ރައީސުލްޖުމްޙޫރިއްޔާ ޑރ. މުހައްމަދު މުއިއްޒު އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ބައިވެރިވެވަޑައިގަތުމަށް ކުރެއްވި ދަތުރުފުޅަށްފަހު ފޮރިން މިނިސްޓަރު މޫސާ ޒަމީރު އެހެން މަގާމަކަށް ބަދަލުކުރެއްވުމަކީ، އެ ދަތުރުފުޅުގެ ކާމިޔާބީއާ ދޭތެރޭ ސުވާލު އުފެދޭ ކަމެއް ކަމަށް ކުރީ ސަރުކާރުގެ ހެލްތު މިނިސްޓްރީގެ ސްޓޭޓް މިނިސްޓަރުކަން ކުރެއްވި އަހުމަދު އާދިލް މިރޭ ވިދާޅުވެއްޖެއެވެ.
ރައީސް މުއިއްޒު މިއަދު ވަނީ އެމަނިކުފާނު ކެބިނެޓަށް ގެނައި ފުރަތަމަ ބަދަލު ގެންނަވާފައެވެ. އެގޮތުން ޒަމީރު، ފިނޭންސް މިނިސްޓަރުކަމަށް ބަދަލުކުރައްވައި، ހެލްތު މިނިސްޓަރުކަމުގައި ހުންނެވި ޑރ. އަބްދުﷲ ޚަލީލް ވަނީ ފޮރިން މިނިސްޓަރުކަމަށް އައްޔަނުކުރައްވާފައެެވެ.
އިދިކޮޅު އެމްޑީޕީން ކޮންމެ ހޯމަ ދުވަހެއްގެ ރޭ ބާއްވާ ހަވަރު ބެރު ޕެނަލް ޑިސްކަޝަންގައި މިރޭ ވާހަކަދައްކަވަމުން އާދިލް ވިދާޅުވީ، ކެބިނެޓަށް ގެނައި ބަދަލާއެކު މިއަދު ކުއްލިއަކަށް ހައިރާންކަމެއް ލިބި އެންމެ ބޮޑަށް ސުވާލު އުފެދުނީ އދ.ގެ ދަތުރުފުޅުގެ ކާމިޔާބީއާ ދޭތެރޭ ކަމަށެވެ.
މިއަދު ކެބިނެޓަށް ބަދަލުގެންނެވީއިރު، އެ ދަތުރުފުޅުގެ އެންމެ ބޮޑު މޭސްތިރިއަކީ ފޮރިން މިނިސްޓަރު. ފޮރިން މިނިސްޓަރު އެހެން ވުޒާރާއަކަށް ބަދަލުކުރެއްވީމަ އަޅުގަނޑަށް މި ވިސްނެނީ އެ ކާމިޔާބީ ކިހިނެއް ދެކެވަޑައިގަންނަވާތީ ބާއޭ. މި ދަތުރު ހިންގަވައި މިކަންތައްތަކުގައި އެންމެ މުހިންމު ރޯލެއް ކުޅުއްވާނި ފޮރިން މިނިސްޓަރު، އަހުމަދު އާދިލް
އާދިލް ވިދާޅުވީ އެކަން އެގޮތަށް ކުރެއްވުމުން މިހާރު ރައްޔިތުން ވެސް ތިބޭނީ އޮޅުމެއްގެ ތެރޭގައި ކަމަށެވެ. އަދި އެ ދަތުރުގެ ކާމިޔާބީއާ މެދު ގޮތް ނިންމާނީ ރައްޔިތުން ކަމަށް އާދިލް ވިދާޅުވިއެވެ.
