ވައިރަސް އަކުން ނޭވާލާ ނިޒާމަށްޖެހޭ ބައްޔެއް ކަމަށްވާ އެޗްއެމްޕީވީ ޖެހިފައިވާ އަށް މަހުގެ ފިރިހެން ކުއްޖަކާއި ތިން މަހުގެ އަންހެން ކުއްޖަކު އިންޑިއާގެ ބެންގަލޫރުގެ ބޭޕްޓިސްޓް ހޮސްޕިޓަލުން ފެނިއްޖެއެވެ.
އެ ކުދިންނަކީ އެ ގައުމުން ބޭރަށް ދަތުރުކޮށްފައިވާ ކުދިންނެއް ނޫން ކަމަށްވެސް އިންޑިއާ ޓުޑޭއިން ރިޕޯޓުކޮށްފައިވެއެވެ.
މި ކޭސްތައް ފެނިފައިވަނީ 2001 ވަނަ އަހަރު އެންމެ ފުރަތަމަ ފެނުނު ނޭވާލާ ނިޒާމުގެ ޖަރާސީމެއް ކަމަށްވާ ހިއުމަން މެޓަޕްނިއުމޯވައިރަސް (އެޗްއެމްޕީވީ) އާއި ގުޅުން ހުރި ވައިރަލް އިންފެކްޝަނެއް ޗައިނާގައި ފެތުރެމުންދާ ކަމަށް ރިޕޯޓްތައް ބުނާ ދަނޑިވަޅެއްގައެވެ.
އެކަމާ ގުޅިގެން އިންޑިއާ ސަރުކާރުން ބުނީ އެޗެއެމްޕީވީ އަކީ އާ ވައިރަހެއް ނޫން ކަމަށާއި ދުނިޔޭގެ އެހެން ގައުމުތަކުގައިވެސް އުޅޭ ވައިރަހެއް ކަމަށެވެ. އަދި ކަންބޮޑުވެ ހާސްނުވުމަށް ސަރުކާރުން ވަނީ އާންމުންނަށް އިލްތިމާސްކޮށްފައެވެ.
ބެންގަލޫރުން ފެނުނު ދެ ކޭސްގައި ވެސް ދެ ކުދިންނަށް ކުރިން ވަނީ ނިއުމޯނިއާގެ ވައްތަރެއް ކަމަށްވާ ބްރޮންކޯނިއުމޯނިއާޖެހިފައެވެ. ތިން މަހުގެ ކުއްޖާ މިހާރު ދޫކޮށްލާފައިވާއިރު، އަށް މަހުގެ ކުއްޖާ ޕޮޒިޓިވް ވެފައިވާ ވަނީ އާދީއްތަ ދުވަހުއެވެ. އެ ކުއްޖާގެ ހާލު މިހާރު ރަނގަޅު ވަމުން އަންނަ ކަމަށް ޑޮކްޓަރުންނާ ހަވާލާދީ އިންޑިއާ ނޫސްތަކުން ބުނެއެވެ.
ބްރޮންކޯޕްނިއުމޯނިއާ އަކީ ބްރޮންކިއަލް ނިއުމޯނިއާގެ ނަމުން ވެސް ނަންދެވިފައިވާ ނިއުމޯނިއާގެ ވައްތަރެކެވެ. މި ބަލީގެ އަލާމާތްތަކުގެ ތެރޭގައި ހުމުގެ އަސަރު ހުރުން، ކެއްސުން، ނޭވާ އަވަސްވެ ކުރުވުން، މާބޮޑަށް ދާހިއްލުން، ފިނިހޫނުމިން، ބޮލުގައި ރިހުން، މަސްތަކުގައި ރިހުން، ވަރުބަލިވުމާއި ކާހިތްނުވުން ހިމެނެއެވެ.
ބެންގަލޫރުގެ ޔޫނިއަން ހެލްތު މިނިސްޓްރީން ބުނާ ގޮތުގައި ބެންގަލޫރުން އެޗްއެމްޕީވީގެ ދެ ކޭސް ދެނެގަނެވުނީ މުޅި އިންޑިއާގައި ނޭވާލާ ނިޒާމުގެ ބަލިތައް މޮނިޓާ ކުރުމަށް އިންޑިއަން ކައުންސިލް އޮފް މެޑިކަލް ރިސާޗުން ކުރަމުންދާ މަސައްކަތުގެ ތެރެއިން ގިނަ އަދަދެއްގެ ނޭވާލާ ނިޒާމުގެ ވައިރަލް ޕެތޯޖަންސް އަށް ރޫޓިން ސަވައިލެންސް މެދުވެރިކޮށެވެ.
އެޗްއެމްޕީވީ ނުވަތަ ހިއުމަން މެޓަޕްނިއުމޯވައިރަސް އާންމުކޮށް ފެންނަނީ 11 އަހަރުން ދަށުގެ ކުޑަ ކުދިންގެ ކިބައިންނެވެ.
އެޗްއެމްޕީވީ އަކީ އާންމުކޮށް ރޯގާޖެހި، ހުން އައުމުން ފެންނަ ވައްތަރުގެ އަލާމާތްތައް ކަމަށްވާ ކެއްސުން، ނޭފަތް ބެދުން ނުވަތަ ކަރުތެރޭގައި ރިއްސުން ފަދަ އަލާމާތްތައް ފެންނަ ބައްޔެކެވެ. ނަމަވެސް ކުޑަކުދިންނާއި އުމުރުން ދުވަސްވީ މީހުންނާއި ދިފާއީ ނިޒާމު ބަލިކަށި މީހުންނަށް އެ ބަލި ޖެހިއްޖެނަމަ، ވައިރަސްގެ ސަބަބުން ނޭވާލާ ނިޒާމަށް ބޮޑެތި އުނދަގޫތަކެއް ކުރިމަތިވެ، އަވަސް ފަރުވާ ދޭން ޖެހެއެވެ.
ޔޫނިއަން ހެލްތު މިނިސްޓްރީން ބުނީ ނޭވާލާ ނިޒާމުގެ ބަލިތައް ވަރަށް ބޮޑަށް އިތުރުވަމުންދާ ޗައިނާގެ ހާލަތު މޮނިޓާ ކުރަމުންދާ ކަމަށެވެ.
ޗައިނާގައި އާދަޔާ ޚިލާފް ވައިރަސްއެއް ފެތުރެން ފަށައި ހޮސްޕިޓަލްތަކަށް ބާރު ބޮޑުވެފައިވާ ކަމަށް ބައެއް މީޑިއާތަކުން ރިޕޯޓު ކުރި ނަމަވެސް އެއީ ނުރައްކާ ހާލަތެއް ނޫން ކަމަށާއި އެއީ ކޮންމެ އަހަރެއްގެ ވެސް ފިނި މޫސުމުގައި ފެތުރޭ ރޯގާ ކަމަށް ޗައިނާއިން ވަނީ ބުނެފައެވެ.