ދައުލަތުގެ އާމްދަނީއަށް 640.1 މިލިއަން ރުފިޔާ އިތުރުވާނެ ކަމަށް އަންދާޒާކޮށް، މި އަހަރުގެ ޖުމުލަ އާމްދަނީއާއި ހިލޭ އެހީ 34.2 ބިލިއަން ރުފިޔާއަށް އަރާނެ ކަމަށް މާލީ ވުޒާރާއިން އަންދާޒާކޮށްފިއެވެ.
މި އަހަރަށް އިތުރު 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް މިއަދު ވަނީ ރައްޔިތުންގެ މަޖިލީހަށް ހުށަހަޅާފައެވެ. އެއީ، މި އަހަރަށް މިދިޔަ އަހަރު މަޖިލީހުން ފާސްކުރި 49.8 ބިލިއަން ރުފިޔާގެ އިތުރުން ހުށަހަޅާ އަދަދެކެވެ.
ސަޕްލިމެންޓަރީ ބަޖެޓުގައިވަނީ މި އަހަރު އާމްދަނީއާއި ހިލޭ އެހީގެ ގޮތުގައި އިތުރު 640.1 މިލިއަން ރުފިޔާ ލިބޭނެ ކަމަށް އަންދާޒާކޮށްފައެވެ.
ކުރިން މި އަހަރަށް އަންދާޒާކޮށްފައިވަނީ 33.5 ބިލިއަން ރުފިޔާގެ އާމްދަނީއެކެވެ. އެކަމަކު، މި އިތުރުވާނެ ކަމަށް އަންދާޒާކުރާ 640.1 މިލިއަން ރުފިޔާއާ އެކު މި އަހަރުގެ ޖުމުލަ އާމްދަނީ 34.2 ބިލިއަން ރުފިޔާއަށް އަރާނެ ކަމަށް މާލީ ވުޒާރާއިން އަންދާޒާކުރެއެވެ.
މިދިޔަ މަހާ ހަމައަށް އާމްދަނީއާއި ހިލޭ އެހީގެ ގޮތުގައި ލިބިފައިވަނީ 26.9 ބިލިއަން ރުފިޔާއެވެ.
"ސަޕްލިމެންޓަރީ ބަޖެޓުގެ އާމްދަނީ ހިމަނައިގެން އާމްދަނީއާއި ހިލޭ އެހީގެ ގޮތުގައި ލިބޭނެކަމަށް ލަފާކުރަނީ 34 ބިލިއަން ރުފިޔާ،" ބަޖެޓު ހުށަހަޅުއްވަމުން މާލީ ވަޒީރު މޫސާ ޒަމީރު ވިދާޅުވިއެވެ.
ސަޕްލިމެންޓަރީ ބަޖެޓާ އެކު މި އަހަރުގެ ބަޖެޓު ޑެފިސިޓު 18 ބިލިއަން ރުފިޔާއަށް އަރާނެއެވެ. އެއީ، އުފެއްދުންތެރިކަމުގެ ނިސްބަތުން 16 އިންސައްތައެވެ. އެހެންވެ، އަހަރު ނިމޭއިރު ދަރަނި ހުންނާނީ އުފެއްދުންތެރިކަމުގެ ނިސްބަތުން 118 އިންސައްތައިގައި ކަމަށް ވަނީ ލަފާކޮށްފައެވެ.
އެ ވުޒާރާއިން އަންދާޒާ ކުރަނީ އާމްދަނީ އިތުރުކުރަން ރައީސް ޑރ. މުހައްމަދު މުއިއްޒު އެޅުއްވި ފިޔަވަޅުތަކާ އެކު ޓެކުހުގެ ގޮތުގައި އިތުރު 61.6 މިލިއަން ރުފިޔާ ލިބޭނެ ކަމަށެވެ. އަދި، އެހެނިހެން އާމްދަނީގެ ގޮތުގައި އިތުރު 379.2 މިލިއަން ރުފިޔާ ލިބޭނެ ކަމަށް އަންދާޒާކޮށްފައިވާއިރު ހިލޭ އެހީގެ ގޮތުގައި ވެސް އިތުރު 199.3 މިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފައެވެ.
މާލީ ވުޒާރާއިން ބުނި ގޮތުގައި ސަޕްލިމެންޓަރީ ބަޖެޓެއް މަޖިލީހަށް ހުށަހަޅަން ސަރުކާރުން ނިންމީ މި އަހަރަށް ކަނޑައެޅި ބަޖެޓު ހުސްވެގެންނެއް ނޫނެވެ. އެ ގޮތުން، މިދިޔަ މަހުގެ ނިޔަލަށް ބަޖެޓުން ޖުމުލަ ޚަރަދުވެފައިވަނީ 37.4 ބިލިއަން ރުފިޔާ ކަމަށް މާލީ ވުޒާރާއިން ބުންޏެވެ. އެއީ، ބަޖެޓުގެ 76 އިންސައްތައެވެ.
މާލީ ވަޒީރު މިއަދު މަޖިލީހަށް ހުށަހެޅުއްވީ ޖުމުލަ 5,119,508,129 ރުފިޔާގެ ބަޖެޓެކެވެ. އެހެންވެ، މި ބަޖެޓާ އެކު ޖުމުލަ މި އަހަރުގެ ބަޖެޓު 55 ބިލިއަން ރުފިޔާއަށް އަރާނެއެވެ.
މި އަހަރަށް ހުށަހެޅި ސަޕްލިމެންޓަރީ ބަޖެޓަކީ ކުރިން އަންދާޒާކުރި ވަރަށް ވުރެ ވަރަށް ބޮޑަށް ކުޑަ އަދަދެކެވެ. ކުރިން އަންދާޒާކޮށްފައި އޮތީ މި އަހަރަށް 10 ބިލިއަނެއްހާ ރުފިޔާގެ ސަޕްލިމެންޓަރީ ބަޖެޓެއް ހުށަހަޅަންޖެހޭނެ ކަމަށެވެ.