްޓަކައި އިއްޔެ ހަވީރު އޮތް ޖަލްސާގައި ތަޅުމުގައި އަޑުގަދަކޮށް މަސައްކަތަށް ހުރަސް އެޅުމަށް ވެސް މަސައްކަތް ކޮށްފައެވެ.
މި މައްސަލައިގައި އިއްޔެ އެމްޑީޕީން ވަނީ މަޖިލިސް އިދާރާ ސަރަހައްދުގައި އިހުތިޖާޖު ވެސް ކޮށްފައެވެ.