ކުރީ ސަރުކާރުން ކުރިއަށް ގެންދިޔަ ބިންވެރިޔާ އަދި ގެދޮރުވެރިޔާ ސްކީމުގެ މައްސަލައިގެ މައުލޫމާތު ހުށަހެޅުމަށް ޚާއްސަ ޕޯޓަލެއް ފުލުހުން ގާއިމުކޮށްފިއެެވެ.
އެގޮތުން، ފުލުހުން ވަނީ އެ ސްކީމުތަކުގެ މައްސަލައިގެ ތަހުގީގަށް ބޭނުންކުރެވިދާނެ ކަމަށް ބެލެވޭ އެއްވެސް މައުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ ލިޔުމެއް އޮތް ނަމަ ޕޯޓަލަށް ހިއްސާކުރުމަށް އެދިފައެވެ.
އެ މައުލޫމާތެއް ހިއްސާކުރާއިރު އަމިއްލަ މައުލޫމާތު ހާމަނުކޮށް، ނުވަތަ ތަހުގީގު ކުރާ ފަރާތަކަށް ގުޅަން ބޭނުންވާ ހާލަތެއްގައި ގުޅޭނެ މައުލޫމާތު އެ ޕޯޓަލް މެދުވެރިކޮށް ހިއްސާކުރެވޭނެ ކަމަށް ފުލުހުން ވަނީ ބުނެފައެވެ.
އޭގެއިތުރުން، ފުލުހުން ވަނީ މައުލޫމާތު ހިއްސާކުރާ ފަރާތުގެ ސިއްރުކަން ހާމަކުރާނެ ކަމުގެ ޔަގީންކަން ދީފައެވެ.
މިފަހުން ވަނީ ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، އެޗްޑީސީގެ މެނޭޖިން ޑިރެކްޓަރު ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ވަނީ އާންމުވެފައެވެ. އެ ގޯތީގައި ވަށައިފާރު ވެސް ވަނީ ރާނާފައެވެ.
އެ މައްސަލައާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ އެކަމުގައި އޭނާގެ މަސްލަހަތެއް ނެތް ކަމަށާއި، އެފަދަ މައްސަލައެއް ފެންމަތިވީ އޭނާގެ ބޭބެއާ ގުޅޭ ގޮތުން ކަމަށް ވުމަކީ އިއްތިފާގެއް ކަމަށެވެ.
މި މައްސަލަތައް ފެންމަތިވެފައި ވަނިކޮށް މިއަދު ވަނީ ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް އޮޅުވާލައިގެން ދިން މައްސަލައެއް ވެސް ފެންމަތިވެފައެވެ.
ގޯތީގެ މައްސަލަ ފުލުހުންނާއި، އެންޓި ކޮރަޕްޝަން ކޮމިޝަން (އޭސީސީ)އިން އަންނަނީ ބަލަމުންނެވެ.
މައްސަލަ ބަލަމުން އަންނަނިކޮށް، މިއަދު ފަޒުލް ވަނީ ތަހުގީގަށް ފުރުސަތު ދޭންކަމަށް ބުނެ އިސްތިއުފާ ދެއްވާފައެވެ.