ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރުކަމުގެ މަގާމަށް މުޙައްމަދު މައުރޫފް ޖަމީލު މިއަދު އައްޔަންކޮށްފިއެވެ.
އޭނާ އެ މަގާމަަށް އައްޔަންކުރިކަން ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑު (ޕީސީބީ)އިން ހާމަކުރީ މިއަދެވެ.
އެޗްޑީސީގެ މެނޭޖިން ޑިރެކްޓަރުކަމުގެ މަގާމު ހުސްވީ އެ މަގާމުގައި ކުރިން ހުންނެވި އިބްރާހިމް ފަޒުލް ރަޝީދު ރޭ އެ މަގާމުން އިސްތިއުފާ ދެއްވުމުންނެވެ.
އެއާއެކު ޕީސީބީން މިއަދު ވަނީ ފަޒުލްގެ އިސްތިއުފާ ޤަބޫލުކޮށް މިއަދުން ފެށިގެން އެ މަގާމުން އޭނާ ވަކިކޮށްފައިވާ ކަމަށް ވެސް ބުނެފައެވެ.
މައުރޫފަކީ، ކުރީގެ ރައީސް މައުމޫނު އަބްދުލްގައްޔޫމުގެ ވެރިކަމުގައި މިނިސްޓާ އޮފް ކޮންސްޓްރަކްޝަން އެންޑް ޕަބްލިކް އިންފްރާސްޓްރަކްޗާގެ މަގާމު ފުރުއްވި ބޭފުޅެކެވެ. މީގެ އިތުރުން އޭނާއަކީ އާކިޓެކްޓެއްގެ އިތުރުން ކޮންސްޓްރަކްޝަން ދާއިރާއާ ގުޅޭ ދިރާސާ ވެސް ކުރައްވާ ބޭފުޅެކެެވެ.
ހުޅުމާލެ ހިއްކައި ތަރައްގީކުރުމުގެ މަސައްކަތް ކުރިއަށް ދިޔަ ދުވަސްވަރު އޭނާވަނީ މުހިންމު ދައުރެއް އެ ކަމުގައި އަދައިކުރައްވައިފައެވެ.
ފަޒުލް އިސްތިއުފާ ދެއްވީ ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ވަނީ އާންމުވެ، ވައްކަމާއި ކޮރަޕްޝަންގެ ތުހުމަތު އޭނާއަށް ކުރަމުން އަންނަނިކޮށެވެ.
އެ މައްސަލައާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ އެކަމުގައި އޭނާގެ މަސްލަހަތެއް ނެތް ކަމަށާއި، އެފަދަ މައްސަލައެއް ފެންމަތިވީ އޭނާގެ ބޭބެއާ ގުޅޭ ގޮތުން ކަމަށް ވުމަކީ އިއްތިފާގެއް ކަމަށެވެ. އަދި އޭނާއަށް ކުރާ ތުހުމަތުތަކަށް ވަނީ އިންކާރުކޮށްފައެވެ.
މި ވަގުތު އެޗްޑީސީގެ ޗެއާމަން އަހުމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ވަނީ ސަސްޕެންޑުކޮށްފައެވެ. ހަމައެއާއެކު އެ މީހުންގެ ޕާސްޕޯޓު ވެސް ވަނީ ހިފަހައްޓައިފައެވެ.
ނުހައްގުން ގޯތިތަކެއް ދިން މައްސަލަ ފެންމަތިވެފައި އޮއްވައި އިިއްޔެ ވަނީ ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ވެސް ހާމަވެފައެވެ.