މި ސަރުކާރުގެ ނައިބު ވަޒީރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއާއި އެގައުމުގެ ރައްޔިތުންނަށް ކުޑައިމީސްކުރި މައްސަލައިގައި، ރާއްޖެއަށް ބުކިން ހެދުން ހުއްޓާލި އިންޑިއާގެ ޓްރެވެލް ޕްލެޓްފޯމް އީޒްމައިޓްރިޕްއިން މި ގައުމަށް އަލުން ބުކިން ހަދަން ފަށައިފިއެވެ.
މިދިޔަ ޖެނުއަރީ މަހު މޯދީއަށް ކުޑައިމީސްކޮށް ވާހަކަދެއްކެވީ، ޔޫތު މިނިސްޓްރީގެ ތިން ނައިބު ވަޒީރުން ކަމަށްވާ މަލްޝާ ޝަރީފާއި މަރިޔަމް ޝިއުނާއާއި އަބްދުﷲ މަހްޒޫމް މާޖިދެވެ.
އެ މައްސަަލައާ ގުޅިގެން ރާއްޖޭގެ ޓޫރިޒަމް ބޮއިކޮޓް ކުރަން އިންޑިއާގައި ކެމްޕޭނެއް ފެށިއިރު، އީޒްމައިޓްރިޕްއިން ރާއްޖެއަށް ބުކިން ހެދުން ހުއްޓާލީ އެ ދުވަސްވަރެވެ.
އީޒްމައިޓްރިޕްގެ ސީއީއޯ ނިޝާންތު ޕިޓީ ނެރުއްވި ބަޔާނެއްގައި ވިދާޅުވީ، ބުކިން ހެދުން ހުއްޓާލަން ޖެނުއަރީ މަހު ނިންމި ނިންމުން ބަދަލުކުރީ ދެ ގައުމުގެ މެދުގައި ގުޅުންތައް ރަނގަޅުވުމުން ކަމަށެވެ. އަދި މިއީ ރާއްޖޭގެ ޓޫރިޒަމް މިނިސްޓްރީގެ ވަފުދެއް އިންޑިއާއަށް ގޮސް، އެ ކުންފުންޏާއެކު ބޭއްވި ބައްދަލުވުންތަކުގައި ކުރިއަށްގެންދިޔަ މަޝްވަރާތަކަށް ފަހު ނިންމި ނިންމުމެއް ކަމަށް ވެސް އެ ބަޔާނުގައިވެއެވެ.
"އަޅުގަނޑުމެންނަކީ ގައުމު އެންމެ އިސްކުރާ ކުންފުންޏަކަށްވުމުން، އަޅުގަނޑުމެން އަބަދުވެސް ސަރުކާރުގެ ތަސައްވުރަށް ތާއިދުކޮށް، މަސައްކަތް ކުރަނީ ސަރުކާރާ އެއްގޮތްވާ ގޮތުގެ މަތިން،" އީޒްމައިޓްރިޕްއިން ބުނެފައިވެއެވެ.
އިންޑިއާގެ ބޮޑުވަޒީރާ ބެހޭ ގޮތުން ދެއްކި ވާހަކަތަކާ ގުޅިގެން ތިން ނައިބު ވަޒީރުން ވެސް ސަސްޕެންޑުކުރިއެވެ. ސަސްޕެންޑުކުރިތާ ނުވަ މަސް ފަހުން، މިދިޔަ މަހު ޝިއުނާ އާއި މަލްޝާ ވަނީ މަގާމުން އިސްތިއުފާ ދެއްވައިފައެވެ.
އެ މައްސަލައިގައި ދެ ގައުމުގެ ގުޅުން ހީނަރުވެ، މީގެ ކުރިން ރާއްޖޭގެ ފަތުރުވެރިކަމުގެ އެއް ވަނަ މާކެޓުގެ ގޮތުގައި އޮތް އިންޑިއާއިން އަންނަ ފަތުރުވެރިންގެ އަދަދު ވެސް ވަނީ މަދުވެފައެވެ. ނަމަވެސް މިފަހުން ސަރުކާރުން އަންނަނީ އެ ގައުމާ ގުޅުން ބަދަހި ކުރުމަށް ގިނަ މަސައްކަތް ކުރަމުންނެވެ.
އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ރައީސް ޑރ. މުޙައްމަދު މުއިއްޒު އަންނަ އާދިއްތަ ދުވަހު އިންޑިއާއަށް ފުރަމާނަ ދަތުރުފުޅެއް ކުރައްވާނެކަން ވެސް ސަރުކާރުން ވަނީ އިއުލާންކޮށްފައެވެ.