ސިޔާސީ ޕާޓީތަކުން އާމްދަނީ ހޯދުމަށްޓަކައި ކުރާ ވިޔަފާރިތަކަށް ހިތްވަރުދޭ ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު މިއަދު ވިދާޅުވެއްޖެއެވެ.
ފުއާދު އެފަދައިން ވިދާޅުވީ، އިދިކޮޅު އެމްޑީޕީން ރިއަލް އެސްޓޭޓުގެ ވިޔަފާރިއަށް ވަންނަން ނިންމާފައިވާކަން އެ ޕާޓީން ހާމަކޮށްފައި ވަނިކޮށެވެ. ރޭ އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވީ އެކަން ކުރަން ނިންމީ މާލީ މިނިވަންކަން ހޯދުމަށްޓަކައި ކަމަށެވެ.
އެކަމާ ގުޅިގެން 'ސަން' އާ ވާހަކަދައްކަވަމުން ފުއާދު ވިދާޅުވީ، ގާނޫނާއި ގަވާއިދުގެ ދަށުން ސިޔާސީ ޕާޓީތަކަށް ވެސް ވިޔަފާރިކުރުމުގެ ހައްގުތައް ލިބިގެންދާ ކަމަށެވެ. އަދި ސިޔާސީ ޕާޓީތަކުން އާމްދަނީ ހޯދުމަށްޓަކައި ކުރާ ކަންކަމަށް އެއްވެސް ހުރަހެއް ވެސް ނެތް ކަމަށް ފުއާދު ވިދާޅުވިއެވެ. ހަމައެއާއެކު އެކަންކަމަށް ހިތްވަރުދޭ ކަމަށް ވެސް އޭނާ ވިދާޅުވިއެވެ.
...ގާނޫނުގެ ދަށުން މަނާ ނުކުރާނަމަ އެ ވިޔަފާރިއެއް ކުރުމުގެ ފުރުސަތު އެބައޮތް. ސިޔާސީ ޕާޓީތަކުން ފައިސާ ނުވަތަ އާމްދަނީ ހޯދަން ކުރާ ކަންކަން އެންކަރޭޖް ވެސް ކުރަން، އީސީގެ ރައީސް ފުއާދު ތައުފީގު
ރޭ ބޭއްވި އެމްޑީޕީގެ ގައުމީ މަޖިލިސް ޖަލްސާ ފަށްޓަވަމުން ފައްޔާޒު ވިދާޅުވީ ސިޔާސީ ޕާޓީގެ ގާނޫނުގައި ޕާޓީތަކަށް ވިޔަފާރި ކުރުމުގެ ހުއްދަ ލިބިދީފައި އޮތް ނަމަވެސް، އެ ވިޔަފާރިއެއް ކުރެވޭނެ ގޮތެއް ސާފުކޮށް ބަޔާންވެފައި ނެތްކަމަށެވެ.
ރޭ ބޭއްވި އެމްޑީޕީގެ ގައުމީ މަޖިލިސް ޖަލްސާގެ ތެރެއިން -- ފޮޓޯ/ އެމްޑީޕީ
ފުއާދު ވިދާޅުވީ ގާނޫނުގައި ސިޔާސީ ޕާޓީތަކުން ވިޔަފާރިކުރުމާ މެދު ވަކި ގޮތެއް ބަޔާންކޮށްފައި ނެތް ނަމަވެސް، ވިޔަފާރިކުރުމުގެ ހުއްދަ އޮތް ކަމަށެވެ. އެހެންކަމުން ގާނޫނުގައި މަނާނުކުރާ، އަދި މަސްލަހަތަށް ފުށުނާރާ ކޮންމެ ވިޔަފާރިއެއް ވެސް ކުރަންވީ ކަމަށް ފުއާދު ވިދާޅުވިއެވެ.
އީސީ އިން އެކަމާ މެދު ކުރަން ވަކި ކަމެއް ނެތް ކަމަށާއި އެކަމަށް ހިތްވަރުދޭ ކަމަށް ވެސް ފުއާދު ވިދާޅުވިއެވެ.
ފައްޔާޒު ވަނީ ސިޔާސީ ޕާޓީއެއްގެ ގޮތުގައި އެ ޕާޓީ ކުރިޔަށް ގެންދިއުމަށް ޓަކައި ވަރަށް ބައިވަރު ފައިސާ ބޭނުންވާ ކަމަށް ވިދާޅުވެފައެވެ. އޭނާ ވިދާޅުވި ގޮތުގައި އެމްޑީޕީއަށް 19 އަހަރު ވެފައިވާއިރު، އަމިއްލަ ފައިމައްޗަށް ތެދުވުމަށްޓަކައި މާލީ މިނިވަންކަމާއި ތަނަވަސްކަމެއް ހޯދިފައެއް ނެތެވެ.
އަދި އެ ކަމަށް އެދި އެމްޑީޕީގެ ފަރާތުން ސަރުކާރަށް ސިޓީއެއް ވެސް ފޮނުވާފައިވާ ކަމަށް އޭނާ ވިދާޅުވިއެވެ.
މީގެ އިތުރުން ވެސް ރާއްޖޭގެ ސިޔާސީ މައިދާނުގައި ހަރަކާތްތެރިވާ މީހުންނަކީ ގާބިލް ބަޔަކަށް ހެދުމަށް ޓަކައި އެމްޑީޕީން އެކެޑަމީއެއް ހިންގުމަށް ނިންމާފައިވާ ކަމަށް ވެސް ފައްޔާޒު ވިދާޅުވިއެވެ. އޭނާ ވިދާޅުވި ގޮތުގައި އެއީ އެމްޑީޕީގެ މަގު ޗާޓުގައި ވެސް ހިމެނިފައި އޮތް ކަމެކެވެ. ހަމައެއާއެކު މީގެ އިތުރުން އެމްޑީޕީ ދެމެހެއްޓެނިވި ގޮތެއްގައި ހަރުދަނާ ކުރުމަށްޓަކައި، އެ ޕާޓީގެ ލީޑަޝިޕަށް މަޝްވަރާދިނުމަށް "ތިންކް ޓޭންކް"އެއް އުފެއްދުމަށް ނިންމާފައިވާކަން ވެސް ފައްޔާޒު ހާމަ ކުރެއްވިއެވެ.