ވަކި ދާއިރާއަކުން ޚިދުމަތް ކުރަން ރައްޔިތުންނަށް މަޖުބޫރު ކުުރުމަކީ ޑިމޮކްރެޓިކް ނިޒާމާ ބީރައްޓެހި ކަމެއް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ، ކިޔެވުމުގެ ފުރުސަތު ނެތް، ނުވަތަ ވަޒީފާއެއް ނެތް ކޮންމެ ޒުވާނަކު ސަލާމަތީ ބާރުތަކުގެ ތަމްރީނުތަކުގައި ބައިވެރިކުރުވާ ގޮތަށް، ނެޝަނަލް ސާވިސް ޕްރޮގްރާމެއް ފަށަން ނިންމަވައިފާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެފައި ވަނިކޮށެވެ.
އެ ޕްރޮގްރާމަކީ ގާނޫނުގެ ތެރެއިން ބާރު ލިބިގެން ހިންގޭނެ ޕްރޮގްރާމަކަށް ވާނެ ކަމަށް ވެސް އެމަނިކުފާނު ވިދާޅުވިއެވެ. އޭގެ ނަތީޖާއަކަށް ވާނީ މަގުމަތީގައި ޒުވާނުން ބާކީވެ ތިބުމުގެ ބަދަލުގައި ގައުމަށް ފައިދާހުރި ދަރީންތަކެއް ތަރުބިއްޔަތުވުން ކަމުގައި ރައީސް ވިދާޅުވިއެވެ.
ސިފައިންތަކެއް: ޝާހިދު ވިދާޅުވީ ވަކި ދާއިރާއަކުން ޚިދުމަތް ކުރަން މަޖުބޫރު ކުރުމަކީ ޑިމޮކްރެޓިކް ނިޒާމާ ބީރައްޓެހި ކަމެއް ކަމަށް -- ސަން ފޮޓޯ/ މުޙައްމަދު ޝާތިއު
އެކަމާ ގުޅުވައި އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ސަލާމަތީ ޚިދުމަތްތައް ޒަމާނާ އެއްގޮތަށް ތަރައްގީކޮށް، ކުރިއަށް ގެންދެވޭނީ ޢިލްމީ ގާބިލު ޒުވާނުންނަށް ވެސް އެ ޚިދުމަތް ދޭން ފުރުސަތު ލިބިގެން ކަމަށެވެ.
އެގޮތުން، ޒުވާނުންގެ އުންމީދުތަކުގައި ހަގީގީ ކުލަ ޖެހޭނީ، އޯލެވެލްގައި ރަނގަޅު ނަތީޖާއެއް ހާސިލުނުވާ ދަރިވަރުންނަށް ވެސް ޝައުގުވެރިކަން ހުރި ދާއިރާއަކުން އިތުރު ތަމްރީނާއި ހުނަރުތައް ލިބޭނެ މަގު ފަހިކޮށްދީގެން ކަމަށް ޝާހިދު ވިދާޅުވެފައިވެއެވެ.
އިތުރަށް އޭނާ ވިދާޅުވީ، އެއްވެސް މަޖުބޫރު ކަމެއް ނެތި، ސަލާމަތީ ޚިދުމަތްތަކުން ވަޒީފާއަށް އެދޭ އެތައް ހާސް ޒުވާނުންނެއް މިހާރު ވެސް ރާއްޖޭގައި އެބަތިބި ކަމަށެވެ. އަދި، ވަކި ދާއިރާއަކުން ޚިދުމަތް ކުރަން މަޖުބޫރު ކުރުމަކީ ޑިމޮކްރެޓިކް ނިޒާމާއި ބީރައްޓެހި ގޮތެއް ކަން އޭނާ ވަނީ ފާހަގަކުރައްވާފައެވެ.
އޭގެއިތުރުން، ޝާހިދު ކުރެއްވި ޕޯސްޓުގައި ވަނީ އުފެއްދުންތެރި ޖީލެއް ބިނާކުރަން އޮތް ރަނގަޅު ގޮތަކީ ޒުވާނުންނަށް ހުނަރުތައް ތަރައްގީ ކުރުމަށް މަގުފަހި ކޮށްދިނުމާއި ވަސީލަތްތަކުގެ އިތުރުން ފުރުސަތުތައް އިތުރުކޮށްދީގެން ކަމަށެވެ.
ރައީސްގެ އެވާހަކަފުޅަށް އިޝާރާތް ކުރައްވައި، ރޭ މާލޭ ސީއެޗްއެސްއީ ރަސްމީކޮށް ހުޅުވަން ބޭއްވި ރަސްމިއްޔާތުގައި އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ، ބެލެނިވެރިން ބޭނުން ވަނީ ދަރިވަރުންނަށް ދަށް ނަތީޖާއެއް ލިބުނަސް އެ ދަރިވަރުން މަގުމަތި ނުވާނެ ގޮތަށް ސަރުކާރުން ފިޔަވަޅު އެޅުމަށް ކަމަށެވެ.
އެކަން މި ސަރުކާރުގެ ފުރަތަމަ އަހަރު ތެރޭ ހާސިލްވެފައިވާ ކަމަށް މިނިސްޓަރު ވިދާޅުވެފައި ވެއެވެ.