އަމިއްލަ ޖާހަތަށް ޓަކައި، ޚުދުމުޚުތާރު ވެރިކަމެއް ކުރުމާ ދިމާލަށް މި ސަރުކާރުން މިސްރާބު ޖަހާފައިވާ ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ ސަރުކާރުގެ ބޭކާރު އިސްރާފު ޚަރަދުތައް ކުޑަ ނުކޮށް، ރައްޔިތުން އަތުން ނަގާ ޓެކްސް ބޮޑުކޮށް، ހަމަ އެ ރައްޔިތު މީހާގެ މުސާރައިން ބައެއް ނެގުމަށް ނިންމުމަކީ، ރައްޔިތުން ދޫކޮށް އަމިއްލަ ޖާހަތަށް ޓަކައި ޚުދުމުޚްތާރު ވެރިކަމަކަށް ސަރުކާރުން މިސްރާބުޖެހި ކަމުގެ ރަނގަބީލު ކަމަށެވެ.
މި ސަރުކާރުން ވެރިކަމަށް އައީ ރައްޔިތުންގެ އަތުން ނަގާ ޓެކްސްތައް އިތުރަށް ބޮޑުނުކުރާނެ ކަމުގެ ވައުދާ ވެސް އެކުގައެވެ.
ޝާހިދު މީގެ ކުރިން ވިދާޅުވި ގޮތުގައި މި ސަރުކާރުން ދަނީ 18 އަހަރުވެފައިވާ ޒުވާނުންގެ ހައްގުތައް ނިގުޅައިގަނެ، އެ ހައްގުތައް ހަނިކުރަމުންނެވެ.
އެހެންވެ ހުރިހާ ޒުވާނުން ވެސް މިއަދު އަޒުމު ކަނޑައަޅަންވީ، ބުރަމަސަތްކަތާއި ގުރުބާނީން ހޯދި ހައްގުތައް ހިފެހެއްޓުމަށް ކަމަށް އޭނާ ވިދާޅުވެފައިވެއެވެ.
ރައްޔިތުންގެ އަތުން ނަގާ ޓެކްސް ބޮޑުކުރީ މިދިޔަ އެމްޑީޕީގެ ސަރުކާރުގައި 2023ވަނަ އަހަރުގެ ޖެނުއަރީމަހުގެ އެއްވަނަ ދުވަހުން ފެށިގެންނެވެ.
އެ ގޮތުން ޓީޖީއެސްޓީ 12 އިންސައްތައިން 16 އިންސައްތައަށް، އަދި ޖީއެސްޓީ ހަ އިންސްތައިން އަށް އިންސައްތައަށް ވަނީ ބޮޑުކޮށްފައެވެ.
މި ސަރުކާރުން ވެސް މިހާރުވަނީ ގްރީން ޓެކުހާއި އެއާޕޯޓް ޑިވެލޮޕްމަންޓް ފީ ފަދަ ބައެއް ޓެކްސްތަކަށް ބަދަލު ގެންނަން ނިންމައިފައެވެ.