މި އަހަރުގެ ޖެނުއަރީ މަހުގެ ތެރޭގައި, އިދިކޮޅު އެމްޑީޕީއާއި ޑިމޮކްރެޓްސް ގުޅިގެން ރައީސް ޑރ. މުޙައްމަދު މުއިއްޒު ވެރިކަމުން ދުރުކުރަން ރާވައި، އެކަމަށް އިންޑިއާއިން ފައިސާގެ އެހީ ހޯދަން މަސައްކަތް ކުރި ކަމަށް އެމެރިކާގެ ވޮޝިންޓަން ޕޯސްޓުން ރިޕޯޓުކޮށްފިއެވެ.
ވޮޝިންޓަން ޕޯސްޓުން ރިޕޯޓުކޮށްފައިވާ ގޮތުގައި އެ ރޭވުމާ ގުޅޭ ތަފުސީލު ހިމެނޭ ލިޔުމެއް އެ ނޫހަށް ވަނީ ލިބިފައެވެ. އެގޮތުން 'ޑިމޮކްރެޓިކް ރިނިއުވަލް އިނިޝިއޭޓިވް'ގެ ނަން ދީފައިވާ އެ ލިޔުމުގައި ވަނީ، އިދިކޮޅު ފަރާތްތަކުން މަޖިލީހުގެ 40 މެންބަރަކަށް ރިޝްވަތު ދީގެން ރައީސްގެ އިތުބާރު ނެތް ކަމަށް ފާސްކުރަން ރޭވުން ކަމަށް އެ ނޫހުގައިވެއެވެ.
މަޖިލިސް މެންބަރުންގެ އިތުރުން ސިފައިންނާއި ފުލުހުންގެ އިސް 10 އޮފިސަރަކަށާއި ތިން ގޭންގަކަށް ވެސް ފައިސާ ދިނުމަށް އެ ރޭވުމުގައިވާ ކަމަށް ވޮޝިންޓަން ޕޯސްޓުގެ ރިޕޯޓުގައިވެއެވެ.
ދިވެހި ދެ މަސްދަރަކާ ހަވާލާދީ އެ ނޫހުގައިވަނީ، އެ ރޭވުމުގެ ބައިވެރިން ބޭނުންވީ އެ މަސައްކަތަށް ބޭނުންވި 87 މިލިއަން ރުފިޔާ (ހަ މިލިއަން ޑޮލަރު) އިންޑިއާއިން ހޯދުމަށެވެ.
ވޮޝިންޓަން ޕޯސްޓުގައިވާ ގޮތުގައި އެ ރޭވުމުގައި ބައިވެެރިވީ އެމްޑީޕީއާއި ޑިމޮކްރެޓްސްގެ މަޖިލިސް މެންބަރުންނެވެ. ނަމަވެސް ރައީސްގެ އިތުބާރު ނެތް ކަމުގެ ވޯޓެއް ނަގަން މަސައްކަތްކޮށްފި ނަމަ ސުޕްރީމް ކޯޓުން ނުވަތަ އަސްކަރިއްޔާގައި ތިބި ރައީސް މުއިއްޒަށް ތާއިދުކުރާ ސިފައިން އެ ވޯޓު ހުއްޓުވުން އެކަށީގެންވާ ކަމުގެ ކަންބޮޑުވުން އެމްޑީޕީގެ ބައެއް ލީޑަރުން ފާޅުކުރި ކަމަށް އެ ރިޕޯޓުގައިވެއެވެ.
އިތުރަށް ދިމާވި މައްސަލައަކީ ފައިސާގެ މައްސަލަ ކަމަށާއި، އެގޮތުން ވޯޓު ދޭނީ ރިޝްވަތު ދިނުމުން ކަމަށް ގިނަ އަދަދެއްގެ މެންބަރުން ބުނި ކަމަށް، އެ ރޭވުމުގައި ބައިވެރިވި މީހަކާއި އިތުރު ހަތަރު އޮފިޝަލަކާ ހަވާލާދީ ވޮޝިންޓަން ޕޯސްޓުގައިވެއެވެ.
