ފާއިތުވި އަށް މަސް ދުވަސް ތެރޭގައި 282 މިލިއަނަށް ވުރެ ގިނަ ރުފިޔާގެ މަސްތުވާތަކެއްޗާއި ބަނގުރާ ފުލުހުން އަތުލައިގެންފައިވާ ކަމަށް ތަފާސްހިސާބުތަކުން ދައްކައިފިއެވެ.
ފުލުހުން ވަނީ ޑުރަގު އެންފޯސްމަންޓުން މިދިޔަ ޖެނުއަރީ މަހުގެ އެކަކުން އޮގަސްޓު މަހުގެ 31އަށް ކޮށްފައިވާ މަސައްކަތްތަކުގެ ތަފާސްހިސާބުތައް ހިއްސާކޮށްފައެވެ. އެ ހިސާބުތައް ދައްކާ ގޮތުން، ފުލުހުން މިދިޔަ އަށް މަސް ތެރޭ މަސްތުވާތަކެއްޗާ ގުޅޭ 113 އޮޕަރޭޝަނެއް ހިންގާފައިވެއެވެ.
އެ އޮޕަރޭޝަންތަކުގައި 712 މީހަކު ހައްޔަރުކޮށްފައިވާއިރު، 8،554 މީހުން، ފުލުހުން ވަނީ ބަލައިފާސްކޮށްފައެވެ.
ފާއިތުވި އަށް މަސް ދުވަހު ފުލުހުން ޑްރަގާ ދެކޮޅަށް ކޮށްފައިވާ މަސައްކަތްތަކުގެ ތަފާސްހިސާބުތައް ---- ފޮޓޯ/ ފުލުހުން
މީގެ އިތުރުން، މިދިޔަ ޖެނުއަރީ މަހުގެ އެކަކުން އޮގަސްޓު މަހުގެ 31 ވަނަ ދުވަހުގެ ނިޔަލަށް ގަވާއިދާ ޚިލާފަށް އެ ވިޔަފާރީގައި ހަރަކާތްތެރިވާ 80 ބިދޭސީން އިމިގްރޭޝަނާ ހަވާލުކޮށްފައިވާ ކަމަށް ތަފާސްހިސާބުތަކުން ދައްކައެވެ.
ފުލުހުން ބުނީ، އެ އަށް މަސް ދުވަހުގެ ތެރޭގައި 158.8 ކިލޯގެ މަސްތުވާތަކެއްޗާއި 5،252 ބަނގުރާ ފުޅި އަތުލައިގެންފައިވާ ކަމަށެވެ. އަދި، އެ ތަކެތީގެ މަގުމަތީ އަގު 282.2 މިލިއަން ރުފިޔާއަށް އަރާ ކަމަށް ފުލުހުން ބުންޏެވެ.
އެ މުއްދަތުގެ ތެރޭގައި މަސްތުވާތަކެއްޗާ ގުޅޭ 475 މައްސަލައެއް ފުލުހަށް ހުށަހަޅާފައިވެއެވެ. އަދި، 230 މައްސަލައެއްގައި ދައުވާކުރަން ޕްރޮސެކިއުޓާ ޖެނެރަލް އޮފީސް (ޕީޖީ)އަށް ފޮނުވާފައިވާ ކަމަށް ތަފާސްހިސާބުތަކުން ދައްކައެވެ.
މަސްތުވާތަކެތީގެ މައްސަލައަކީ ރާއްޖޭގައި ދިމާވެފައި އޮތް އެންމެ ބޮޑު އެއް އިޖުތިމާއީ މައްސަލައެވެ. މި މައްސަލަ ހައްލުކުރަން ފުލުހުން އަންނަނީ މަސައްކަތްތަކެއް ކުރަމުންނެވެ.