ރައްޔިތުންގެ މަޖިލީހަށް މިއަދު ސަރުކާރުގެ ފަރާތުން މާލީ ވަޒީރު 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހެޅި ނަމަވެސް މި އަހަރަށް ފާސްކުރި 49.8 ބިލިއަން ރުފިޔާގެ ބަޖެޓު އަދި އެއްކޮށް ހުސްނުވާ ކަމަށް މާލީ ވުޒާރާއިން ބުނެފިއެވެ.
ސަޕްލިމެންޓަރީ ބަޖެޓެއް ހުށަހަޅަނީ މި އަހަރަށް ބަޖެޓުކުރި އަދަދު އެއްކޮށް ހުސްވެގެން ކަމަށް ބައެއް އިދިކޮޅު ފަރާތްތަކުން ވަނީ ތުހުމަތުކޮށްފައެވެ.
މާލީ ވުޒާރާއިން ހިއްސާކޮށްފައިވާ ތަފާސްހިސާބުތަކުން އެނގޭ ގޮތުގައި މި އަހަރުގެ ބަޖެޓުން މިހާތަނަށް ޖުމުލަ ޚަރަދުކޮށްފައިވަނީ 37.4 ބިލިއަން ރުފިޔާއެވެ. އެއީ، ބަޖެޓުގެ 76 އިންސައްތައެވެ.
"މި އަހަރުގެ މިހާ ހިސާބުގައި ސަޕްލިމެންޓަރީ ބަޖެޓެއް މި ހުށަހަޅަނީ، މި އަހަރަށް ފާސްކޮށްފައިވާ 50 ބިލިއަން ރުފިޔާގެ ބަޖެޓު ޚަރަދުކޮށް ނިމުމުގެ ކުރިން، މާލިއްޔަތުގެ ގާނޫނުގައި ވާގޮތަށް ކުރިއަށް އޮތް މަސްތަކުގައި ހިނގާނެކަމަށް ލަފާކުރާ ޚަރަދުތައް ކުރިއާލާ ރައްޔިތުންގެ މަޖިލީހަށް ހުށަހެޅުމަށްޓަކައި," ބަޖެޓު ހުށަހަޅުއްވަމުން ވަޒީރު ޒަމީރު ވިދާޅުވިއެވެ.
އެ ވުޒާރާއިން މިއަދު މަޖިލީހަށް ހުށަހެޅުއްވީ ޖުމުލަ 5,119,508,129 ރުފިޔާގެ ބަޖެޓެކެވެ. އެހެންވެ، މި ބަޖެޓާ އެކު ޖުމުލަ މި އަހަރުގެ ބަޖެޓު 55 ބިލިއަން ރުފިޔާއަށް އަރާނެއެވެ.
މި ބަޖެޓުގައި ރިކަރަންޓު ޚަރަދުގެ ގޮތުގައި 1.5 ބިލިއަން ރުފިޔާ ހިމަނާފައިވެއެވެ. އެއީ:
- މުސާރައަށް 24.4 މިލިއަން ރުފިޔާ
- މެޑިކަލް ސަޕްލައިއަށް 200 މިލިއަން ރުފިޔާ
- ސަބްސިޑީއަށް އެއް ބިލިއަން ރުފިޔާ
- ބޭސް ފަރުވާގެ އެހީއަށް 262.6 މިލިއަން ރުފިޔާ
ބަޖެޓުގައި ކެޕިޓަލް ޚަރަދުގެ ގޮތުގައި 3.6 ބިލިއަން ރުފިޔާ ހިމަނާފައިވެއެވެ. އެއީ:
- ބިން ހިއްކުމާއި އިމާރާތްކުރުން އަދި އިންފްރާސްޓްރަކްޗާއަށް 2 ބިލިއަން ރުފިޔާ
- ކެޕިޓަލް ކޮންޓްރިބިއުޝަންގެ ގޮތުގައި 441 މިލިއަން ރުފިޔާ
- ކޮންޓިންޖެންސީގެ ގޮތުގައި 650 މިލިއަން ރުފިޔާ
- ސްޓޫޑެންޓް ލޯނު ދޫކުރަން 458.4 މިލިއަން ރުފިޔާ
"ޕީއެސްއައިޕީ ބަޖެޓު ކުރިއިރު ރިއަލިސްޓިކް ނޫން، ކުދި އަދަދުތައް މަޝްރޫއުތަކުން ޖަހާފައިހުރުމުން، މި މަޝްރޫއުތަކުގެ ޚަރަދުތައް ހަމަޖެއްސުމަށް ބޭނުންވާ 2 ބިލިއަން ރުފިޔާ ވެސް މި ސަޕްލިމެންޓަރީ ބަޖެޓުގައި ހިމެނޭ," ވަޒީރު ވިދާޅުވިއެވެ.
