މި ސަރުކާރުން ޒުވާނުންގެ ހައްގުތައް ނިގުޅައިގަނެ، ހަނިކުރަމުންދާތީ، ހުރިހާ ޒުވާނުން ވެސް އެ ކަމާ ދެކޮޅަށް އަޑުއުފުލަންޖެހޭ ކަމަށް އެމްޑީޕީގެ ރައީސް އަބްދުﷲ ޝާހިދު މިއަދު ވިދާޅުވެއްޖެއެވެ.
އޭނާ މިހެން ވިދާޅުވީ މިއަދު ފާހަގަކުރަމުންދާ ޒުވާނުންގެ ދުވަހުގެ ތަހުނިޔާ ފޮނުއްވައި، އެކްސްގައި ކުރެއްވި ޕޯސްޓެއްގައެވެ.
ޝާހިދު ވިދާޅުވި ގޮތުގައި މި ސަރުކާރުން ދަނީ 18 އަހަރުވެފައިވާ ޒުވާނުންގެ ހައްގުތައް ނިގުޅައިގަނެ، ހަނިކުރަމުންނެވެ. މިއަދު ޒުވާނުންގެ ދުވަސް ފާހަގަކުރާއިރު، ހުރިހާ ޒުވާނުން ވެސް މިއަދު އަޒުމު ކަނޑައަޅަންވީ، ބުރަމަސަތްކަތާއި ގުރުބާނީން ހޯދި ހައްގުތައް ހިފެހެއްޓުމަށް ކަމަށް އޭނާ ވިދާޅުވިއެވެ.
ޒުވާނުންނަށް ހާއްސަ ދުވަހެއް ކަނޑައަޅުއްވައި ގައުމީ ފެންވަރުގައި އެ ދުވަސް ފާހަގަ ކުރުމަށް ނިންމެވީ ކުރީގެ ރައީސް އިބްރާހީމް މުހައްމަދު ޞާލިހެވެ.
މި ކަމާ ގުޅިގެން ޝާހިދު ވިދާޅުވީ ޒުވާނުންގެ ދުވަހުގެ ގޮތުގައި ފާހަގަކުރަނީ 2008ވަނަ އަހަރު އަމަލުކުރަންފެށި ގާނޫނު އަސާސީން އެކުލަވާލި ރައްޔިތުންގެ ޚާއްސަ މަޖިލީހުގައި އެމްޑީޕީން އިސްނަގައިގެން ވަކާލާތުކޮށް، 18 އަހަރުން މަތީގެ ކޮންމެ މީހަކަށް އިންތިޚާބުތަކުގައި ވޯޓު ދިނުމާއި އިންތިޚާބުތަކުގައި ވާދަކުރުމުގެ ހައްގު ލިބުނު ދުވަސް ކަމަށެވެ.
ޒުވާނުންގެ ދުވަހެއް ފާހަގަ ކުރުމަށް އެމްޑީޕީގެ ސަރުކާރުގައި ނިންމީ، އެ ޕާޓީއަކީ އަބަދު ވެސް ޒުވާނުންގެ ޙައްގުތައް ކަށަވަރު ކުރުމުގައި ދެގޮތެއް ނުވެ ދެމި އޮންނަ ޕާޓީއަކަށް ވާތީ ކަމަށް އޭނާ ވަނީ ވިދާޅުވެފައެވެ.
ގައުމީ ފެންވަރުގައި ޒުވާނުންގެ ދުވަހެއް ފާހަގަ ކުރުމަށް ކުރީގެ ރައީސް ޞާލިހު ނިމްމެވީ، 19 ޑިސެންބަރު 2019ގައެވެ. އެ ދުވަހު ނިންމެވީ ޖެހިގެން އައި 2020ވަނަ އަހަރުން ފެށިގެން ކޮންމެ އަހަރެއްގެ އޮކްޓޫބަރު 22ގައި ޒުވާނުންގެ ދުވަސް ފާހަގަ ކުރުމަށެވެ.