މިދިޔަ އަހަރަކީ ހަލަބޮލި އަހަރެކެވެ. މާލޭ މޭޔަރު އިންތިޚާބުކުރަން ބޭއްވި ބައި-އިލެކްޝަނާއި ރައްޔިތުންގެ މަޖިލީސް އިންތިޚާބާ އެކު ދެ އިންތިޚާބު ބޭއްވިއެވެ. އިގުތިސާދީ ގޮތުން ބޮޑެތި ގޮންޖެހުންތަކެއް ކުރިމަތިވިއެވެ. ޚާއްސަކޮށް މާލީ ދަތިކަން ބޮޑުވިއެވެ. އިޖުތިމާއީ މުހިންމު ފިޔަވަޅުތަކެއް އެޅިއެވެ.
އެޑިޓާސް ޓޯކް ޕޮޑްކާސްޓްގެ އަހަރުގެ ފުރަތަމަ އެޕިސޯޑުގައި އަލިއަޅުވާލީ އެ މައުޞޫއަށެވެ. މިދިޔަ އަހަރުގެ އުސްއަލިތަކަށެވެ.
ޕޮޑްކާސްޓްގައި ސިޔާސީ ދާއިރާއިން ހިނގި ބައެއް ކަންކަމަށް އަލިއަޅުއްވާލައްވައި ވާހަކަދައްކަވަމުން ސަންގެ މެނޭޖިން އެޑިޓަރު އަހުމަދު ސާއިލް އަލީ ވިދާޅުވީ، ޖެނުއަރީ މަހު ބޭއްވި ބައި-އިލެކްޝަންގައި ސަރުކާރަށް ކުރިމަތިވި ބޮޑު ނާކާމިޔާބާ އެކު އިދިކޮޅު އެމްޑީޕީއަށް ވަރަށް ބޮޑު އުންމީދެއް ލިބުނު ކަމަށެވެ. އެކަމަކު، މަޖިލީސް އިންތިޚާބުގައި ކަންތައްވީ އޭގެ އަނެއްކޮޅަށްކަން އޭނާ ފާހަގަކުރެއްވިއެވެ.
މަޖިލިސް އިންތިޚާބުގައި ސަރުކާރު ހިންގާ ޕީއެންސީން ވަނީ 93 ގޮނޑީގެ ތެރެއިން 72 ގޮނޑި ކާމިޔާބުކޮށްފައެވެ.
ސާއިލް ވިދާޅުވީ، އެ އިންތިޚާބުގައި ލިބުނު 12 ގޮނޑިއާ އެކު އެމްޑީޕީއަށް ބޮޑެތި ބަދަލުތަކެއް އަންނަންޖެހޭ ކަމުގެ އަޑު ގަދަވި ކަމަށެވެ. އެ ހުރިހާ ކަމެއް އެހެން ހުރުމާ އެކު، ޕީޕީއެމް/ޕީއެންސީގެ ލީޑަރުކަމުގައި ހުންނަވާފައި އަމިއްލަފުޅު ޕާޓީއެއް އުފެއްދެވި ކުރީގެ ރައީސް އަބްދުﷲ ޔާމީން ބާއްވަވާ ޖަލްސާތަކުގެ ވާހަކަ އޭނާ ފާހަގަކުރެއްވިއެވެ.
ތިން ޑެޕިއުޓީ މިނިސްޓަރަކު ދެއްކެވި ވާހަކައަކާ ގުޅިގެން ދެ ގައުމުގެ ގުޅުން އިންތިހާއަށް ގޯސްވި ވާހަކައަށް އަލިއަޅުވައިލާ ޕޮޑްކާސްޓްގައި ސަންގެ ޑެޕިއުޓީ މެނޭޖިން އެޑިޓަރު އަހުމަދު އިނާހް ވިދާޅުވީ، އެއީ ވަރަށް ވިޔާނުދާކޮށް، ވަރަށް ގޯސްކޮށް ހިނގާފައި އޮތް ކަމެއް ކަމަށެވެ.
