ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ން ވައްކަން ކޮށް، ދުނިޔެ ކުރިއަށްދާން ބޭނުންވާ އިލެކްޓްރޯނިކް ގަވަނަންސް (އީ ގަވަނަންސް)ގެ އިތުބާރު ؛މި ސަރުކާރުން ނަގައިލައިފި ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބަދުﷲ ޝާހިދު މިރޭ ވިދާޅުވެއްޖެއެެވެ.
ޝަހީދު މިފަދައިން ވިދާޅުވީ އެމްޑީޕީއިން ޕީޓްރަލް ޕާކުގައި މިރޭ ބޭއްވި "ފުދިއްޖެ ފުނޑިއްޖެ" ޖަލްސާގައި ވާހަކަ ދައްކަމުންނެވެ.
ޝާހިދު މިފަދައިން ވިދާޅުވީ ޑީއެންއާރުގެ ޑާޓާބޭސް ބޭނުންކޮށްގެން ޕީއެންސީއަށް މެމްބަރުން އިތުރުކުރުމުގެ މަސައްކަތް ޕީއެންސީން ކުރާކަމުގެ އަޑުތައް ފެތުރިފައި ވަނިކޮށެވެ. މިކަމަށް ބާރުދޭ ފޮޓޯތަކެއް ވަނީ ސޯޝަލް މީޑިއާގައި ފެންމަތިވެފައެވެ.
މި ފޮޓޯތަކުން ފެންނަނީ ޑީއެންއާރުގެ މުވައްޒަފުން އައިޑީކާޑު ފޮޓޯ ބޭނުންކޮށްގެން ފޯމުތަކެއް ފުރާ މަންޒަރެވެ. އަދި މި މަސައްކަތް ކުރިއަށްދާގޮތް ބަލަން ހޯމް މިނިސްޓަރު އަލީ އިހުސާނު ހުންނަ ފޮޓޯއެއް ވެސް ވަނީ ލީކުވެފައެވެ. މިއާއެކު އިދިކޮޅުން ދަނީ އިހުސާނު މަގާމުން އެކަހެރިކުރުމަށް ވެސް ގޮވަމުންނެވެ.
މިރޭގެ ޖަލްސާގައި ޝާހިދު ތުހުމަތު ކުރެއްވީ، މި ސަރުކާރުން ވައްކަންތައް ކުރަމުން ގޮސް އެންމެ ފަހުން ރައްޔިތުންގެ ޝަޚްސުން ވެސް ވައްކަން ކޮށްފައި ވާކަމަށެވެ. އެގޮތުން، ރައްޔިތުންގެ ޝަޚްސު ޑީއެންއާރުގެ ތެރެއިން ވަގަށް ނަގައި، ވަގު ފޯމުތައް ފުރައި ޕީއެންސީއަށް މެމްބަރުން ވައްދައިފައި ވާކަމަށް ޝާހިދު ވިދާޅުވިއެވެ.
"އެމްޑީޕީގައި ތިއްބެވި އެތައް ބޭފުޅުންނެއް، އަދި ޕާޓީއެއްގައި ނެތް އެތައް ބޭފުޅުންނެއް އޮޅުވާލައިގެން މަކަރު ހަދައިގެން އެބޭފުޅުންގެ ޝަޚްސު ޑީއެންއާރުގެ ތެރެއިން ވަގަށް ނަގައިގެން ފޯމުތައް ފުރައިގެން ޕީއެންސީއަށް ވައްދާފައި ވާކަން އެވަނީ ސާބިތުވެފަ." ޝާހިދު ވިދާޅުވެފައެވެ.
ޝާހިދު ވިދާޅުވީ ރައީސް މިއަދު އެސްޓޯނިއާގައި ހުންނަވައި، ރާއްޖޭގެ އީ ގަވަނަންސް އެސްޓޯނިއާޔާ އެއްފެންވަރަށް ގެންދިއުމަށް މަސައްކަތް ކުރައްވާ ވާހަކަ ވިދާޅުވެފައި ވާކަމަށެވެ.
މިއީ ރައްޔިތުންގެ މައުލޫމާތު ކޮމްޕިއުޓަރައިޒް ސިސްޓަމެއްގެ ތެރޭގައި ރައްކާތެރިކޮށްފައިވާ ނިޒާމެއްކަން ފާހަގަކުރައްވާ އޭނާ ވަނީ، ޑީއެންއާރުގައި ޒާތީ މައުލޫމާތު ބަހައްޓަން ބޭނުންވާނީ ކާކުތޯ ސުވާލު އުފައްދަވާފައެވެ. އީ ގަވަނަންސްގެ ނިޒާމާށް މިއަދު ދިވެހިން އިތުބާރު ކަނޑާލައިފި ކަމަށް ޝާހިދު ވަނީ ވިދާޅުވެފައެވެ.
"ދައުލަތުގެ މުއައްސަސާތަކުގެ ތެރޭގައި ހުންނަ މައުލޫމާތަކީ ވަގަށް ނަގައިގެން ސަރުކާރު ހިންގާ ޕާޓީގެ ފައިދާއަށްޓަކައި ބޭނުންކުރާ އެއްޗަކަށް ވެއްޖިއްޔާ އެ އިތުބާރު އެ އޮތީ ގެއްލިފަ. އެސްޓޯނިއާގަ ހުންނަވައިގެން އެ ނަގާލީ އަޅުގަނޑުމެން ބޭނުންވާ، ދުނިޔެ ކުރިއަށްދިއުމަށް ބޭނުންވާ އީގަވަނެންސްގެ އިތުބާރު." ޝާހިދު ވިދާޅުވިއެވެ.
މި މައްސަލަ ފެންމަތިވުމާ އެކު އިދިކޮޅު ޕާތިތަކުން ވަނީ މިނިސްޓަރު އިހުސާނު މަގާމުން އެކަހެރި ކުރުމަށް ގޮވައިލާފައެވެ. އަދި އެމްޑީޕީގެ ޕީޖީން ވަނީ އިހުސާނުގެ އިތުބާރު ނެތް މައްސަލަ މަޖިލީހަށް ވައްދަން ވެސް ނިންމާފައެވެ.
އެމްޑީޕީން މިއަދު ވެސް ވަނީ އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށާއި ޕްރޮސިކިއުޓާ ޖެނެރަލްގެ އޮފީސް (ޕީޖީ)އަށް ހުށަހަޅައިފައެވެ.