ރައްޔިތުންގެ މަޖިލީހުގައި އިދިކޮޅު އެމްޑީޕީ ތަމްސީލުކުރާ 12 މެންބަރުގެ ސޮޔާ އެއްކޮށް، ހޯމް މިނިސްޓަރު އަލީ އިހުސާންގެ މައްސަލަ މަޖިލީހަށް އިއްޔެ ވައްދައިފިއެވެ.
މިނިސްޓަރު އިހުސާން އެ މަގާމުން ވަކި ކުރަން ގޮވާލައި، އެމްޑީޕީން އެ މައްސަލަ މަޖިލީހަށް ހުށަހަޅާފައި ވަނީ ވަޒީރުންގެ މަޖިލީހުގެ މެންބަރެއް ކޮށްގެން ނުވާނެ ކަންތައްތަކެއްކޮށް، ގާނުނުތަކާ ޚިލާފުވެފައިވާ ކަމަށް ބުނެއެވެ.
އެގޮތުން، އެ ޕާޓީން ވަނީ މިނިސްޓަރު އިހުސާން ގާނޫނާ ޚިލާފަށް ކޮށްފައިވާ ކަމަށް ބުނާ ކަންކަން ވެސް ހާމަކޮށްފައެވެ.
އެމްޑީޕީން ހުށަހެޅި މައްސަލާގައި ބުނީ، ރާއްޖޭގައި ވަޒީފާ އަދާކުރާ ބިދޭސީންގެ ކަންކަން ބެލެހެއްޓުމަށް އިމިގްރޭޝަނުން ބޭނުންކުރުމަށް ރާއްޖޭގެ ކުންފުންޏަކުން އޮންލައިން އެކްސްޕެޓް ސިސްޓަމެއް ގާއިމު ކޮށްފައިވަނިކޮށް، އެ ކަން ހުއްޓުވައި، ބިދޭސީންގެ ހުރިހާ ކަމެއް ބެލެހެއްޓުމަށް ކޮރަޕްޝަންގެ ބޮޑެތި ތުހުމަތުތަކެއްކޮށް، ބެލްކު ލިސްޓުވެފައިވާ މެލޭޝިއާގެ ބެސްޓިނެޓް ނަމަކަށް ކިޔާ ކުންފުންޏަކާ ހަވާލުކުރި ކަމަށެވެ.
އެ ސިސްޓަމް ތަރައްގީ ކުރި ރާއްޖޭގެ ސިސްޓަމް މެދުވެރިކޮށް ޚަރަދުކުޑަކޮށް އެކަން ކުރެވެން އޮއްވައި، އެސިސްޓަމް ހިންގަން ބެސްޓިނެޓާ ހަވާލުކުރުމަކީ ދައުލަތަށް ލިބެން އޮތް ފައިދާއަކަށް އުނިކަމެއް ލިބޭ ގޮތަށް އަމަލުކުރުން ކަމަށާއި އެއީ ގާނޫނުލް އުގޫބާތުގެ 517 ވަނަ މާއްދާގައި ބުނާ ޖިނާއީ ކުށުގެ އަމަލެއް ކަމަށް އެ ޕާޓިން ވަނީ ބުނެފައެވެ.
އޭގެއިތުރުން، އެމްޑީޕީން ވަނީ ފުލުހުންގެ މަސްއޫލުވެރި ވަޒީރުގެ ހައިސިއްޔަތުން އެ ޚިދުމަތުން ހިންގަމުން އަންނަ ތަހުގީގުތަކަށް މިނިސްޓަރު ސިޔާސީ ނުފޫޒު ފޯރުވާ ކަމަށާއި ސަރުކާރުން ހިންގާ ޖިނާއީ ކުށުގެ އަމަލުތައް ތަހުގީގު ކުރަން ހުރަސް އަޅާ ކަމަށް ތުހުމަތުކޮށްފައިވެއެވެ.
ގާނުނުތަކުގައި ފުލުހުންނަށް މަތިކޮށްފައިވާ މަސްއޫލިއްޔަތުތައް އަދާކުރަން ތަކުރާރުކޮށް މިނިސްޓަރު ހުރަސްއަޅާ ކަމަށް އެ މައްސަލާގައި ތުހުމަތުކޮށްފައިވެއެވެ.
