ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ދިރިއުޅުއްވާ ރަސްމީ ގެކޮޅު، މުރައިދޫގެއަށް ދައުލަތުން މަހެއްގެ މައްޗަށް ޖުމުލަ ޚަރަދުކުރަނީ 99،678 ރުފިޔާ ކަމަށާއި އެ ގޭގައި ތިއްބަވަނީ ހަތަރު މުވައްޒަފުންކަން މަޖިލީހުން ހާމަކޮށްފިއެވެ.
ތިން ބާރުގެ ވެރިންނަށް ދައުލަތުން ރަސްމީ ގެކޮޅު ހަމަޖައްސައިދެއެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން 'ސަން'އިން އެދުނު މައުލޫމާތުތައް ހާމަކޮށް މަޖިލީހުން އިއްޔެ ފޮނުވި ޖަވާބުގައި ބުނެފައިވަނީ، މުރައިދޫގެއަށް ޖުމުލަ ޚަރަދުގެ ގޮތުގައި މަހެއްގެ މައްޗަށް ޚަރަދުވަނީ 99،678 ރުފިޔާ ކަމަށެވެ.
އެކަމަކު، އެ ޚަރަދުވާ ގޮތުގެ ތަފުސީލުތައް މަޖިލީހުން ހިއްސާކޮށްފައެއް ނުވެއެވެ.
މަޖިލީހުން ހާމަކުރި މައުލޫމާތުގައި ވާގޮތުން މުރައިދޫގޭގައި ތިއްބަވަނީ ހަތަރު މުވައްޒަފުންނެވެ. އޭގެ ތެރޭގައި ހިމެނެނީ؛
- 39،380 ރުފިޔާގެ މުސާރައެއްގައި އެ ގޭގެ ޗީފް އޮފް ސްޓާފް ކަމަށް ޖުލައި މަހުގެ 27 ވަނަ ދުވަހު އައްޔަންކުރި ތަޖުރިބާކާރު ނޫސްވެރިޔާ އާދަމް ހަލީމް (މުންޑޫ)
- 25،612 ރުފިޔާގެ މުސާރައެއްގައި ހަމަ އެ ދުވަހު އެ ގޭގެ ޑިރެކްޓާ ޖެނެރަލްކަމަށް އައްޔަންކުރި ފުޓުބޯޅަ ލެޖެންޑު، ކުރީގެ ގައުމީ ޓީމުގެ ކެޕްޓަން އަލީ އަޝްފާގު (ދަގަނޑޭ)
- 16،925 ރުފިޔާގެ މުސާރައެއްގައި މެއިންޓެނަންސް އަދި ކަރަންޓުގެ ކަންކަން ބަލަހައްޓަން ނަގާފައި ސީނިއާ އިލެކްޓްރިކް އެންޑް މެއިންޓެނަންސް އޮފިސަރެއް
- 15،000 ރުފިޔާގެ މުސާރައެއްގައި ޖެނެރަލް ސާވިސް އޮފިސަރެއް
މުރައިދޫގެ -- ސަން ފޮޓޯ/ފަޔާޒް މޫސާ
މަޖިލީހުން ބުނި ގޮތުގައި ނޫސްވެރިޔާ އާދަމް ހަލީމް މުރައިދޫގޭގައި އަދާކުރައްވާ ޒިންމާއަކީ އެ ގެކޮޅުގެ ރަސްމީ އެންމެހައި ކަންކަން ވިލަރެސްކޮށް ބެލެހެއްޓުމެވެ. އަދި، އަޝްފާގު އަދާކުރައްވާ ޒިންމާއަކީ އާދަމް ހަލީމްގެ ޒިންމާތަކުގައި އެހީތެރިވުމެވެ.
ޖުލައި 31 ވަނަ ދުވަހު ޖެނެރަލް ސާވިސް އޮފިސަރެއް އައްޔަންކުރީ އެ ގޭގައި ދުވަހުން ދުވަހަށް ދޭންޖެހޭ ޚިދުމަތްތައް ދިނުމަށެވެ. ޗީފް އޮފް ސްޓާފް ފިޔަވާ އެހެން މުވައްޒަފުންނަށް ކަނޑައެޅިފައިވާ އުސޫލުން އިތުރު ގަޑީގެ އެލަވަންސް ވެސް ލިބޭނެ ކަމަށް މަޖިލީހުން ބުންޏެވެ.
ހަތަރު މުވައްޒަފުންގެ މުސާރައަށް ޖުމުލަ 96،917 ރުފިޔާ ޚަރަދުވެއެވެ. އެކަމަކު، އެ ގެކޮޅުގެ ހުރިހާ ކަމަކަށް މަހެއްގެ މައްޗަށް ޚަރަދުވަނީ މުސާރައިގެ އިތުރަށް 2،761 ރުފިޔާ ކަމަށް މަޖިލީހުން ވަނީ ބުނެފައެވެ.
މަޖިލީހުގެ ރައީސް އަބްދުއްރަޙީމް މުރައިދޫގެއަށް ބަދަލުވެވަޑައިގަތީ ޖުލައި މަހުގެ 29 ވަނަ ދުވަހުއެވެ.
މަޖިލީހުގެ ރައީސްކަން ކުރައްވާ ބޭފުޅުންނަށް ކުރިން ދައުލަތުން ރަސްމީ ގެކޮޅެއް ހަމަޖައްސައެއް ނުދެއެވެ. އެކަމަކު، ކުރީގެ ރައީސް މުހައްމަދު ނަޝީދު މަޖިލީހުގެ ރައީސަކަށް ހުންނަވަނިކޮށް އެ މަނިކުފާނަށް އަމާޒުކޮށް ބޮމުގެ ހަމަލާއެއް ދިނުމާ ގުޅިގެން މަޖިލީހުގެ ރައީސުންނަށް ވެސް ދައުލަތުން ރަސްމީ ގެކޮޅެއް ހަމަޖައްސައިދޭން ނިންމީއެވެ.