ސަރުކާރުގެ ސިޔާސީ ވަޒީފާތަކުގެ މުސާރަތައް ބޮޑުކުރަން ނިންމީ، މި ފަހުން ބޮޑުކުރަން ނިންމި ޓެކްސްތަކުގެ ވާހަކަ އޮއްބައިލަން ކަމަށް ވިދާޅުވެ، މިއަދު ރައީސް ޑރ. މުޙައްމަދު މުއިއްޒު ނިންމެވި ނިންމެވުމަށް ވަރަށް ބޮޑަށް ފާޑު ވިދާޅުވެއްޖެއެވެ.
ރައީސް މިއަދު ވަނީ އަންނަ އަހަރުން ފެށިގެން އެ މަނިކުފާނުގެ މުސާރައިގެ 50 ޕަސެންޓު ނުނަންގަވަން ނިންމަވައިފައެވެ. އަދި ސިޔާސީ ވަޒީފާތަކުގެ މުސާރަތަކުން 10 ޕަސެންޓު ކުޑަކުރަން ވެސް ކަމާ ބެހޭ ފަރާތްތަކަށް ފޮނުއްވަން ނިންމަވައިފައެވެ. އަދި ކުންފުނިތަކުގެ ވެރިންގެ މުސާރަ ވެސް 90،000 ރުފިޔާއަށްވުރެ މަތި ނުވާނެހެން އެކުލަވައިލަން އިދާރާތަކަށް ފޮނުއްވަން ނިންމަވައިފައެވެ.
އެ ކަމަށް ފާޑު ވިދާޅުވެ އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ، ޓެކްސްތައް ބޮޑުކޮށްފައި، ސިޔާސީ ވަޒީފާތަކުގެ މުސާރައިން 10 އިންސައްތަ އުނިކުރަން ނިންމި ނިންމުމަކީ "ދެބޯގެރިދުއްވުމެއް" ކަމަށް ސިފަކުރައްވައިފައެވެ.
"މިވީ 11 މަސްދުވަހުގެ ތެރޭގައި 3000 އާ ގާތްކުރާ އަދަދަކަށް ސިޔާސީ ވަޒީފާ އުފައްދައިފި،" އޭނާ ތުހުމަތުކުރެއްވިއެވެ.
އެއާއެކު ފައްޔާޒުވަނީ ރައީސް ޑރ. މުއިއްޒު ރައްޔިތުންނަށް ވެވަޑައިގެންނެވި ވައުދާ އެއްގޮތަށް ސިޔާސީ ވަޒީފާތަކުގެ އަދަދު 700 އަށް ކުޑަކޮށްފައި ނޫނީ ރައްޔިތުންގެ އަތުން ނަގާ ޓެކްސް ބޮޑުކުރާ ވާހަކަ ދެއްކުން ލަދުވެތި ކަމަށް ވިދާޅުވެފައެވެ.
ފައްޔާޒު މިފަަދައިން ވިދާޅުވީއިރު މި މަހުގެ 15ވަނަ ދުވަހު ރައީސް ވަނީ ސިޔާސީ މުވައްޒަފުންގެ ތެރެއިން 228 ބޭފުޅަކު މަގާމުން ވަކިކުރަން ނިންމަވައިފައެވެ.
ރައީސް ވިދާޅުވީ އެ މުވައްޒަފުން މަގާމުތަކުން ވަކިކުރަން ނިންމެވީ، އިގްތިޞާދީ ސިޔާސަތު އިސްލާހުކުރުމުގެ ތެރެއިން ޚަރަދުކުޑަކުރުމުގެ ގޮތުން އަޅަން ނިންމެވި ފިޔަވަޅެއްގެ ގޮތުން ކަމަށެވެ.
ވަކިކުރަން ނިންމި މުވައްޒަފުން ވަކިކުރާނީ މި މަހުގެ 30ވަނަ ދުވަހުގެ ކުރިން ކަމަށް ރައީސް ވިދާޅުވިއެވެ.
އޭގެ ތެރޭގައި ހިމެނެނީ ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި، 109 ސީނިއާ ޕޮލިޓިކަލް ޑިރެކްޓަރުންގެ އިތުރުން 69 ޕޮލިޓިކަލް ޑިރެކްޓަރުންނެވެ.
މި މުވައްޒަފުން ވަކިކުރުމުން ސަރުކާރުގެ ރިކަރެންޓު ޚަރަދުން މަހަކު 5.714 މިލިއަން ރުފިޔާ ސަލާމަތްކުރެވޭނެ ކަމަށް ރައީސް ވިދާޅުވިއެވެ.