އިތުރަށް އެމްޑީޕީން ފާހަގަކުރި ސަބަބުތަކަކީ:
- އެތައް ރައްޔިތުންގެ ޒާތީ މައުލޫމާތު ބޭނުންކޮށްގެން، އެމީހުންނަށް ނޭނގި، ޕީއެންސީއަށް މެންބަރުން އިތުރުކުރުމަށް، ގިނަ އަދަދެއްގެ ސައްހަ ނޫން ފޯމުތަކެއް އިލެކްޝަންސް ކޮމިޝަނަށް ހުށަހެޅީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާ ބޭނުންކޮށްގެން ކަން އީސީން އާންމުކޮށްފައިވާ މައުލޫމާތުން އެނގުން
- އީސީއަށް ހުށަހަޅާފައި ހުރި ވަގު ފޯމުތަކުގައި ހުރި މައުލޫމާތަކީ ޑީއެންއާރަށް އެކްސެސް އޮތް ފަރާތަކަށް ލިބޭނެ މައުލޫމާތުތަކެއް ކަމަށާއި ޑީއެންއާރުގެ ޑޭޓާ ބޭސްގެ ހުރިހާ ކަމެއް ބަލަހައްޓަނީ މިނިސްޓަރުގެ އިހުސާންގެ ބެއްލެވުމުގެ ދަށުން ކަން އެނގެން އޮތުން
- ސައްހަ ނޫން ފޯމުތައް އެކުލަވާލުމުގެ މަސައްކަތް ކުރިއަށް ގެންދިޔައީ ޑީއެންއާރްގެ ވަސީލަތްތަކާއި މުވައްޒަފުން ބޭނުންކޮށްގެން، އެ އޮފީހުގެ ތެރޭގައި މިނިސްޓަރުގެ ބެއްލެވުމުގެ ދަށުން ކަން ހާމަވެފައިވުން
"އޭނާ [މިނިސްޓަރު އިހުސާން] އެ މަގާމުގައި ދެމިހުރެއްޖެ ނަމަ، އޭނާގެ މައްޗަށް ހިންގޭ ޖިނާއީ ތަހުގީގަށް ހުރަސް އެޅުމުގެ އިލްތިމާލު ފާޅުކަން ބޮޑުގޮތެއްގައި އޮންނާތީ، އޭނާ އެ މަގާމުގައި އިތުރަށް ހުރުމަކީ ދިވެހި ރައްޔިތުންގެ ހައްގުތައް ގެއްލި ދިވެހިރާއްޖޭގެ ސަލާމަތާއި ރައްކާތެރިކަމަށް ބުރޫ އަރާފާނެ ކަމެއް ކަމަށް ގަބޫލު ކުރެވެއެވެ." އެމްޑީޕީން ބުނެފައިވެއެވެ.
ފާހަގަކޮށްލެވޭ ގޮތުގައި، މި މައްސަލަ މަޖިލީހަށް ވައްދާފައި ވަނީ މި ވަގުތު މަޖިލީހުގައި އެމްޑީޕީ ތަމްސީލުކުރާ 12 މެންބަރުންގެ ސޮޔާ އެކުގައެވެ. އެއީ:
- ޕީޖީ ލީޑަރު، އަދި ހިތަދޫ ދެކުނު ދާއިރާގެ މެންބަރު އިބްރާހީީމް ނާޒިލް
- ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ)
- މަރަދޫ ދާއިރާގެ މެންބަރު އަޙުމަދު ދީދީ
- ގަލޮޅު ދެކުނު ދާއިރާގެ މެންބަރު މީކާއިލް އަޙުމަދު ނަސީމް
- ހުޅުމާލޭ ދެކުނު ދާއިރާގެ މެންބަރު އަޙުމަދު ޝަމްހީދު
- ކަނޑިތީމު ދާއިރާގެ މެންބަރު އަމީން ފައިސަލް
- ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ
- ތޮއްޑޫ ދާއިރާގެ މެންބަރު ޙުސައިން ޞަމީރު
- ކެންދޫ ދާއިރާގެ މެންބަރު މަޢުރޫފް ޒާކިރު
- މާވަށު ދާއިރާގެ މެންބަރު އަޙްމަދު ޝާކިރު
- ކެޔޮދޫ ދާއިރާގެ މެންބަރު މުޙައްމަދު ނިއުޝާދު
- ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް