ދިވެހި ޑިފެންސް މިނިސްޓަރު މުހައްމަދު ޣައްސާން މައުމޫން އިންޑިއާއަށް ވަޑައިގަތުމުން އެ ގައުމުން ރަތްދޫލައިގެ މަރުހަބާއެއް ކިޔައިފިއެވެ.
އޭނާއަށް ނިއުދިއްލީން މަރުހަބާ ދެންނެވީ އިންޑިއާގެ ޑިފެންސް މިނިސްޓަރު ރަޖްނަތު ސިންގެވެ.
ދެ ބޭފުޅުން މިއަދު ވަނީ މަޝްވަރާ ބައްދަލުވުމެއް ބާއްވައިފައެވެ. އެ ބައްދަލުވުމުގައި ދެ ގައުމުގެ ދިފާއީ ގުޅުން އިތުރަށް ހަރުދަނާކޮށް، ގުޅުން ބަދަހިކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފައިވާ ކަމަށް އިންޑިއާގެ ނޫސްތަކުގައި ވަނީ ރިޕޯޓުކޮށްފައެވެ.
މި ދަތުރުގެ ތެރެއިން އެމްއެންޑީއެފް އިތުރަށް ހަރުދަނާކުރަން ބޭނުންވާ އާލަތްތައް ފޯރުކޮށްދޭން ވެސް ވަނީ ހަމަޖެހިފައެވެ.
ދެ ގައުމުގެ ޑިފެންސް މިނިސްޓަރުން ބޭއްވި ބައްދަލުވުމުގައި އިންޑިއާގެ މިނިސްޓަރު ރަޖްނަތު ވަނީ ރާއްޖެއަކީ އިންޑިއާގެ ނެއިބާހުޑް ފަސްޓް ޕޮލިސީގެ ދަށުން ޚާއްސަ މަގާމެއް ދީފައިވާ ގައުމެއްކަން ފާހަގަކުރައްވައިފައެވެ. ދިވެހީން ބޭނުންވާ ކަންކަމުގައި އިންޑިއާއިން އަބަދު ވެސް އެހީތެރިވާނެކަމުގެ ޔަގީންކަން އޭނާ ވަނީ ދެއްވައިފައެވެ.
ފާހަގަކޮށްލެވޭ ގޮތުގައި މިއީ ޑިފެންސް މިނިސްޓަރުގެ ހައިސިއްޔަތުން ޣައްސާން އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.
މިދިޔަ ހަފުތާގައި ފޮރިން މިނިސްޓަރު އަބްދުﷲ ޚަލީލް ވެސް ވަނީ ރަސްމީ ދަތުރުފުޅެއްގައި އިންޑިއާއަށް ވަޑައިގެންފައެވެ. އެ ދަތުރުފުޅުގައި ޚަލީލް ވެސް ވަނީ އިންޑިއާއަށް ތައުރީފުކުރައްވައި، ރާއްޖެއިން ކުރިއަށްދާން ބޭނުންވަނީ އިންޑިއާއާ އެކުގައި ކަމަށް ވިދާޅުވެފައެވެ.
މިދިޔަ ސަރުކާރުގެ ފަހުކޮޅު ޕީޕީއެމް/ޕީއެންސީން ހިންގި އިންޑިއާ އައުޓް ކެމްޕޭނަކީ ވެސް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ކެމްޕޭނެއް ކަމަށް ފޮރިން މިނިސްޓަރު ވިދާޅުވިއެވެ.
ފާހަގަކޮށްލެވޭ ގޮތުގައި މި ސަރުކާރުން ވެރިކަމަށް އައި ރާއްޖޭގައި ގާއިމުވެ ތިބި އިންޑިއާ ސިފައިން އަނބުރާ ގައުމަށް ފޮނުވާލުމުގެ ވައުދާ އެކުގައެވެ. އެ ވައުދާ އެއްގޮތަށް އިންޑިއާގެ ޑޯނިއާ މަތިންދާވޯޓާއި ހެލިކޮޕްޓަރުތައް ބަލަހައްޓަން މިހާރު ތިބެނީ 'މަދަނީ' މީހުން ކަމަށް ސަރުކާރުން ވަނީ ބުނެފައެވެ.