އެންމެ ގާތް އަވައްޓެރި ގައުމުގެ ބޮޑުވަޒީރަށް ކުޑައިމީސްކުރުމުގެ ސަބަބުން ދެ ގައުމުގެ ގުޅުން ގޯސްވުމަކީ އާދައިގެ ނޫންކަން ފާހަގަކުރައްވައި އޭނާ ވަނީ ތިން ޑެޕިއުޓީ މިނިސްޓަރުންނަށް ފާޑުވިދާޅުވެފައެވެ.
އިގުތިސާދީ ދަތިތައް އަލިއަޅުވައިލާ އިނާހް ވިދާޅުވީ، ނިމުނު އަހަރަކީ އިގުތިސާދީ ގޮތުން ވެސް ދަތި އަހަރެއް ކަމަށެވެ. އެ ގޮތުން، އެންމެ ބޮޑު ދެ ކްރެޑިޓް ރޭޓިން އެޖެންސީން ރާއްޖޭގެ ރޭޓިން ދަށްކޮށް، މާލީ ބޮޑެތި ގޮންޖެހުންތަކެއް ހުރިކަން ފާހަގަކުރެއްވިއެވެ. އަދި، މި އަހަރަކީ ވެސް ބޮޑު ދަރަންޏެއް ދައްކަންޖެހޭ އަހަރެއްކަން އޭނާ ފާހަގަކުރެއްވިއެވެ.
އިގުތިސާދީ ދާއިރާއިން ފާހަގަކޮށްލެވޭ ކަންކަމުގެ ވާހަކަދައްކަވަމުން ސަންގެ މަލްޓިމީޑިއާ އެޑިޓަރު މުހައްމަދު ނާއިލް ހަފީޒް ވިދާޅުވީ، އަހަރު ނިމޭއިރުގައި އާންމު ރައްޔިތުން ހަނދާން ހުންނާނީ ޖީބަށް ކުރި އަސަރު ކަމަށެވެ.
ނާއިލް ވިދާޅުވީ، މާލީ ދަތިތަކުގެ ތެރެއިން އިތުރު ގޮންޖެހުންތަކެއް ވެސް ކުރިމަތިވެފައި އެބަހުރި ކަމަށެވެ. އެއް ކަމަކަށް، ތަކެތީގެ އަގު ބޮޑުވުމާއި ދަރަނި އިންތިހާއަށް ބޮޑުވަމުން އަންނަ އައުން ފާހަގަކޮށް އޭނާ ވިދާޅުވީ، އެ މައްސަލަތައް ހައްލުކުރަން މުހިންމު، އަދި އަވަސް ފިޔަވަޅުތަކެއް އަޅަންޖެހޭ ކަމަށެވެ.
އިޖުތިމާއީ ދާއިރާއިން ގިނަ ކަންތައްތަކެއް އިއުލާނުކޮށް، ކުރަން ފެށިކަން ފާހަގަކުރައްވައި އޭނާ ވިދާޅުވީ، މިދިޔަ އަހަރަކީ އިޖުތިމާއީ ގިނަ އިސްލާހީ ފިޔަވަޅުތަކެއް އެޅި އަހަރެއް ކަމަށެވެ. އޭގެ ތެރޭގައި، އާސަންދައަށް ގެނައި ބަދަލާއި ސަބްސިޑީތައް އިސްލާހުކުރުން އޭނާ ފާހަގަކުރެއްވިއެވެ.
މިދިޔަ އަހަރު ހިނގި މުހިންމު ކަންކަމާ ގުޅޭ ގޮތުން މި ނޫން ވެސް މުހިންމު އެތައް ވާހަކައެއް އެޑިޓާސް ޓޯކް ޕޮޑްކާސްޓްގައި ދައްކާފައިވެއެވެ. މުޅި ޕޮޑްކާސްޓް އައްސަވާލައްވާށެވެ.