ރާއްޖޭގައި އަލަށް ގާއިމުކުރާ ޑިވެލޮޕްމަންޓު ބޭންކުގެ ލައިސެންސް ދޭން ނިންމާފައިވާ ކަމަށާއި މި ހަފުތާގައި ލައިސެންސް ދިނުމުގެ ކަންތައްތައް ކުރިއަށް ދާނެ ކަމަށް މަރުކަޒީ ބޭންކު އެމްއެމްއޭއިން ބުނެފިއެވެ.
ސަންގެ "އެޑިޓަރުގެ ސުވާލު" ޕްރޮގްރާމްގައި ވާހަކަދައްކަވަމުން އެމްއެމްއޭގެ ޑެޕިއުޓީ ގަވަރުނަރު އަހުމަދު އިމާދު ވިދާޅުވީ ޑިވެލޮޕްމަންޓު ބޭންކުގެ ލައިސެންސަށް އެދި އެމްއެމްއޭއަށް ހުށަހެޅީ ޖުލައި 28 ގައި ކަމަށެވެ. ނަމަވެސް އެކި ފަހަރުމަތިން ޑިވެލޮޕްމަންޓު ބޭންކުގެ އެޕްލިކޭޝަންގައި ހުރި ބައެއް ލިޔެކިޔުންތައް ހަމަކުރުމަށް ފަހު، ފުރިހަމަވީ ސެޕްޓެމްބަރު 16 ގައި ކަމަށް އޭނާ ވިދާޅުވިއެވެ.
އިމާދު ވިދާޅުވި ގޮތުގައި އެމްއެމްއޭއަށް ސަރުކާރުން ހުށަހަޅާފައިވާ ޕްރޮޕޯސަލްގައި ޑިވެލޮޕްމަންޓު ބޭންކުގެ މަގުސަދަކަށް ވަނީ އިންފްރާސްޓްރަކްޗާ ޑިވެލޮޕްމަންޓް ޕްރޮޖެކްޓްތައް ހިންގުމާއި، ރާއްޖޭގެ ޕްރައިވެޓް ސެކްޓާއަށް ހުރި އިންވެސްޓްމަންޓްތައް ހިންގުމެވެ. ވަކިން ޚާއްސަކޮށް ރިސޯޓު ސެކްޓާގައި ހުރި އިންވެސްޓްމަންޓްތައް ހިންގުން ހިމެނޭ ކަމަށް އިމާދު ވިދާޅުވިއެވެ.
އެހެންވީމަ އަޅުގަނޑުމެންނަށް އެ މަގްސަދު ހާސިލްކުރެވޭ ކަމަށް ވަންޏާމުން، ޕްލޭނާ އެއްގޮތަށް ޑިވަލޮޕްމަންޓް ބޭންކްގެ ކަންކަން ކުރިއަށް ދާނަމަ ފައިދާތަކެއް ރާއްޖެއަށް އެބަހުރި، ޑެޕިއުޓީ ގަވަރުނަރު އަހުމަދު އިމާދު
އިމާދު ވިދާޅުވީ މުޅި ފައިނޭންސިން ސެކްޓާއަށް ބަލާއިރު ފާހަގަވާ އެއް ކަމަކީ ރާއްޖޭގައި މިހާތަނަށް އޮތީ ރީޓެއިލް ބޭންކިން ނިޒާމެއް ކަމަށެވެ. އެހެންކަމުން ދިގު މުއްދަތަކަށް ފައިނޭންސް ދޭ ބޭންކެއް ރާއްޖޭގައި އެސްޓެބްލިޝްވެފައި ނެތްކަން ފާހަގަކުރެއްވިއެވެ.
ނަމަވެސް އެމްއެމްއޭއަށް ލިބިފައި އޮތް ޕްރޮޕޯސަލްގައި ޑިވެލޮޕްމަންޓް ބޭންކިން މޮޑެލްއެއް ގޮތަށް ސަރުކާރުން ހުށަހަޅާފައި އޮތީ ކައިރި މުސްތަގުބަލެއްގައި އެ ބޭންކަށް އިންޓަނޭޝަނަލް ޕާޓްނަރުން ލައި، ބޭންކްގެ އޮޕަރޭޝަންތައް ކުރިއަށް ގެންދިޔުންކަމަށް އިމާދު ވިދާޅުވިއެވެ.
