ރާއްޖެއިން އިންޑިއާއަށް ކަނޑައަޅުއްވާފައި ހުންނަވާ ސަފީރު އިބްރާހިމް ޝަހީބުގެ ދައުރު ހަމަވާން ކައިރިވެފައިވުމާ އެކު، އެ މަގާމަށް ދެން އައްޔަންކުރާނެ ސަފީރެއްގެ ގޮތުގައި ރައީސް ޑރ. މުހައްމަދު މުއިއްޒު ހުށަހެޅުއްވި އާއިޝަތު އަޒީމާއަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
އަޒީމާ އެ މަގާމަށް އައްޔަން ކުރުމާމެދު މަޖިލީހަށް ފެންނަ ގޮތެއް ބެލުމަށް މިއަދު ތަޅުމުގައި ނެގި ވޯޓުގައި ބައިވެރިވި 79 މެންބަރުންގެ އިއްތިފާގުން ފާސްކޮށްފައިވަނީ އިންޑިއާއަށް ރާއްޖޭން ކަނޑައަޅާ ސަފީރަކަށް އޭނާ އައްޔަންކުރަން ފެންނަ ކަމަށެވެ.
ޕީއެންސީގެ އިތުރުން އިދިކޮޅު އެމްޑީޕީގެ މެންބަރުން ވެސް ވަނީ އަޒީމާއަކީ އެ މަގާމަށް ގާބިލު ބޭފުޅެއް ކަމަށް ވިދާޅުވެފައެވެ.
އަޒީމާއަކީ 1988 ވަނަ އަހަރުން ފެށިގެން ފޮރިން މިނިސްޓްރީގައި މަސައްކަތް ކުރައްވަމުން ގެންދަވާ ޚާރިޖީ ދާއިރާގެ ތަޖުރިބާކާރެކެވެ. އޭނާގެ މީގެ ކުރިން ވަނީ ރާއްޖޭން ޗައިނާއަށް ކަނޑައަޅުއްވާފައި ހުންނަވާ ސަފީރުކަމުގެ އިތުރުން ޚާރިޖީ ދާއިރާގެ އެހެން އިސް މަގާމުތައް ވެސް ފުރުއްވައިފައެވެ.
މިހާރު އިންޑިއާ ސަފީރުކަމުގެ މަގާމުގައި ހުންނެވި ޝަހީބު މަގާމަށް އައްޔަންކުރެއްވީ މިދިޔަ ސަރުކާރުގައި 2022ވަނަ އަހަރުގެ އޮކްޓޫބަރު 10ގައެވެ.
ރާއްޖޭން އިންޑިއާއަށް އާ ސަފީރަކު އައްޔަންކުރާއިރު ދެ ގައުމުގެ ގުޅުން މިހާރު ވަނީ ވަރަށް ބޮޑަށް ބަދަހިވެފައެވެ. ދާދި ފަހުން ރައީސް މުއިއްޒު އިންޑިއާއަށް ކުރެއްވި ރަސްމީ ދަތުރުފުޅާ އެކު އެ ގުޅުން އިތުރަށް ވަނީ ބަދަހިވެފައެވެ.