ފައިސާގެ މައްސަލަ ދިމާވުމުން އެމްޑީޕީގެ މެންބަރުންތަކެއް ހުށަހެޅީ އިންޑިއާއިން ފައިސާ ހޯދަން ކަމަށް އެ ނޫހުގައިވެއެވެ. އެގޮތުން ރައީސާ ދެކޮޅަށް ވޯޓެއް ނަގަން އޭރު މަޖިލީހުގެ އިދިކޮޅުގައި ތިއްބެވި މެންބަރުން އެއްބަސްވެއްޖެ ނަމަ، އިންޑިއާގެ ފައިސާގެ އެހީ ލިބޭނެ ކަމަށް، އޭރު މަޖިލީހުގެ އަޣުލަބިއްޔަތު އޮތް ހެންވޭރު ދެކުނު ދާއިރާގެ ކުރީގެ އެމްޑީޕީގެ މެންބަރު ހުސައިން ޝަހީމް (އަނދުން ހުސައިން) ވިދާޅުވި ކަމަށް އެ ރިޕޯޓުގައިވެއެވެ.
މީގެ އިތުރުން އޭރުގެ ކެނދިކުޅުދޫ ދާއިރާގެ މެންބަރު އަހުމަދު އީސަ، އެ ވޯޓަށް ފައިސާ ނުލިބުނު ނަމަވެސް މަޖިލިސް އިންތިޚާބަށް އިންޑިއާގެ ފައިސާގެ އެހީ ލިބޭނެ ކަމަށް ވިދާޅުވި ކަމަށް ވޮޝިންޓަން ޕޯސްޓުގައިވެއެވެ.
އެ ނޫހުން އަނދުން ހުސައިންއާ އެކަމާ ގުޅޭ ގޮތުން ސުވާލުކުރުމުން، ރައީސް އަޒުލުކުރަން ރޭވި ރޭވުމެއްގައި ބައިވެރިވި ކަމަށް ވިދާޅުވި ނަމަވެސް، ފައިސާ ހޯދަން މަސައްކަތް ކުރިތޯ ސުވާލުކުރުމުން އެކަމަށް ޖަވާބެއް ނުދިން ކަމަށް އެ ނޫހުގައިވެއެވެ. އަދި އިންތިޚާބަށް އިންޑިއާގެ ފައިސާ ހޯދަން ހުށަހެޅި ވާހަކަ އީސާ ދޮގު ކުރެއްވި ކަމަށް ވެސް އެ ނޫހުގައިވެއެވެ.
ރައީސްގެ އިތުބާރު ނެތް ކަމުގެ ވޯޓެއް ނަގަން އެތައް މަހެއް ވަންދެން ސިއްރު ބައްދަލުވުންތަކެއް ބޭއްވި ނަމަވެސް، ރައީސް މަގާމުން ދުރުކުރެވޭ ވަރަށް، އެކަމުގައި ބައިވެރިވި މެންބަރުންނަށް ތާއިދެއް ނުލިބުނު ކަމަށް ވޮޝިންޓަން ޕޯސްޓުގައިވެއެވެ. އަދި އިންޑިއާއިން ވެސް އެ ފައިސާ ނުދިން ކަމަށް އެ ނޫހުގައިވެއެވެ.
'އިންޑިއާ އައުޓް' ޝިއާރާއެކު ވެރިކަމަށް އައި މި ސަރުކާރު ފުރަތަމަ ވެސް ސިފަކޮށްފައިވަނީ އިންޑިއާއަށް ވުރެ ޗައިނާއާ ގާތް ސިޔާސަތެއް ގެންގުޅޭ ސަރުކާރެއްގެ ގޮތުގައި ކަމަށްވާއިރު، މިއަހަރުގެ ޖެނުއަރީ މަހުގެ ތެރޭގައި ނައިބު ވަޒީރުންތަކެއް އެގައުމަށް ކުޑައިމީސް ކުރުމާ ގުޅިގެން ދެގައުމުގެ ގުޅުން ވަރަށް ގޯސްވިއެވެ.
އެއަށްފަހު، ގުޅުން ރަނގަޅު ކުރަން ސަރުކާރުން އިންޑިއާއާއެކު ގިނަ މަސައްކަތްތަކެއް ކޮށް، ގުޅުން އާންމު ހާލަތަށް ރުޖޫއަވެފައިވާ ކަމަށް މި ސަރުކާރުން ބުނެފައިވެއެވެ.