ޕްރޮސެކިއުޓާ ޖެނެރަލް (ޕީޖީ)ގެ އޮފީހާ ގުޅޭ ގޮތުންނާއި ކޮށްފައިވާ ދައުވާތަކާ ގުޅޭ ގޮތުން އާންމުންގެ ޝަކުވާއަށް މިއަދު ހުޅުވާލައިފިއެވެ.
ކުރީގެ ޕީޖީ ހުސައިން ޝަމީމަށް ބޮޑެތި ތުހުމަތުތަކެއް ކުރުމަށް ފަހު، މަޖިލީހުން އޭނާ ޕީޖީކަމުން ވަކިކުރީ މިދިޔަ އޮގަސްޓް 22 ގައެވެ. އެއަށް ފަހު، އެ މަގާމަށް ރައީސް އޮފީހުގެ ލީގަލް ސެކެޓްރީގެ މަގާމުގައި ހުންނެވި އައްބާސް ޝަރީފް އައްޔަންކުރީ މިދިޔަ މަހު 18 ގައެވެ.
ޕީޖީގެ ޒިންމާއާ ހަވާލުވެވަޑައިގަތުމަށް ފަހު ބޭއްވި ފުރަތަމަ ނޫސްވެރިންގެ ބައްދަލުވުމުގައި މިއަދު އައްބާސް ވިދާޅުވީ، މަގާމާ ހަވާލުވެވަޑައިގެން ފަހުން އެކިއެކި ގޮތްގޮތުން ވަރަށް ގިނަ ޝަކުވާތައް ލިބެމުން އަންނަ ކަމަށެވެ.
އެހެންވެ، ޕީޖީ އޮފީހާ ގުޅޭ ގޮތުން ރަސްމީކޮށް ޝަކުވާ ހުށަހަޅަން މިއަދުން ފެށިގެން ކުރިއަށް އޮތް 20 ދުވަހަށް ވަނީ ހުޅުވާލައިފައެވެ. ޕީޖީގެ ކޮންމެ އޮފީހަކަށް ގޮސް ވެސް، އަދި އެ އޮފީހުގެ ރަސްމީ ވެބްސައިޓު މެދުވެރިކޮށް ވެސް މިހާރު ޝަކުވާ ހުށަހެޅޭނެ ކަމަށް އޭނާ ވިދާޅުވިއެވެ.
"ޝަކުވާތައް އަޅުގަނޑުމެންނަށް ލިބުމާ އެކު މި އޮފީހުގައި އަޅުގަނޑު ވެސް ހިމެނިގެން ނަގާ ޓީމަކުން، ހުރިހާ މައްސަލަތައް ވަކިވަކިން ދިރާސާކޮށް، ބަލާފައި، އެ މައްސަލަތަކާ ބެހޭ ގޮތުން އަޅުގަނޑު ގޮތްތަކެއް ނިންމާނީ،" އައްބާސް ވިދާޅުވިއެވެ.
ޕީޖީ އައްބާސް: އޭނާ ވިދާޅުވީ އަމިއްލަ އިސްނެގުމަށް ކުރީގެ ޕީޖީގެ ނިންމެވުމެއް ބަދަލުނުކުރައްވާނެ ކަމަށް -- ސަން ފޮޓޯ/ ނާއިޝް ނާހިދު
ޕީޖީ ވަނީ މައްސަލަތަކާ ގުޅޭ ގޮތުން ޝަކުވާ ހުށަހަޅުއްވާއިރު، އެ މައްސަލައެއް ރިވިއުކުރަންވީ ސަބަބު ސާފުކޮށް ބަޔާންކުރަން އެދިލައްވާފައެވެ.
އޭނާ ވިދާޅުވީ، އެއްވެސް މައްސަލައެއްގައި ކުރިން ޕީޖީ އޮފީހުން ނިންމާފައި އޮތް ނިންމުމެއް ބަދަލުކުރާނަމަ، އެކަން ކުރަން ޖެހުނު ސަބަބު ރައްޔިތުންނަށް ސާފުކޮށްދެއްވާނެ ކަމަށެވެ. އަދި، ނިންމުން ބަދަލުނުކުރާ ނަމަ، ޝަކުވާ ހުށަހެޅުއްވި ފަރާތަށް އެކަން އަންގާނެ ކަމަށް ވެސް އެނާ ވިދާޅުވިއެވެ.
އެކަމަކު، އެއްވެސް މައްސަލައެއް އަމިއްލަ އިސްނެންގެވުމަށް ނުބައްލަވާނެ ކަމަށް ޕީޖީ ވިދާޅުވިއެވެ.
"އަޅުގަނޑުގެ ވިސްނުމެއް ނެތް އަޅުގަނޑު އަމިއްލައަށް އިސްނަގައިގެން ވަކި މައްސަލަތަކެއް ބަލާކަށް،" ކުރީގެ ޕީޖީ ނިންމެވި ނިންމެވުންތައް އަމިއްލަ އިސްނެންގެވުމުގައި ބަދަލުނުކުރައްވާނެކަމުގެ ޔަގީންކަން ދެއްވަމުން އައްބާސް ވިދާޅުވިއެވެ.
މި މުއްދަތުގެ ތެރޭގައި ޝަކުވާ ހުށަހަޅުއްވައިފި ނަމަ، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްސަލަތަކާއި ކުރީގެ ފަތުރުވެރިކަމާ ބެހޭ ވަޒީރު އަލީ ވަހީދަށް ކުރުމަށް ފަހު އަނބުރާ ގެންދިޔަ ދައުވާތަކާ ގުޅޭ ގޮތުން ވެސް ގޮތެއް ނިންމާނެ ކަމަށް އޭނާ ވިދާޅުވިއެވެ.
ޝަމީމާ ގުޅޭ ގިނަ ޝަކުވާތަކެއް ލިސްޓުކުރުމަށް ފަހު އޭނާ ވަކިކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީން ފާސްކޮށް، ތަޅުމުގައި އެ ކަމަށް ޖަލްސާ ފެށިތަނާ ޝަމީމް އިސްތިއުފާ ވެސް ދެއްވިއެވެ. އެކަމަކު، ރައީސް އޮފީހަށް އިސްތިއުފާގެ ސިޓީ ލިބިފައިނުވާ ކަމަށް ބުނެ، ތަޅުމުގައި ވޯޓު ނަގައި ޝަމީމް ވަކިކުރީއެވެ.