ކޮންސްޓްރަކްޝަން މަސައްކަތަކަށް އިންޑިއާއިން ރާއްޖެ ގެނެސް ހާލުގައި ޖެހިފައި ތިބި 40 މަސައްކަތްތެރީން، އެމީހުން އެދުނު ގޮތަށް އެނބުރި ގައުމަށް ދެވޭ ގޮތް ހަމަޖެހޭނެ ކަމަށް ރާއްޖޭގައި ހުންނަ އިންޑިއާ ހައި ކޮމިޝަނުން ބުނެފިއެވެ.
މި މައްސަލަ ފެންމަތިވެފައި ވަނީ ރާއްޖޭގައި ތިބެ، ހާލުގައި ޖެހިފައިވާކަމަށް ބުނެ އެ މަސައްކަތްތެރިން ވާހަކަދައްކާފައިވާ ވީޑިއޯއެއް އިއްޔެ އިންޑިއާގެ ނޫސްތަކުގައި އާންމުކުރުމާއެކުއެވެ. ހަމައެއާއެކު އެ ގައުމުގެ ބައެއް ނޫސްތަކުގައި ވެސް އެ މީހުންގެ ވާހަކަ ރިޕޯޓުކޮށްފައިވެއެވެ.
އެއީ ރާއްޖޭގެ ރެނާޓަސް ނަމަކަށް ކިޔާ ކޮންސްޓްރަކްޝަން ކުންފުންޏެއްގައި މަސައްކަތް ކުރުމަށް ގެނައި ބައެކެވެ. އަދި އެއީ ގަން ޕްރޮޖެކްޓް ސައިޓުގައި މަސައްކަތް ކުރަމުން ދިޔަ އިންޑިއާގެ އޮޑިޝާގެ 35 މީހަކާއި ޓެމިލް ނާޑޫގެ ހަތަރު މީހެކެވެ.
ވީޑިއޯގައި އެ މީހުން ކިޔައިދިން ގޮތުގައި، އެޖެންޓެއް މެދުވެރިކޮށް އެ އެންމެން ރާއްޖެ ގެނައީ ޖޫން، ޖުލައި ތެރޭގައެވެ. ރާއްޖެ ގެނައިއިރު އެ މީހުންނަށް ރަނގަޅު މުސާރައެއް ދޭނެކަމަށް ބުނިކަމަށް ވެސް އެ މީހުން ކިޔައިދިނެވެ. ނަމަވެސް އެ މީހުންނަށް މިހާރު މުސާރަ ނުދޭތާ އެތައް މަހެއް ވެފައިވާއިރު، އެކަމާ ދެކޮޅަށް އަޑުއުފުލުމުން ކުންފުނިން އެ މީހުންނަށް ބިރު ދައްކައި، އެ އެންމެން އެކޮމޮޑޭޝަން ތެރޭގައި ބަންދުކޮށްފައިވާކަމަށް އެ މީހުން ބުންޏެވެ.
"ދަ އިންޑިއަން އެކްސްޕްރެސް"އިން މިއަދު ހެނދުނު ރިޕޯޓުކޮށްފައިވާ ގޮތުގައި, އިންޑިއާގެ ހައި ކޮމިޝަނުން ވަނީ އެ މައްސަލައާ ގުޅޭ ގޮތުން ރެނާޓަސްއާ ވާހަކަ ދައްކައިފައެވެ. އެގޮތުން އެ ކުންފުނީގެ ޕްރޮޖެކްޓް މެނޭޖަރު ވަނީ، އެ މީހުން މިމަހުގެ ފަހެއްގައި ވަޒީފާއިން ވަކިވެފައިވާ ކަމަށް ކޮމިޝަނަށް އަންގައިފައި ކަމަށް އެ ނޫހުގައިވެއެވެ.
އެ މީހުންނަށް ދޭން ޖެހެނީ އެއް މަހުގެ މުސާރަ ކަމަށާއި އެ ފައިސާ ކުރިއަށް އޮތް ދެތިން ދުވަހުގެ ތެރޭގައި ދެވޭނެ ކަމަށް ވެސް ކޮމިޝަނަށް އަންގައިފައިވާ ކަމަށް އެ ނޫހުގައިވެއެވެ.
އެ ނޫހުން ރިޕޯޓުކޮށްފައިވާ ގޮތުގައި އެ ސައިޓުގައި އިންޑިއާގެ 196 މަސައްކަތްތެރިން ތިބެއެވެ.
އަދި ހައި ކޮމިޝަނުން ވަނީ އިންޑިއާގެ މަސައްކަތްތެރިންނަށް ލިބެންޖެހޭ ހުރިހާ ފައިސާއެއް އަވަހަށް ހަމަޖައްސައިދިނުމަށް ޕްރޮޖެކްޓް މެނޭޖަރުގެ ކިބައިން އެދިފައި ކަމަށް ވެސް ރިޕޯޓުކޮށްފައިވެއެވެ.
އެ މީހުންނަށް މުސާރަ ލިބުމާއެކު އަނބުރާ ގައުމަށް ދެވޭނެ ކަމަށް ހައި ކޮމިޝަނާ ހަވާލާދީ އިންޑިއަން އެކްސްޕްރެސްގައިވެއެވެ.
މީގެ ކުރިން ވެސް އިންޑިއާގެ މަސައްކަތްތެރިންތަކެއް ހާލުގައި ޖެހިގެން، މައްސަލައެއް ފެންމަތިވެފައިވެއެވެ.