ފަލަސްތީނުގެ ރައްޔިތުންގެ ދިފާއުގައި މުޒާހަރާކުރަމުންދަނިކޮށް ހައްޔަރުކުރި އާއިޝަތު ޝާދިޔާއާއި ޑރ. ޝަޒްރާ އިބްރާހީމްގެ މައްޗަށް، ޕްރޮސެކިއުޓާ ޖެނެރަލް (ޕީޖީ)ން ދެ ދައުވާއެއް ކޮށްފިއެވެ.
އެ ދެ މީހުން ހައްޔަރުކުރީ އިސްރޭލުން ފަލަސްތީނުގައި ހިންގަމުންދާ ގަތުލުއާންމާ ދެކޮޅަށް އެމްބަސީތަކުގެ ކައިރީގައި އަޑުއުފުލަމުން ދަނިކޮށް އޮގަސްޓް މަހުގެ 28ވަނަ ދުވަހެވެ. އެ މައްސަލައިގައި ކްރިމިނަލް ކޯޓުން ނެރުނު އަމުރަކީ ގަވައިދާ ޚިލާފަށް ނެރުނު އަމުރެއްކަމަށް ކަނޑައަޅައި، އެ އަމުރު ހައިކޯޓުން ބާތިލް ކުރީ މިދިޔަ އޮކްޓޫބަރުމަހުގެ އަށްވަނަ ދުވަހުގައެވެ.
އެހެން ކަމުން އަލުން ދައުވާކުރުމުގެ މުއްދަތު ހަމަވުމުގެ ކުރިން، ޕީޖީން ވަނީ އެ ދެ މީހުންގެ މައްޗަށް ދައުވާކޮށްފައެވެ.
ޕީޖީ އޮފީހުން ބުނީ އެ ދެ މީހުންގެ މައްޗަށް ދައުވާކުރަނީ ސުލްހަވެރިކަމާއެކު އެއްވެއުޅުމުގެ ޤާނޫނާ ޚިލާފަށް ދިވެހިރާއްޖޭގައި ހުންނަ ބޭރުގެ އެކިއެކި ޑިޕްލޮމެޓިކް މިޝަންތައް ކައިރިއަށް ގޮސް އަޑުގަދަކުރާ ބޭނުންކޮށް ހަޅޭއްލަވައި ހަޑިހުތުރުބަހުން މުއާމަލާތްކޮށްފައިވާތީއާއި، ޑިޕްލޮމެޓިކް މިޝަންތަކަށް އަދި ޑިޕްލޮމޭޓުންނަށް ދަތިވާގޮތަށް އަމަލުކޮށްފައިވާތީ ކަމަށެވެ. އަދި މިދިޔަ އޮގަސްޓް 27ވަނަ ދުވަހުގެ 13:00 ހާއިރު، އޮސްޓްރޭލިއަން ހައިކޮމިޝަނާއި ޔުނައިޓެޑް އަރަބި އެމިރޭޓްސްގެ އެމްބަސީ ކައިރިއަށް ގޮސް، އަޑުގަދަކުރާ ބޭނުންކޮށް ހަޅޭއްލަވައި، ޑިޕްލޮމެޓިކް މިޝަންތަކަށް ދަތިވާގޮތަށް އަމަލުކުރި ކަމަށެވެ. އަދި އެ ސަރަހައްދުން ސުލްހަވެރިކަމާ އެކު ދިއުމަށް ފުލުހުންގެ ފަރާތުން އެންގުމުން އެ ސަރަހައްދުން ނުދާނެކަމަށްބުނެ ފުލުހުންގެ ދައުރު އަދާކުރުމަށް އެ ދެ މީހުން ވެސް ހުރަސް އެޅި ކަމަށް ޕީޖީން ބުނެފައިވެއެވެ.
މި މައްސަލައިގައި އެ ދެ މީހުންގެ މައްޗަށް ކުރަނީ ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ކުށުގެ ދައުވާގެ އިތުރުން، އާންމު ތަނެއްގައި ހުރި މީހަކު، އެ މީހެއްގެ ޢަމަލުތަކުގެ ސަބަބުން އެހެން މީހަކަށް ގޯނާވާނެކަން، ނުވަތަ އުނދަގޫވާނެކަން، ނުވަތަ ބިރު ހީވާނެކަން އެނގިހުރެ، އެކަށީގެން ނުވާ ވަރަށް އަޑުގަދަކުރުމުގެ ކުށުގެ ދައުވާއެވެ.
ދައުލަތުގެ މަސައްކަތްތަކަށް ހުރަސް އެޅުމުގެ ކުށުގެ އަސާސީ އަދަބަކީ ހަތަރު މަހާއި 24 ދުވަހަށް ޖަލަށްލުމެވެ. އަދި އާންމު ތަނެއްގައި މީހުންނަށް އުނދަގޫވާ ގޮތަށް އަދި ބިރުހީވާ ގޮތަށް އަޑުގަދަކޮށް ހެދުމުގެ އަސާސީ އަދަބަކީ އެއް މަހާއި ހަ ދުވަހުގެ ޖަލު އަދަބެކެވެ.
މި ދެ ދައުވާ ސާބިތުވެއްޖެނަމަ، އެ ދެ މީހުންގެ މައްޗަށް ވެސް ހަ މަސްދުވަހުގެ ޖަލު އަދަބެއް އަތުވެދާނެއެވެ.