ދައުލަތުގެ މީޑިއާ ޕީއެސްއެމްގެ މާލިއްޔަތުން ނުވަ މިލިއަނަށް ވުރެ ގިނަ ރުފިޔާ ގެއްލިފައިވާ މައްސަލަ އެންޓި ކޮރަޕްޝަން ކޮމިޝަން (އޭސީސީ)އިން ބަލަމުން އަންނަ ކަމަށް ބުނެފިއެވެ.
އޭސީސީން އާންމުކުރި ބަޔާނެއްގައި ބުނީ ޕީއެސްއެމްއިން ޑޮލަރު ގަތުމަށް ނެގި ފައިސާއާއި އާމްދަނީގެ ގޮތުގައި ބަލައިގެންފައިވާ ފައިސާއާ ގުޅޭ މައްސަލައެއް އެ ކޮމިޝަނުން ތަހުގީގު ކުރަމުން އަންނަ ކަމަށެވެ. އެ މައްސަލައަކީ ޕީއެސްއެމްއިން އެ ކޮމިޝަނަށް ހުށަހަޅައިގެން، މިދިޔަ ޖުލައި މަހު ތަހުގީގު ކުރަން ފެށި މައްސަލައެއް ކަމަށް އޭސީސީން ފާހަގަކުރިއެވެ.
އެ ކޮމިޝަނުން ބުނީ މައްސަލައިގެ ޕްރިލިމިނަރީ ތަހުގީގު ނިންމައި، އިތުރަށް ތަހުގީގު ކުރަން ޖެހޭ ކަންކަން ހުރުމުން މައްސަލަ އިތުރަށް ތަހުގީގު ކުރަމުން އަންނަ ކަމަށެވެ. އަދި އެ މައްސަލައާ ގުޅުންހުރި ޕީއެސްއެމްގެ ޚާއްސަ އޮޑިޓް ކުރިއަށްދިޔައިރު، އޮޑިޓް އޮފީހުން އެ ކޮމިޝަނާ މަޝްވަރާ ކުރި ކަމަށް އޭސީސީން ބުންޏެވެ.
"މައްސަލައާ ގުޅުންހުރި ހެއްކާއި ގަރީނާއަށް އަސާރު ނުކުރާނެ ގޮތަށް ދެ މުއައްސަސާއިން އެކުގައި ވަނީ މަަސައްކަތްކޮށްފައެވެ." އެ ބަޔާނުގައިވެއެވެ.
އޭސީސީން ވަނީ މި މަހުގެ ތެރޭގައި ފުލުހުން ވެސް އެ މައްސަލަ އޭސީސީއަށް ހުށަހަޅައިފައިވާކަން ފާހަގަކޮށްފައެވެ.
ޕީއެސްއެމްގެ އޮޑިޓް ރިޕޯޓުގައިވާ ގޮތުން ޖުމުލަ 9,034,083 ރުފިޔާ އެ ކުންފުނީގެ މާލިއްޔާއިން ގެއްލިފައިވެއެވެ.
އޭގެ ތެރޭ ހިމެނެނީ:
- ޕީއެސްއެމްއަށް ބޭނުންވާ ޑޮލަރު ގަތުމުގެ ނަމުގައި 2020 ވަނަ އަހަރުން ފެށިގެން 2024 ވަނަ އަހަރުގެ އެޕްރީލު މަހުގެ ނިޔަލަށް ޕީއެސްއެމްގެ ބޭންކް އެކައުންޓުން ނެގި ފައިސާގެ ތެރެއިން 4.58 މިލިއަން ރުފިޔާއާ
- 2017 ވަނަ އަހަރުން ފެށިގެން 2024ވަނަ އަހަރުގެ އެޕްރީލު މަހުގެ ނިޔަލަށް ޕީއެސްއެމްއަށް އާމްދަނީ
- އެހެނިހެން ގޮތްގޮތުން ބަލައިގަނެފައިވާ ފައިސާގެ ތެރެއިން 4.26 މިލިއަން ރުފިޔާ
- ޕީއެސްއެމްގެ ތިޖޫރީގައި ހުރި ފައިސާގެ ތެރެއިން 190,087 ރުފިޔާ
މީގެ އިތުރުން އޮޑިޓުގައިވާ ގޮތުން ޑޮލަރު ގަތުމަށް 2020ވަނަ އަހަރުން ފެށިގެން 2024 ވަނަ އަހަރުގެ އެޕްރީލު މަހުގެ ނިޔަލަށް އެކި ފަހަރު މަތިން ޖުމުލަ 373,988 ޑޮލަރަށްވާ 5,785,346 ރުފިޔާ ޕީއެސްއެމްގެ ބޭންކް އެކައުންޓުން ނަގައިފައިވާއިރު އެ ފައިސާގެ ތެރެއިން 4,583,701 ރުފިޔާ އަށްވާ 297,257 ޑޮލަރު ޕީއެސްއެމަށް ލިބިފައިނުވާކަން ފާހަގަކުރެވިފައިވެއެވެ.
އަދި ޑޮލަރު ގަތުމަށް ނެގި ފައިސާގެ ތެރެއިން ޕީއެސްއެމްއަށް ލިބިފައިވަނީ ހަމައެކަނި 1,201,645 ރުފިޔާ އަށްވާ 76,731 ޑޮލަރުކަމަށް ވަނީ ބުނެފައެވެ.
މީގެ އިތުރުން އޮންލައިން ޓްރާންސްފާ ހަދައިގެން 1,284,479 ރުފިޔާ ޑޮލަރު ގަތުމަށް ނަގައިފައިވާއިރު ޖުމުލަ 75,491 ޑޮލަރަށްވާ 1,164,068 ރުފިޔާ އެކިފަހަރު މަތިން ޖަމާކޮށްފައިވަނީ ޕީއެސްއެމްގެ ކުރީގެ ފައިނޭންސް ޑިރެކްޓަރުގެ ދަރިއެއްގެ ބޭންކް އެކައުންޓަށްކަން ފާހަގަކުރެވުނުކަމަށް ވެސް އޮޑިޓުގައިވަނީ ބުނެފައެވެ.