ވެލާނާ އިންޓަނޭޝަނަލް އެއާޕޯޓަށްދާ ހައިވޭގައި އެމްއެންޑީއެފްގެ ވެހިކަލަކާއި ސައިކަލެއް ޖެހި ރޭ އެކްސިޑެންޓެއް ހިނގައިފިއެވެ.
މި އެކްސިޑެންޓާ ގުޅިގެން ސޯޝަލް މީޑިއާގައި ވީޑިއޯއެއް އާންމުވެފައިވެއެވެ. އެވީޑިއޯގައި މީހަކު އެއާޕޯޓު ހައިވޭގައި ހުރި ގަހެއް ކައިރީ ވެއްޓިފައި އޮތްއިރު، އެ މީހާ ނެގުމަށް ފުލުހަކު ހަރަކާތްތެރިވާ މަންޒަރު ފެނެއެވެ. އަދި، ކައިރީގައި އިތުރު ފުލުހަކު ފޮޓޯނަގާއިރު، އެހެން ދެ ފުލުހުންނާއި މީހަކު އެތަނުގައި ހަރަކާތްތެރިވާ މަންޒަރު ވީޑިއޯއިން ފެނެއެވެ.
މި ކަމާ ގުޅިގެން ފުލުހުން ބުނީ، އެއާޕޯޓު ހައިވޭގައި އެމްއެންޑީއެފްގެ ވެހިކަލަކާއި ސައިކަލެއް ޖެހިގެން ރޭ އެކްސިޑެންޓުވި ކަމުގެ ރިޕޯޓުލިބިފައިވާ ކަމަށެވެ. އެ މައްސަލަ ތަހުގީގު ކުރަމުން އަންނަ ކަމަށް ފުލުހުން ވަނީ ބުނެފައެވެ.
ނަމަވެސް، އެކްސިޑެންޓުގައި މީހަކަށް ގެއްލުންވި ކަމެއް ނުވަތަ އެހެން އިތުރު ތަފްސީލެއް ހާމަކޮށްފައެއް ނުވެއެވެ.