ޕާކިސްތާނުގެ ކުރީގެ ބޮޑު ވަޒީރު އިމްރާން ޚާނަށް އިހާނެތިކޮށް ހިތައިފިނަމަ މުޅި ގައުމު ހުއްޓުވާނެ ކަމަށް އިމްރާން ނިސްބަތްވެވަޑައިގަންނަވާ ޕާކިސްތާން ތަހްރީކް ޕާޓީ (ޕީޓީއައި)އިން ބުނެފިއެވެ.
ޚިޔާނާތުގެ ކުށް ސާބިތުވެ، މިދިޔަ އަހަރުގެ އޮގަސްޓް މަހުން ފެށިގެން އިމްރާން ހުންނަވަނީ ޖަލުގައެވެ.
ހުޅަނގު އުތުރުގެ ޚައިބަރު ޕަޚްތުންޚްވާ ޕްރޮވިންސްގެ ޗީފް މިނިސްޓަރު އަދި ޕީޓީއައިގެ އިސް ލީޑަރު އަލީ އަމީން ގަންޑާޕޫރު ވަނީ ހޯމަ ދުވަހު ފެޑެރަލް ސަރުކާރަށާއި ޕަންޖާބު ޕްރޮވިންސްގެ ސަރުކާރަށް އިންޒާރު ދީފައެވެ. އެ ދެ ސަރުކާރަކީ ވެސް ބޮޑުވަޒީރު ޝެހްބާޒް ޝަރީފްގެ ޕާކިސްތާން މުސްލިމް ލީގު - ނަވާޒް (ޕީއެމްއެލްއެން) ޕާޓީން ހިންގާ ދެ ސަރުކާރެވެ.
"އިމްރާނަށް ކާއެއްޗެއް ނުދޭ. އޭނާ ހުންނަވާ ގޮޅީގެ ކަރަންޓް ވަނީ ކަނޑާލާފައި. މީހުންނާ ބައްދަލުކުރުމުގެ ހުއްދައެއް ނެތް. އަޅުގަނޑު މިދެނީ އިންޒާރެއް. މިކަން ކުރިއަށްދާނަމަ އަޅުގަނޑުމެން މި ރާވަނީ ޕާކިސްތާން ބަންދުކޮށް މި ސަރުކާރުން ވައްޓާލަން." އެކްސްގައި އާންމުކުރި ވީޑިއޯ މެސެޖެއްގައި އޭނާ ވިދާޅުވިއެވެ.
ގަންޑާޕޫރުން މި ބަޔާން އާންމުކޮށްފައިވަނީ ޚާންގެ އަންހެން ކޮއްކޮ އަލީމާ އާއި އުޒްމާ ޚާން ހޯމަ އަދި އަންގާރަ ދުވަހު ޕަންޖާބުގެ ރަވަލްޕިންޑީގެ އަޑިއާލާ ޖަލުގައި ހުންނެވި އިމްރާނާ ބައްދަލުކުރި ދަނޑިވަޅެއްގައެވެ. އެމީހުން ފަހުން ވަނީ ބޭބެއާ މެދު ކަމާބެހޭ ފަރާތްތަކުން "ގޯސްކޮށް އަމަލު" ކުރާތީ ކަންބޮޑުވާ ކަމަށް ބުނެފައެވެ.
އޮކްޓޯބަރު 15ވަނަ ދުވަހު އިމްރާންގެ ކުރީގެ އަނބިމީހާ ޖެމީމާ ގޯލްޑްސްމިތް ވެސް ވަނީ ޖަލުގައި އިމްރާނަށް އިހާނެތިކޮށް ކަންތައްކުރާ ކަމަށް ތުހުމަތުކޮށް އެކްސްގައި ޕޯސްޓެއް ކޮށްފައެވެ.
ޖުލައި މަހު އދ. ގެ ހިއުމަން ރައިޓްސް ވޯކިން ގްރޫޕުން ނެރުނު ބަޔާނެއްގައި ވެސް ބުނީ އިމްރާން ޖަލަށްލާފައި ވަނީ ބައިނަލްއަގްވާމީ ގާނޫނުތަކާ ހިލާފަށް ކަމަށާއި އޭނާ ވަގުތުން ދޫކޮށްލަން ޖެހޭ ކަމަށެވެ.
