ކުރީގެ ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް މަގާމުން ވަކިކުރީ ބައެއް ނިންމުންތައް ގޯސްކަމަށް ރައްޔިތުންގެ މަޖިލީހަށް ފާހަގަކުރެވިގެން ކަމަށް ވިޔަސް، އަމިއްލަ އިސްނެންގެވުމުގައި އެ ނިންމުންތައް ބަދަލުކުރެެއްވުމުގެ ވިސްނުމެއް ނުގެންގުޅުއްވާ ކަމަށް ޕީޖީ އައްބާސް ޝަރީފް މިއަދު ވިދާޅުވެއްޖެއެވެ.
ކުރީގެ ޕީޖީ ހުސައިން ޝަމީމަށް ބޮޑެތި ތުހުމަތުތަކެއް ކުރުމަށް ފަހު، މަޖިލީހުން އޭނާ ޕީޖީކަމުން ވަކިކުރީ މިދިޔަ އޮގަސްޓް 22 ގައެވެ. އެއަށް ފަހު، އެ މަގާމަށް ރައީސް އޮފީހުގެ ލީގަލް ސެކެޓްރީގެ މަގާމުގައި ހުންނެވި އައްބާސް ޝަރީފް އައްޔަންކުރީ މިދިޔަ މަހު 18 ގައެވެ.
ޕީޖީގެ ޒިންމާއާ ހަވާލުވެވަޑައިގަތުމަށް ފަހު ބޭއްވި ފުރަތަމަ ނޫސްވެރިންގެ ބައްދަލުވުމުގައި މިއަދު އައްބާސް ވިދާޅުވީ، މަގާމާ ހަވާލުވެވަޑައިގެން ފަހުން އެކިއެކި ގޮތްގޮތުން ވަރަށް ގިނަ ޝަކުވާތައް ލިބެމުން އަންނަ ކަމަށެވެ.
އެހެންވެ، ޕީޖީ އޮފީހާ ގުޅޭ ގޮތުން ރަސްމީކޮށް ޝަކުވާ ހުށަހަޅަން މިއަދުން ފެށިގެން ކުރިއަށް އޮތް 20 ދުވަހަށް ވަނީ ހުޅުވާލައިފައެވެ. ޕީޖީގެ ކޮންމެ އޮފީހަކަށް ގޮސް ވެސް، އަދި އެ އޮފީހުގެ ރަސްމީ ވެބްސައިޓު މެދުވެރިކޮށް ވެސް މިހާރު ޝަކުވާ ހުށަހެޅޭނެ ކަމަށް އޭނާ ވިދާޅުވިއެވެ.
އެކަމަކު، އަމިއްލަ އިސްނެންގެވުމަށް އެ ފަދަ އެއްވެސް މައްސަލައެއް ބަލައި، ނިންމުމެއް ބަދަލުނުކުރައްވާނެ ކަމަށް އައްބާސް ވިދާޅުވިއެވެ.
"އަޅުގަނޑަށް އެނގޭ މިހެން ދަންނަވާއިރު ވެސް މަޖިލީހުގައި ބައެއް މައްސަލަތަކާ ބެހޭ ގޮތުން ވާހަކަދެއްކެވި. އެއީ، ކުރީގެ ޕީޖީ މަގާމުން ވަކިކުރަން އެ ބޭފުޅުން ނިންމެވި ރީޒަންކަން ވެސް. އެކަމަކު، އަޅުގަނޑުގެ ވިސްނުމެއް ނެތް އަމިއްލައަށް އިސްނަގައިގެން ރިވިއުކުރާކަށް," އޭނާ ވިދާޅުވިއެވެ.
ޕީޖީ އައްބާސް: އޭނާ ވިދާޅުވީ އަމިއްލަ އިސްނެގުމަށް ކުރީގެ އެއްވެސް ނިންމުމެއް ބަދަލުނުކުރާނެ ކަމަށް -- ސަން ފޮޓޯ/ ނާއިޝް ނާހިދު
އެކަމަކު، ޝަކުވާ ހުށަހަޅަން މިއަދު ހުޅުވައިލި 20 ދުވަހުގެ ފުރުސަތުގައި ހުށަހަޅުއްވާ ހުރިހާ މައްސަލައެއް ވެސް ބައްލަވާނެ ކަމަށް އޭނާ ވިދާޅުވިއެވެ.
އޭނާ ވިދާޅުވީ، އެއްވެސް މައްސަލައެއްގައި ކުރިން ޕީޖީ އޮފީހުން ނިންމާފައި އޮތް ނިންމުމެއް ބަދަލުކުރާނަމަ، އެކަން ކުރަން ޖެހުނު ސަބަބު ރައްޔިތުންނަށް ސާފުކޮށްދެއްވާނެ ކަމަށެވެ. އަދި، ނިންމުން ބަދަލުނުކުރާ ނަމަ، ޝަކުވާ ހުށަހެޅުއްވި ފަރާތަށް އެކަން އަންގާނެ ކަމަށް ވެސް އެނާ ވިދާޅުވިއެވެ.
ޝަމީމާ ގުޅޭ ގިނަ ޝަކުވާތަކެއް ލިސްޓުކުރުމަށް ފަހު އޭނާ ވަކިކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީން ފާސްކޮށް، ތަޅުމުގައި އެ ކަމަށް ޖަލްސާ ފެށިތަނާ ޝަމީމް އިސްތިއުފާ ވެސް ދެއްވިއެވެ. އެކަމަކު، ރައީސް އޮފީހަށް އިސްތިއުފާގެ ސިޓީ ލިބިފައިނުވާ ކަމަށް ބުނެ، ތަޅުމުގައި ވޯޓު ނަގައި ޝަމީމް ވަކިކުރީއެވެ.
ޝަމީމާ ގުޅޭ ގޮތުން ސަރުކާރު ހިންގާ ޕީއެންސީގެ މެންބަރުން މަޖިލީހުގެ ފާހަގަކުރެއްވި ކަންބޮޑުވުންތަކުގެ ތެރޭގައި ކުރީގެ ފަތުރުވެރިކަމާ ބެހޭ ވަޒީރު އަލީ ވަހީދުގެ މައްސަލަ ވެސް ހިމެނެއެވެ. ޕީޖީ ވަނީ ޝަކުވާ ހުށަހަޅުއްވައިފި ނަމަ، އެ މައްސަލަތައް ވެސް ބައްލަވާނެ ކަމަށް ވިދާޅުވެފައެވެ.