އެ ޕްލޭނަށް ރިއާޔަތްކުރުމަށް ފަހު އިވެލުއޭޝަންތައް ހަދާފައިވާ ކަމަށާއި މިހާރު ޑިވެލޮޕްމަންޓް ބޭންކުގެގެ ލައިސެންސް ދިނުމަށް ނިންމާފައިވާ ކަމަށް އޭނާ ވިދާޅުވިއެވެ.
...އެންމެ ފަހުން ބޭއްވި ބޯޑުގަ އަޅުގަނޑުމެން އިންނާނީ ނިންމާފައި. މިހަފުތާ ތެރޭގަ އަޅުގަނޑުމެން ޑިވަލޮޕްމަންޓް ބޭންކްގެ ލައިސެންސް އެމްއެމްއޭއިން ސަރުކާރަށް، ބޭންކްގެ އެޕްލިކެންޓަށް ހަވާލުކުރުމުގެ ކަންކަން ކުރިއަަށް ގެންދާނެ، ޑެޕިއުޓީ ގަވަރުނަރު އަހުމަދު އިމާދު
ޑިވެލޮޕްމެންޓް ބޭންކުތަކަކީ، ގައުމުގައި އިންޑަސްޓްރީތަކާއި، ވިޔަފާރިތައް އުފައްދާ، ކުރިއެރުވުމަށް ބޭނުންވާ މާލީ އެހީތެރިކަން ފޯރުކޮށްދޭ އިދާރާއެކެވެ. އެގޮތުން، ވިޔަފާރިތައް ފަށައިގަތުމަށް ބޭނުންވާ ލޯނާއި އެހެނިހެން މާލީ އެހީތެރިކަން ވެސް ޑިވެލޮޕްމަންޓް ބޭންކުތަކުން ފޯރުކޮށްދޭނެއެވެ.
ރައީސް ޑރ. މުހައްމަދު މުއިއްޒު -- ފޮޓޯ/ ރައީސް އޮފީސް
ރާއްޖޭގައި ޑިވެލޮޕްމަންޓު ބޭންކެއް ގާއިމުކުރުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. ސަރުކާރުގެ އަމާޒަކީ މި އަހަރުގެ ތެރޭގައި މި ބޭންކު ހުޅުވައި ޚިދުމަތްދޭން ފެށުމެވެ.
މީގެ ކުރިން ރައީސް ވަނީ އެ ބެންކުގެ ސީއީއޯކަމާއި ޗެއާޕާސަން ކަމަށް ރާއްޖެއިން ބޭރުގެ ދެ ތަޖުރިބާކާރުން އައްޔަންކުރައްވާފައެވެ.
އެގޮތުން، ޗެއާޕާސަނަކަށް އައްޔަންކުރެއްވީ ސިންގަޕޫރުގެ ރައްޔިތެއް ކަމަށްވާ އަރުނީ ގުނެތިލަކައެވެ. އެއީ، 25 އަހަރުގެ ތަޖުރިބާ ހުންނެވި މާލީ ދާއިރާގެ މާހިރެކެވެ. އެ ބޭންކްގެ ސީއީއޯކަމަށް އައްޔަންކުރައްވާފައިވަނީ އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން ޖޯންސްއެވެ. އޭނާއަކީ ތިމާވެއްޓާ ރައްޓެހި އިންވެސްޓްމަންޓުގެ ދާއިރާއިން ގިނަ ކާމިޔާބީތަކެއް ހޯދައިފައެވެ.
މިދިޔަ އޮގަސްޓު މަހުގެ 21ގައި ވަނީ ޑިވެލްޕްމަންޓް ބޭންކަށް ތިން މެމްބަރުން އައްޔަން ކުރައްވައިފައެވެ. އެއީ؛
- އަހުމަދު އަލީ، މއ. ވޭސައިޑް 805 ފްލެޓް
- ސައީދު އަބްދުއްނާސިރު ބިން ސައީދު ހަސަން އަލް ޖުނައިދު، ސިންގަޕޫރު
- ރޮބާޓް ޑެނިއެލް ކާންޓް، ޔުނައިޓެޑް ކިންގްޑަމް
ޑިވެލޮޕްމަންޓު ބޭންކު އިމާރާތުގެ މަސައްކަތްތައް ކުރިއަށްދާ ގޮތް އިކޮނޮމިކް މިނިސްޓަރު މުޙައްމަދު ސައީދު ވެސް ވަނީ މިދިޔަ މަހުގެ 24 ވަނަ ދުވަހު ބައްލަވާލައްވާފައެވެ.