ޕީޓީއައިގެ ލީޑަރު ސައިދު ޒުލްފީ ބުޚާރީ ބުދަ ދުވަހު އަލްޖަޒީރާއަށް ވިދާޅުވީ ކުރިއަށް އޮތް ދުވަސްތަކުގައި ޚައިބަރު ޕަޚްތުންޚްވާގެ ވެރިރަށް ޕެޝާވަރުގައި ބޮޑު މުޒާހަރާއެއް ފެށުމަށް ރާވާފައިވާ ކަމަށެވެ. މިއީ އިމްރާން ދޫކޮށްލާނެކަން ކަށަވަރު ކުރުމުގެ މަގުސަދުގައި ފަށާ މުޒާހަރާއަކަށް ވާނެ ކަމަށް ވެސް އޭނާ ވިދާޅުވިއެވެ.
ޕީޓީއައި އިން ކަންބޮޑުވުން ފާޅުކުރީ "ސަލާމަތީ ކަންބޮޑުވުންތަކެއް"ގެ ސަބަބުން އަޑިއަލާ ޖަލަށް ޒިޔާރަތްކުރުން މަނާކުރުމަށް އޮކްޓޯބަރު މަހުގެ ހަތަރުވަނަ ދުވަހު ސަރުކާރުން ނެރުނު އަމުރާ ގުޅިގެންނެވެ.
ޕީޓީއައި އިން މީގެ ކުރިން އޮކްޓޯބަރު 15ވަނަ ދުވަހުވެސް ވަނީ އިސްލާމްއާބާދުގައި ހުންނަ ޕާކިސްތާނުގެ ޕާލަމެންޓް އިމާރާތް ކައިރީގައި މުޒާހަރާ ކުރުމަށް ގޮވައިލާފައެވެ. ނަމަވެސް އެ މުޒާހަރާ ކެންސަލް ކުރީ ސަރުކާރުން މެޑިކަލް ޓީމެއް ފޮނުވައިގެން އިމްރާން ބެލުމުންނެވެ.
ޖެނުއަރީ މަހުން ފެށިގެން ޖަލުގައި ހުރި ޚާންގެ އަނބިކަނބަލުން ބުޝްރާ ބީބީ ކަފާލާތުގެ ދަށުން މިދިޔަ ހަފުތާގައި ވަނީ ދޫކޮށްލާފައެވެ. ބުޝްރާ ޖަލަށްލާފައި ވަނީ 2018އިން 2022އަށް އިމްރާންގެ ވެރިކަމުގައި އޭނާގެ ސަރުކާރަށް ލިބުނު ހަދިޔާތައް ގަވާއިދާ ހިލާފަށް ވިއްކުމާ ގުޅޭ މައްސަލައެއްގައެވެ.
ދެހާސް ބާވީސް ވަނަ އަހަރު ރައްޔިތުންގެ މަޖިލީހުގެ އިތުބާރު ނެތްކަމުގެ ވޯޓެއް ނަގައި އިމްރާން ވެރިކަމުން ދުރުކުރުމަށް ފަހު، ފިތުނަވެރިކަމާއި ޓެރަރިޒަމް ހިމެނޭ ގޮތަށް އެތައް މައްސަލައިގައި އޭނާގެ މައްޗަށް ދައުވާކޮށް ޖަލަށްލާފައި ވަނީ ޕާކިސްތާންގެ ކުރީގެ ބޮޑު ވަޒީރު ނަވާޒް ޝަރީފްގެ ވެރިކަމުގައެވެ. ކަފާލާތުގެ ދަށުން އިމްރާން މީގެކުރިން ދޫކޮށްލާފައިވާ ކަމަށާއި އެތައް މައްސަލައަކުން ބަރީއަވެފައިވާ ކަމަށްވެސް ޕީޓިއައި އިން ބުނެއެވެ.
ނަމަވެސް އޭނާ އަދިވެސް ޖަލުގައި ބަހައްޓާފައި ހުރީ ވެރިކަމަށް އެނބުރި އަތުވެދާނެތީ ކަމަށް ޕީޓީއައި އިން ބުނެއެވެ.