ރައީސް ޑރ. މުޙައްމަދު މުއިއްޒު ރާއްޖޭން އިންޑިއާއާއި ސައުދީ އަރަބިއާއަށް ކަނޑައަޅުއްވާ ސަފީރުން މިއަދު އައްޔަންކުރައްވައިފިއެވެ.
އެގޮތުން، އިންޑިއާ ސަފީރަކަށް އައްޔަންކުރައްވާފައި ވަނީ އާއިޝަތު އަޒީމާއެވެ. ސައުދީ ސަފީރަކަށް އައްޔަންކުރެއްވީ އަޙުމަދު ސަރީރެވެ.
ރައީސް އޮފީހުގައި މިއަދު ބޭއްވި ރަސްމިއްޔާތެއްގައި އެބޭފުޅުންގެ ފަތްކޮޅު ހަވާލުކޮށްދެއްވީ ރައީސް ޑރ. މުޙައްމަދު މުއިއްޒެވެ.
އެމަގާމަށް އަޒީމާ އައްޔަން ކުރުމަށް މަޖިލީހުން ރުހުން ދީފައިވަނީ 79 މެންބަރުންގެ އިއްތިފާގުން ކަމަށްވާއިރު، ސަރީރު މަގާމަށް އައްޔަން ކުރަން ފާސްކޮށްފައި ވަނީ 86 މެންބަރުންގެ އިއްތިފާގުންނެވެ.
އަޒީމާއަކީ 1988ވަނަ އަހަރުން ފެށިގެން ފޮރިން މިނިސްޓްރީގައި މަސައްކަތް ކުރައްވަމުން ގެންދަވާ ޚާރިޖީ ދާއިރާގެ ތަޖުރިބާކާރެކެވެ. އޭނާގެ މީގެ ކުރިން ވަނީ ރާއްޖޭން ޗައިނާއަށް ކަނޑައަޅުއްވާފައި ހުންނަވާ ސަފީރުކަމުގެ އިތުރުން ޚާރިޖީ ދާއިރާގެ އެހެން އިސް މަގާމުތައް ވެސް ފުރުއްވައިފައެވެ.
މީގެއިތުރުން، ސަރީރު މީގެ ކުރިން ވަނީ ރާއްޖޭގެ ޚާރިޖީ ދާއިރާގެ އެކި މަގާމުތައް ފުރުއްވާފައެވެ. ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަގާމުތައް ވެސް އަދާކުރެއްވިއެވެ.
އެ ގޮތުން، ފޮރިން ސެކްރެޓަރީގެ މަގާމު އަދާކުރެއްވިއެވެ. އދ. އަށް ރާއްޖެއިން ކަނޑައަޅުއްވާފައި ހުންނަވާ ޕާމަނަންޓް ރެޕްރެޒެންޓޭޓިވްގެ މަގާމާއި އެމެރިކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމު ވެސް އަދާކުރެއްވިއެވެ. އަދި، 2000ވަނަ އަހަރުން ފެށިގެން 2003ވަނަ އަހަރާ ހަމައަށް ނޭޕާލްގެ ކަތުމަންޑޫގައި ހުންނަ ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން (ސާކް)ގެ ސެކްރެޓޭރިއޭޓްގެ ޑިރެކްޓަރުގެ ހައިސިއްޔަތުން ރާއްޖެ ތަމުސީލުކުރެއްވިއެވެ.