ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ކޮށްފައިވާ ދައުވާތަކާ ގުޅޭ ގޮތުން، ޝަކުވާ ހުށަހެޅުމަށް ހުޅުވާލި މުއްދަތުގައި 500 އަށްވުރެ ގިނަ ޝަކުވާ ހުށަހަޅާފައިވާ ކަމަށް އޮފީހުން މިއަދު ބުނެފިއެވެ.
މިހާރު ޕީޖީގެ މަގާމުގައި ހުންނެވި އައްބާސް ޝަރީފް، އެ އޮފީހާ ހަވާލުވެވަޑައިގަތުމަށް ފަހު ވަނީ ޝަކުވާ ހުށަހެޅުމަށް 20 ދުވަހުގެ މުހުލަތެއް ދެއްވައިފައެވެ. އެ މުއްދަތު މި މަހުގެ 20 ވަނަ ދުވަހަށް ވަނީ ހަމަވެފައެވެ.
ޕީޖީއަށް ޝަކުވާ ހުށަހެޅުމަށް ހުޅުވާލީ، މައްސަލަތަކުގެ ދަޢުވާތަކާއި ބަންދުކޮށްފައި ތިބި މީހުންގެ ބަންދު މުރާޖައާ ކުރުމާ މެދު ޝަކުވާ ހުށަހެޅުން ހިމެނޭ ގޮތަށެވެ.
ޕީޖީ އައްބާސް: ޕީޖީގެ ކުރީގެ ނިންމުންތަކާ ގުޅިގެން އާންމުންގެ 500 އަށް ވުރެ ގިނަ ޝަކުވާ ހުށަހަޅައިފި -- ސަން ފޮޓޯ/ ނާއިޝް ނާހިދު
އެކަމާ ގުޅުވައި ޕީޖީ އޮފީހުގެ ތަރުޖަމާނު 'ސަން'އަށް ވިދާޅުވީ، އެކަމަށް ހުޅުވާލި ފުރުސަތުގައި 539 ޝަކުވާ ލިބިފައިވާ ކަމަށެވެ. މިގޮތުން، އެ ހުރިހާ މައްސަލަތަކެއް ރިވިއު ކުރަމުން އަންނަ ކަމަށާއި އޭގެފަހުން އެކަމުގައި ގޮތެއް ނިންމާނެ ކަމަށް އޮފިޝަލް ވިދާޅުވިއެވެ.
މިމަހުގެ އެއްވަނަ ދުވަހު އައްބާސް ބޭއްވި ނޫސްވެރިންގެ ބައްދަލުވުމުގައި ވިދާޅުވީ، އެ މައްސަލަތައް ބެލުމަށް ޕީޖީ ހިމެނޭހެން ޓީމެއް ނަގައިގެން މައްސަލަތައް ވަކިވަކިން ދިރާސާކޮށް، ގޮތްތަކެއް ނިންމާނެ ކަމަށެވެ.
އޭނާ ވިދާޅުވީ، އެއްވެސް މައްސަލައެއްގައި ކުރިން ޕީޖީ އޮފީހުން ނިންމާފައި އޮތް ނިންމުމެއް ބަދަލުކުރާނަމަ، އެކަން ކުރަން ޖެހުނު ސަބަބު ރައްޔިތުންނަށް ސާފުކޮށްދެއްވާނެ ކަމަށެވެ. އަދި، ނިންމުން ބަދަލުނުކުރާ ނަމަ، ޝަކުވާ ހުށަހެޅުއްވި ފަރާތަށް އެކަން އަންގާނެ ކަމަށް ވެސް އެނާ ވިދާޅުވިއެވެ. އެކަމަކު، އެއްވެސް މައްސަލައެއް އަމިއްލަ އިސްނެންގެވުމަށް ނުބައްލަވާނެ ކަމަށް ޕީޖީ ވިދާޅުވިއެވެ.
މިގޮތުން، ޝަކުވާ ހުށަހެޅުމަށް ހުޅުވާލި މުއްދަތުގެ ތެރޭގައި ޝަކުވާ ހުށަހަޅުއްވައިފި ނަމަ، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްސަލަތަކާއި ކުރީގެ ފަތުރުވެރިކަމާ ބެހޭ ވަޒީރު އަލީ ވަހީދަށް ކުރުމަށް ފަހު އަނބުރާ ގެންދިޔަ ދައުވާތަކާ ގުޅޭ ގޮތުން ވެސް ގޮތެއް ނިންމާނެ ކަމަށް އޭރު ޕީޖީ ވިދާޅުވެފައިވެއެވެ.