މި ސަޕްލިމެންޓަރީ ބަޖެޓުގައިވަނީ ޖުމުލަ އާމްދަނީއާއި ހިލޭ އެހީއަށް އިތުރަށް 640 މިލިއަން ރުފިޔާ ލިބޭނެ ކަމަށް އަންދާޒާކޮށްފައެވެ. އެއީ، ޓެކުހުގެ ގޮތުގައި ލިބޭ އާމްދަނީން އިތުރު 61 މިލިއަން އަދި އެހެނިހެން އާމްދަނީގެ ގޮތުގައި 379 މިލިއަނާއި ހިލޭ އެހީގެ ގޮތުގައި 199 މިލިއަން ރުފިޔާއެވެ.
މި އަހަރަށް ހުށަހެޅި ސަޕްލިމެންޓަރީ ބަޖެޓަކީ ކުރިން އަންދާޒާކުރި ވަރަށް ވުރެ ވަރަށް ބޮޑަށް ކުޑަ އަދަދެކެވެ. ކުރިން އަންދާޒާކޮށްފައި އޮތީ މި އަހަރަށް 10 ބިލިއަނެއްހާ ރުފިޔާގެ ސަޕްލިމެންޓަރީ ބަޖެޓެއް ހުށަހަޅަންޖެހޭނެ ކަމަށެވެ.
މާލީ ވުޒާރާއިން ބުނި ގޮތުގައި މަޖިލީހަށް ސަޕްލިމެންޓަރީ ބަޖެޓެއް ހުށަހަޅަން ޖެހުނީ މި އަހަރުގެ ބަޖެޓުގައި އަންދާޒާކޮށްފައިވާ ވަރަށް ވުރެ އިތުރަށް ބައެއް ދާއިރާތަކުން ޚަރަދުކުރަން ޖެހުމުންނެވެ.
އެއީ، މި އަހަރުގެ ބަޖެޓުގައި އެކިއެކި މަޝްރޫއުތަކަށް ކުދިކުދި އަދަދުތައް ޖަހާފައި ހުރުމާއި ޖުލައި މަހުން ފެށިގެން ތަންފީޒުކުރާނެ ކަމަށް ބަލާފައިވާ މާލީ އިސްލާހުތައް ތަންފީޒުކުރުމަށް ފާއިތުވި އަހަރުތަކުގައި ތައްޔާރުވެފައި ނެތުމުގެ ސަބަބުން އެ ފިޔަވަޅުތައް ލަސްވެ ޚަރަދުތައް އަންދާޒާކުރި މިންވަރަށް ކުޑަނުވުމުގެ ސަބަބުން ކަމަށް އެ ވުޒާރާއިން ބުންޏެވެ.
މިދިޔަ އަހަރުގެ މާލީ ހިސާބުތައް ރިކޯޑުކުރުމުގައި ވެސް ބޮޑެތި ގޯސްތަކެއް ހަދާފައިވާ ކަމަށް މާލީ ވަޒީރު ތުހުމަތުކުރައްވައެވެ. އެ ކަމުގެ ސަބަބުން، މިދިޔަ އަހަރުގެ ޚަރަދުތަކަށް މި އަހަރުގެ ބަޖެޓުން ދެ ބިލިއަނެއްހައި ރުފިޔާގެ ޖާގައެއް ހަމަޖައްސަން ޖެހޭ ކަމަށް ވަޒީރު މީގެ ކުރިން ވިދާޅުވެފައިވެއެވެ.