އެމްޑީޕީގެ މަނަދޫ ދާއިރާގެ ރައީސް މުހައްމަދު ތޯރިގު ހަވަރު ބެރު ޕެނަލް ޑިސްކަޝަންގައި ވާހަކަދައްކަވަނީ -- ފޮޓޯ/ އެމްޑީޕީ
އެ ދަތުރުފުޅާ މެދު އެމްޑީޕީގެ މަނަދޫ ދާއިރާގެ ރައީސް އަދި ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު ވެސް ވަނީ ސުވާލުއުފައްދަވާފައެވެ. އެގޮތުން ވިދާޅުވީ، އެ ދަތުރުފުޅާއެކު ދުނިޔޭގެ ވެރިންގެ މާބޮޑު އިތުބާރަކާއި ޔަގީންކަމެއް ރާއްޖޭގެ ލީޑަރުންނާ ދޭތެރޭ އޮތްތަނެއް މިވަގުތު ނުފެންނަ ކަމަށެވެ.
އެހެންވީމަ އަޅުގަނޑުމެންނަކަށް ނުފެނޭ ދުނިޔޭގެ މާބޮޑު އިތުބާރެއް ޔަގީންކަމެއް ރާއްޖޭގެ ލީޑަރުންނާ ދޭތެރޭ އޮތްތަނެއް މިވަގުތު ނުފެނޭ. އެ ޔަގީންކަމާ އެބޭފުޅުންނާ ދޭތެރޭ އޮންނަ އިތުބާރެއްގެ މައްޗަށް ބައެއް ފަހަރަށް ކަންކަން ފަހިވެގެން އަންނާނި. އެހެންވީމަ އެގޮތަށް ކަންކަން ފަހިވެގެން އަންނަތަނެއް އަޅުގަނޑަކަށް ނުފެނޭ، މުހައްމަދު ތޯރިގު
މި ދަތުރުފުޅުގައި ރައީސް މުޢިއްޒު ވަނީ އދ.ގެ އާންމު މަޖިލީހުގެ 79 ވަނަ ދައުރުގެ ސެޝަންގައި ވާހަކަފުޅު ދައްކަވާފައެވެ. އަދި، އެ މަނިކުފާނު ވަނީ ސެކިއުރިޓީ ކައުންސިލުގައި ވެސް ވާހަކަފުޅު ދައްކަވާފައެވެ.
ރާއްޖެ އދ.ގެ މެންބަރަކަށްވީތާ 59 އަހަރު ވެފައިވާއިރު، މިއީ ދިވެހި ރައީސަކު ސެކިއުރިޓީ ކައުންސިލްގައި ވާހަކަފުޅު ދެއްކެވި ފުރަތަމަ ފަހަރެވެ. އޭގެ އިތުރުން، ރައީސް ވަނީ ބައެއް ހަވާސާ އިވެންޓްތަކުގެ ރިޔާސަތު ވެސް ބަލަހައްޓަވާފައެވެ.
މި އިވެންޓްތަކުގައި މޫސުމަށް އަންނަ ބަދަލުތަކާއި، އިއާދަކުރަނިވި ހަކަތައާއި، އިޖުތިމާއީ އަދި އިގުތިސާދީ ގޮންޖެހުންތަކާއި، ޑިޖިޓަލައިޒޭޝަން ފަދަ މުހިންމު މައްސަލަތަކަށް އެ މަނިކުފާނު ވަނީ އަލިއަޅުއްވާލައްވާފައެވެ.
އދ.ގެ އާންމު މަޖިލީހުގައި ކުރެއްވި ތަގުރީރުތަކުގައި ރާއްޖެއަށް ދިމާވާ ގޮންޖެހުންތަކާއި، ރާއްޖޭގެ ތަރައްގީއަށް ބޭނުންވާނެ ގިނަ ކަންތައްތަކެއްގެ މައްޗަށް ވާހަކަފުޅުދައްކަވައި ބައިނަލްއަގްވާމީ ބޮޑެތި ގައުމުތަކުގެ އެއްބާރުލުމަށް އެދިވަޑައިގަތެވެ. އަދި ފަލަސްތީނު މައްސަލައިގައި ވެސް އެ ގައުމުގެ ހައްގުގައި އެ މަނިކުފާނު ވަކާލާތު ކުރެއްވިއެވެ.