އެންޓި ކޮރަޕްޝަން ކޮމިޝަން (އޭސީސީ)އަށް އެ ކޮމިޝަންގެ ޒިންމާ އަދާނުކުރެވޭ ކަމަށާއި، ރާއްޖޭގައި ހިނގާ ބޮޑެތި ކޮރަޕްޝަންގެ މައްސަލަތައް ނުބެލި ދޫވެގެން ދާތަން ބަލަން ނުތިބެވޭނެ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެއެވެ.
އޭސީސީއާއި އިލެކްޝަންސް ކޮމިޝަން (އީސީ)ގެ ރައީސާއި ނައިބު ރައީސް އައްޔަންކުރުމުގެ ބާރު ރައީސުލްުޖުމްހޫރިއްޔާއަށް ދޭ ގޮތަށް ސަރުކާރުގެ ފަރާތުން ވަނީ ރައްޔިތުންގެ މަޖިލީހަށް ދެ ބިލެއް ހުށަހަޅައިފައެވެ.
އެގޮތުން އެންޓި ކޮރަޕްޝަން ކޮމިޝަންގެ ގާނޫނަށް ހުށަހެޅި އިސްލާހަށް މިއަދުގެ ޖަލްސާގައި ބަހުސްކުރައްވާ ނާޒިމް ވިދާޅުވީ، މިއީ އަލަކަށް ކުރާކަމެއް ނޫން ކަމަށެވެ. މީގެ ކުރީ ސަރުކާރުން ވަނީ ސިވިލް ސާވިސް ކޮމިޝަންގެ ރައީސް އައްޔަނުކުރުން ވެސް އެ ބިލާ އެއްގޮތަށް ބަދަލުގެނެސް، އެ ބާރު ރައީސުލްޖުމްޙޫރިއްޔާއަށް ދެއްވާފައިވާކަން ފާހަގަކުރެއްވިއެވެ.
ނާޒިމް ވިދާޅުވީ، ސިވިލް ސާވިސް ކޮމިޝަނަކީ 27،000 މުވައްޒަފުންގެ ކަންތައްތައް ބަލަހައްޓާ ތަނެއް ކަމަށާއި އެ ތަނުގެ ރައީސަކީ ޖުޑިޝަލް ސާވިސް ކޮމިޝަންގެ މެންބަރުކަން ވެސް ލިބިވަޑައިގަންނަވާ ބޭފުޅެއް ކަމަށެވެ.
އެހެންކަމުން މި ސަރުކާރަށް ފާޑުކިޔުމުގެ ޖާގައެއް ނެތް ކަމަށާއި، އޭސީސީއަކީ މިހާރު ހިނގަންވާ ގޮތަށް ހިނގާ ތަނެއްކަމަށް ވެސް ގަބޫލުނުކުރައްވާ ކަމަށް ނާޒިމް ވިދާޅުވިއެވެ.
އެހެންވީމާ އެގޮތަށް ގާނޫނު ބަދަލުކުރެއްވީމާ މި ސަރުކާރުން އޭސީސީގެ ރައީސްގެ މަގާމު ބަދަލުކުރީމާ އެއީ ފާޑުކިޔެން އޮތް ކަމެއް ނޫން. އަޅުގަނޑު ގަބޫލުކުރާ ގޮތުގައި ރާއްޖޭގެ އެއްވެސް ރައްޔިތަކު ނެތް އެންޓި ކޮރަޕްޝަން ބޯޑު ހިނގަންވާ ގޮތަށް ހިނގާކަމަށް، ޕާފޯމްކުރަންވާ ގޮތަށް ޕާފޯމްކުރާ، ކޮރަޕްޝަންގެ މައްސަލަތައް ހައްލުކުރެވޭ ބަޔަކަށް އޭސީސީ ވާކަމަށް ގަބޫލުކުރާ، ދިއްގަރު ދާއިރާގެ މެންބަރު އަހުމަދު ނާޒިމް
މިހާރު އޭސީސީގައި ތިއްބަވަނީ ޕްރޮފެޝަނަލް ބައެއް ނޫން ކަމަށް ވެސް ނާޒިމް ވިދާޅުވިއެވެ.
ކޮރަޕްޝަންގެ ބޮޑެތި މައްސަލަތައް ހިނގަމުންދާއިރު ފިޔަވަޅެއް އަޅާތަން ނުފެންނާތީ އެކަމުގެ ނުރުހުން އޭނާ ވަނީ ފާޅުކުރައްވާފައެވެ. މިސާލެއްގެ ގޮތުން ކުރީގެ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް ކޮރަޕްޝަން ހިންގައި، ދެ އެޕާޓްމަންޓެއް ގަނެގެން ދިޔައިރު ވެސް އެޅި ފިޔަވަޅެއް ނެތްކަން ފާހަގަކުރެއްވިއެވެ.
މި ސަރުކާރުން ކުރިއަށް އޮތް ތަނުގައި އެފަދަ ގޮތަކަށް ކަންކަން ހިނގާތަން ބަލަން ބޭނުންނުވާ ކަމަށް ނާޒިމް ވިދާޅުވިއެވެ. އެހެންކަމުން އޭސީސީއާއި އީސީގެ ރައީސް އައްޔަންކުރުމުގެ ބާރު ރައީސަށް މުތުލަގަށް ލިބެން ޖެހޭކަމަށް ގަބޫލުކުރައްވާ ކަމަށް ނާޒިމް ވިދާޅުވިއެވެ.
މި ފަސް އަހަރު ވެސް ކޮރަޕްޝަންތައް ނުބަލާ ހިނގަން ދޫކޮށްލީމާ އަޅުގަނޑުމެންނަށް އެތަން ބަލާކަށް ނުތިބެވޭނެ. އަޅުގަނޑުމެންނަށް ރައްޔިތުން ސުޕަމެޖޯރިޓީ ދިނީ ކަންކަން އިސްލާހުކުރަން. އަޅުގަނޑުމެންނަށް ކޮރަޕްޝަންގެ ކަންތައްތައް ހުއްޓޭތަނެއް ނުފެނޭ، ދިއްގަރު ދާއިރާގެ މެންބަރު އަހުމަދު ނާޒިމް
ފާހަގަކޮށްލެވޭ ގޮތުގައި އީސީގެ ގާނޫނަށް ބަދަލުގެންނަން ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އޭސީސީގެ ގާނޫނު ބަދަލުކުރަން ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރެވެ.
މި ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރަން ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ. މި ނަން ފާސްކުރަން މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ.
އެ އިސްލާހު ފާސްވެ، އަމަލުކުރަން ފެށުމުގެ ކުރިން ދެ ކޮމިޝަންގެ ރައީސާއި ނައިބު ރައީސް ވެސް ގާނޫނުގައިވާ ގޮތުގެ މަތިން މަގާމުން ވަކިވަންދެން އެ މަގާމުގައި ދެމިތިބޭނެއެވެ.
މިހާރު ގާނޫނުގައި އޮންނަ ގޮތުން ނަމަ އޭސީސީ އަދި އީސީގެ ރައީސް އަދި ނައިބު ރައީސް އައްޔަނުކުރަނީ އެ ދެ ކޮމިޝަންގެ މެންބަރުންގެ މެދުގައި ނަގާ ވޯޓަކުންނެވެ. މި ވޯޓުގެ ނަތީޖާ 28 ގަޑިއިރު ތެރޭ ރައީސުލްޖުމްހޫރިއްޔާއަށާއި މަޖިލީހަށް ހުށަހަޅަން ޖެހޭނެއެވެ.