ވެރިކަމުން ދުރުކޮށްފައިވާ ބަންގްލަދޭޝްގެ ކުރީގެ ބޮޑު ވަޒީރު ޝައިޚް ހަސީނާ އަނބުރާ ގައުމަށް ފޮނުވައި ދިނުމަށް އެދި ބަންގްލަދޭޝްގެ ވަގުތީ ސަރުކާރުން އިންޑިއާއަށް ޑިޕްލޮމެޓިކް ނޯޓެއް ފޮނުވައިފިއެވެ.
ބަންގްލަދޭޝްގެ ދަރިވަރުންތަކެއް އިސްވެ ތިބެ ގެނައި އިންގިލާބަކަށްފަހު، 15 އަހަރުވީ ވެރިކަން ވައްޓާލުމުން އޮގަސްޓް މަހުގެ ފަސްވަނަ ދުވަހު ހަސީނާ ވަނީ ފިއްލަވައިގެން އިންޑިއާއަށް ވަޑައިގެންފައެވެ.
ބަންގްލަދޭޝްގެ ވަގުތީ ސަރުކާރުގެ ފޮރިން އެފެއާޒް އެޑްވައިޒަރު ތައުހީދު ހުސައިން ނޫސްވެރިންނާ ވާހަކަ ދައްކަވަމުން ވިދާޅުވީ ހަސީނާ ފޮނުވައިދިނުމަށް އެދި އިންޑިއާ ސަރުކާރަށް ޑިޕްލޮމެޓިކް މެސެޖެއް ފޮނުވާފައި ވާނެކަމަށާއި ހަސީނާ ގައުމަށް ގެންނަން ބޭނުން ވަނީ ޝަރީއަތަށްކަމަށެވެ.
އޭގެކުރިން އެގައުމުގެ ހޯމް އެޑްވައިޒަރު ޖަހަންގީރު ޢަލަމް ވެސް ވަނީ ހަސީނާ އަނބުރާ ގައުމަށް ފޮނުވައިދިނުމަށް އެދި އިންޑިއާގެ އެކްސްޓާނަލް އެފެއާޒް މިނިސްޓްރީއަށް ސިޓީއެއް ފޮނުވާފައިފައެވެ.
"އެކަމަނާ ހަވާލުކުރުމާ ގުޅޭ ގޮތުން ފޮރިން މިނިސްޓްރީއަށް ސިޓީއެއް ފޮނުވައިފިން. އެ ޕްރޮސެސް މިހާރު ކުރިއަށް އެބަދޭ." މީޑިއާއަށް މައުލޫމާތު ދެއްވަމުން އޭނާ ވިދާޅުވިއެވެ.
ޢަލަމް ވިދާޅުވީ ބަންގްލަދޭޝްއާއި އިންޑިއާއާ ދެމެދު އެކްސްޓްރެޑިޝަން ޓްރީޓީ ނުވަތަ ޖިނާއީ ޝަރީއަތަށް ކުށްވެރިން އެމީހުންގެ އަމިއްލަ ގައުމަށް ފޮނުވުމުގެ އިންތިޒާމު އެބައޮތް ކަމަށާއި އޭގެ ދަށުން ހަސީނާ އަނބުރާ ބަންގްލަދޭޝްއަށް ގެންދެވިދާނެ ކަމަށެވެ.
ޙަސީނާ ގައުމަށް ފޮނުވައިދިނުމަށް އެދި ޑިޕްލޮމެޓިކް ނޯޓެއް ފޮނުވާފައި ވަނީ އިންޑިއާގެ ފޮރިން ސެކްރެޓަރީ ވިކްރަމް މިސްރީ ބަންގްލަދޭޝްއަށް ވަޑައިގެން ވަގުތީ ސަރުކާރުގެ ޗީފް އެޑްވައިޒަރު މުޙައްމަދު ޔޫނުސްއާ ބައްދަލުކުރެއްވިތާ ދުވަސްކޮޅެއް ފަހުންނެވެ.
ބަންގްލަދޭޝްގެ އިންޓަނޭޝަނަލް ކްރައިމްސް ޓްރައިބިއުނަލް (އައިސީޓީ)ން ޙަސީނާ އާއި އޭނާގެ ވަޒީރުންނާއި އެޑްވައިޒަރުންނާއި ކުރީގެ އަސްކަރީ އަދި ސިވިލް އޮފިޝަލުން ހައްޔަރު ކުރުމުގެ އަމުރު ނެރެފައި ވަނީ އިންސާނިއްޔަތާ ހިލާފު ޖަރީމާތަކާއި ނަސްލު ނައްތާލުމުގެ ކުށްތަކަށް އަރައިގެން ކަމަށް ތުހުމަތުކޮށް އޮކްޓޫބަރު މަހުއެވެ.
އޭގެފަހުން ނޮވެމްބަރު މަހު ބަންގްލަދޭޝްއިން ވަނީ ޙަސީނާ ހައްޔަރު ކުރުމަށް އިންޓަޕޯލްގެ އެހީތެރިކަން ހޯދާނެ ކަމަށް ވެސް ބުނެފައެވެ.
އިންޓަނޭޝަނަލް ކްރައިމްސް ޓްރައިބިއުނަލް (އައިސީޓީ)އަކީ 1971ވަނަ އަހަރު ބަންގްލަދޭޝްގެ މިނިވަންކަމުގެ ހަނގުރާމައިގައި އިންސާނިއްޔަތާ ދެކޮޅަށް ހިންގި ޖަރީމާތަކުގެ ޝަރީއަތް ހިންގުމަށް ހަސީނާގެ ސަރުކާރުން 2010ވަނަ އަހަރު އުފެއްދި ޓްރައިބިއުނަލެކެވެ.